Maluʻi Hoʻo Nofo Malí

ʻOku vakai ʻa Sihova ki he fuakava malí ko ha meʻa mafatukituki. Naʻá ne folofola kuo pau ki ha husepāniti mo ha uaifi ke na maʻu ha haʻi mālohi. (Māt. 19:5, 6) ʻOku ʻi ai ʻa e ngaahi nofo mali fiefia ʻi he kakai ʻa e ʻOtuá. Kae kehe, ʻoku ʻikai ha nofo mali ia ʻoku haohaoa. ʻE ʻi ai ʻa e ngaahi palopalema. ʻOku ʻikai totonu ke tau maʻu ʻa e vakai anga-maheni ko e mavaé mo e veté ʻa e tali ki he ngaahi palopalema ʻi he nofo malí. ʻOku lava fēfē ke maluʻi ʻe he kau Kalisitiané ʻenau nofo malí?

Fakakaukau ki he ngaahi poini mahuʻinga ʻe nima.

1. Maluʻi ho lotó ʻaki hono talitekeʻi ʻa e ngaahi meʻa hangē ko e fakamalinga mo e fakafiefia taʻetāú, ʻa ia te ne fakavaivaiʻi ha nofo mali.​—Māt. 5:28; 2 Pita 2:14.

2. Fakaivimālohiʻi ho vahaʻangatae mo e ʻOtuá pea fakalahi hoʻo holi ke fakahōifuaʻi ia ʻi ho nofo malí.​—Saame 97:10.

3. Hokohoko atu hono ʻai ʻa e angaʻitangata foʻou. Fai ʻa e fanga kiʻi ngāue anga-ʻofa ʻe ʻai ai ke fiefia ho hoa malí.​—Kol. 3:8-10, 12-14.

4. Tauhi maʻu ʻa e fetuʻutakí ʻi he anga-fakaʻapaʻapa mo mohu ʻuhinga.​—Kol. 4:6.

5. Fakahoko ʻa e ngaahi fiemaʻu fakaefehokotaki fakasinó ʻi he fakaalaala mo e ʻofa.​—1 Kol. 7:3, 4; 10:24.

ʻI he fakaʻapaʻapaʻi ʻe he kau Kalisitiané ʻa e nofo malí ʻoku nau fakalāngilangiʻi ai ʻa e Tokotaha-Fakatupu ʻo e nofo malí, ʻa Sihova.

SIO ʻI HE VITIŌ KUO PAU KE TAU “LELE FAKATAHA MO E KĀTAKI”​—TALANGOFUA KI HE NGAAHI TUʻUTUʻUNI ʻO E FEʻAUHÍ, PEA TALI LEVA ʻA E NGAAHI FEHUʻI KO ENÍ:

• 

  Neongo ʻe kamata lelei ha nofo mali, ka ko e hā nai ʻa e ngaahi pole ʻe malanga haké?

• 

  ʻE lava fēfē ke tokoni ʻa e ngaahi tefitoʻi moʻoni Fakatohitapú ki he faʻahinga ʻoku nau ongoʻi kuo uesia ʻenau nofo malí?

• 

  Ko e hā ʻa e ngaahi lao kuo fokotuʻu ʻe Sihova ki he nofo malí?

• Ke hoko ʻo lavameʻa ʻa e nofo malí ko e hā kuo pau ke fai ʻe he ongo meʻa malí?