MOʻUI KO HA KALISITIANE
Ngaahi Mātuʻa, Teuʻi Hoʻo Fānaú ʻAki ʻa e ʻIló
ʻOku tau moʻui ʻi ha māmani ʻoku lau ʻa e leleí ko e kovi pea lau ʻa e koví ko e lelei. (ʻAi. 5:20) Ko e meʻa fakamamahí, ʻoku fai ʻe he kakai ʻe niʻihi ʻa e ngaahi meʻa ʻoku fehiʻa ai ʻa Sihová ʻo kau ai ʻa e tōʻonga taʻetaau ʻi he vahaʻa ʻo ha tangata mo ha tangata pea mo ha fefine mo ha fefine. ʻE feinga nai ʻa e ngaahi toʻumeʻa ʻi he ʻapiakó pe niʻihi kehé ke tohoakiʻi ʻetau toʻutupu ʻofeiná ke muimui kiate kinautolu. ʻE lava fēfē ke ke teuʻi hoʻo fānaú ke fekuki lavameʻa mo e ngaahi ʻahiʻahi ko ení?
Teuʻi hoʻo fānaú ʻaki ʻa e ʻilo ki he ngaahi meʻa ʻoku fiemaʻu mai ʻe Sihová. (Liv. 18:3) Hokohoko atu hoʻo akoʻi kinautolu ʻaki ʻa e meʻa ʻoku akoʻi ʻe he Tohi Tapú fekauʻaki mo e fehokotaki fakasinó, ʻo fakatatau ki honau taʻumotuʻá mo e meʻa ʻe lava ke nau mahinoʻí. (Teu. 6:7) ʻEke hifo: ‘Kuó u akoʻi ʻeku fānaú fekauʻaki mo hono fakahāhā totonu ʻo e ʻofá, mo e mahuʻinga ʻo hono tui ʻa e vala tāú, mo e fiemaʻu ki he niʻihi kehé ke nau fakaʻapaʻapaʻi ʻa ʻenau ngeia fakafoʻituituí? ʻE ʻilo ʻe heʻeku fānaú ʻa e meʻa ke faí kapau ʻoku feinga ha taha ke fakahāhā kiate kinautolu ha ʻata fakalielia pe kole ange ke nau fai ha meʻa ʻoku pehē ʻe Sihova ʻoku hala?’ Ko e ʻilo tokamuʻá ʻe tokoniʻi kinautolu ke fakaʻehiʻehi mei he ngaahi palopalema lahi. (Pal. 27:12; Tml. 7:12) ʻI hoʻo akoʻi hoʻo fānaú ʻokú ke fakahaaʻi ai ʻa e ʻofa ki hoʻo tofiʻa mahuʻinga meia Sihová.—Saame 127:3.
SIO ʻI HE VITIŌ LANGA HA FALE ʻA IA ʻE TUʻULOÁ—MALUʻI HOʻO FĀNAÚ MEI HE “MEʻA ʻOKU KOVÍ,” PEA TALI LEVA ʻA E NGAAHI FEHUʻI KO ENÍ:
Ko e hā ʻoku toumoua ai ʻa e niʻihi ke akoʻi ʻenau fānaú fekauʻaki mo e fehokotaki fakasinó?
Ko e hā kuo pau ai ki he ngaahi mātuʻá ke akoʻi ʻenau fānaú “ʻi he akonaki mo e enginaki ʻa Sihová”?—ʻEf. 6:4
Ko e ʻiló ko ha maluʻanga
Ko e hā ʻa e ngaahi meʻa kuo tokonaki mai ʻe he kautaha ʻa Sihová ke tokoni ki he ngaahi mātuʻá ke akoʻi ʻenau fānaú fekauʻaki mo e fehokotaki fakasinó?—w19.05 12, puha
Ko e hā kuo pau ai ke ke talanoa maʻu pē mo hoʻo fānaú ki muʻa ke nau fehangahangai mo ha meʻa mafatukituki?