MOʻUI KO HA KALISITIANE
Vakai Kiate Koe ʻo Hangē ko e Vakai ʻa Sihová
“ʻOku leleiʻia ʻa Sihova ʻi hono kakaí.” (Saame 149:4) Neongo ʻoku tau taʻehaohaoa, ʻokú ne sio ki hotau ngaahi ʻulungaanga leleí mo ʻetau malavá. Kae kehe, ʻi he taimi ʻe niʻihi, ʻe faingataʻa nai ke tau maʻu ha vakai mafamafatatau pehē kiate kitautolu tonu. Te tau fāinga nai mo ha ongoʻi taʻeʻaonga koeʻuhí ko e anga ʻo e fakafeangai mai ʻa e niʻihi kehé. Pe, kapau ʻoku tau nōfoʻi ʻi he fakakaukau ki he ngaahi fehālaaki ʻi he kuohilí, te tau veiveiua nai pe ʻoku ʻofa moʻoni koā ʻa Sihova ʻiate kitautolu. Ko e hā te ne tokoniʻi kitautolu ʻi heʻetau hokosia ʻa e ngaahi ongoʻi peheé?
Manatuʻi ko Sihova ʻokú ne sio fakalaka atu ʻi he meʻa ʻoku malava ke sio ki ai ʻa e tangatá. (1 Sām. 16:7) ʻOku ʻuhinga iá ʻoku malava ke ne sio fakalaka atu ʻi he meʻa ʻoku lava ke tau sio ki ai ʻiate kitautolú tonu. ʻOku tau fakamālō ʻi hono tokoniʻi kitautolu ʻe he Tohi Tapú ke tau mahinoʻi ʻa e anga ʻo e vakai mai ʻa Sihova kiate kitautolú. ʻE lava ke tau mahinoʻi eni ʻi he taimi ʻoku tau lau ai ʻa e ngaahi konga Tohi Tapú mo e ngaahi fakamatala ʻokú ne fakahaaʻi mai ʻa e lahi ʻo e ʻofa ʻa Sihova ʻi heʻene kau lotú.
SIO ʻI HE VITIŌ FAKATUIPAUʻI HO LOTÓ ʻI HE ʻAO ʻO SIHOVÁ, PEA TALI LEVA ʻA E NGAAHI FEHUʻI KO ENÍ:
Ko e hā ʻoku akoʻi mai ʻe he talanoa fakatātā ʻo ha tokotaha lova mo ʻene tamaí fekauʻaki mo e anga ʻo e vakai mai ʻa Sihova kiate kitautolú?
Kapau ʻoku feinga ha tokotaha faiangahala mamafa ke fakaleleiʻi hono vahaʻangatae mo Sihová, ʻe lava fēfē ke ne fakatuipauʻi hono lotó ʻi he ʻao ʻo Sihová?—1 Sio. 3:19, 20
Naʻe anga-fēfē ʻa e maʻu ʻaonga ʻa e tokouá ʻi heʻene lau mo fakalaulauloto ki he fakamatala fekauʻaki mo Tēvita mo Sihosafaté?