ʻOkú Ke Loto-Lelei ke Kole ke Kau ki he Ako Maʻá e Kau ʻEvangeliō ʻo e Puleʻangá?

ʻOkú ke ʻi he vahaʻa taʻu ʻo e 23 ki he 65 pea ngāue taimi-kakato kia Sihova? ʻOkú ke moʻui lelei pea malava ke ngāue ʻi ha feituʻu pē ʻoku lahi ange ai ʻa e fiemaʻú? Kapau ko hoʻo talí ko e ʻio, kuó ke fakakaukau ke kole ke kau ki he Ako Maʻá e Kau ʻEvangeliō ʻo e Puleʻangá? Talu mei he fuofua kalasí, ko e laui afe ʻo e fanga tokoua mo e fanga tuofāfine taʻemalí mo e ngaahi hoa malí kuo nau tohi kole ki ai. Kae kehe, ʻoku fiemaʻu lahi ʻa e fanga tokoua taʻemalí ke tohi kole ki ai. Kole kia Sihova ke fakalahi hoʻo holi ke fai hono finangaló pea ke faʻifaʻitaki ki hono ʻAló. (Saame 40:8; Māt. 20:28; Hep. 10:7) Fakakaukau leva ki he ngaahi founga ke fakasiʻisiʻi ai hoʻo ngāué pe fatongia fakafoʻituitui kae lava ke ke taau ki ai.

Ko e hā ʻa e ngaahi faingamālie ʻo e ngāué kuo maʻu ʻe he faʻahinga kuo nau kau ki he ako fakalaumālie ko ení? Kuo vaheʻi ʻa e niʻihi ʻo e kau akó ke ngāue ʻi he ngaahi feituʻu ʻoku leaʻaki ai ʻa e ngaahi lea kehe pe kau ʻi he faifakamoʻoni makehe ʻi he ngaahi feituʻu kakai ʻi he ngaahi kolo lalahí. Ko e kau ako ʻe niʻihi ʻoku nau hoko ko ha ʻovasia sēketi tokoni, ʻovasia sēketi pe ko ha misinale. ʻI hoʻo fakakaukau ki he meʻa ʻe lava ke ke fai ʻi he ngāue ʻa Sihová ʻofa ke ke fakahāhā ʻa e tōʻonga tatau naʻe maʻu ʻe he palōfita ko ʻAiseá ʻa ia naʻá ne pehē: “Ko au eni! Fekauʻi au!”​—ʻAi. 6:8.

SIO ʻI HE VITIŌ KO E KAU MISINALÉ KO E KAU NGĀUE IA ʻI HE UTU-TAʻÚ, PEA TALI LEVA ʻA E NGAAHI FEHUʻI KO ENÍ:

• 

  ʻOku anga-fēfē hono fili ʻa e kau misinalé?

• 

  Ko e hā ʻa e ngāue lelei ʻoku fai ʻe he kau misinalé?

• 

  Ko e hā ʻa e ngaahi tāpuaki ʻe niʻihi ʻo e ngāue fakamisinalé?