KUPU AKO 17
“Kuó U Ui Kimoutolu ko e Ngaahi Kaumeʻa”
“Kuó u ui kimoutolu ko e ngaahi kaumeʻa, koeʻuhi kuó u fakahaaʻi kiate kimoutolu ʻa e ngaahi meʻa kotoa pē kuó u fanongo ai mei heʻeku Tamaí.”—SIONE 15:15.
HIVA 5 Kalaisi Hotau Faʻifaʻitakiʻangá
ʻI HE KUPÚ NIa
1. ʻOku anga-fēfē hoʻo langa hake ha kaumeʻa vāofi mo ha taha?
KO E anga-mahení, ko e ʻuluaki sitepu ke langa hake ha kaumeʻa vāofi mo ha taha ʻokú ke fetaulaki mo ia ko hono fakamoleki ha taimi mo ia. ʻI hoʻomo fetalanoaʻakí, ʻo vahevahe hoʻomo ngaahi fakakaukaú mo e hokosiá, ʻokú mo hoko ai ʻo kaumeʻa. Neongo ia, ʻi hono langa hake ha kaumeʻa vāofi mo Sīsū, ʻoku tau fehangahangai mo e ngaahi pole. Ko e hā ʻa e niʻihi ʻo kinautolu?
2. Ko e hā ʻa e ʻuluaki pole ʻoku tau fehangahangai mo iá?
2 Ko e ʻuluaki polé kuo teʻeki ai ke tau fetaulaki mo Sīsū. Naʻe fehangahangai ʻa e kau Kalisitiane tokolahi ʻi he ʻuluaki senitulí mo e pole tatau. Ka naʻe pehē ʻe Pita: “Neongo naʻe ʻikai ʻaupito te mou sio kiate ia, ʻoku mou ʻofa ʻiate ia. Neongo ʻoku ʻikai te mou mātā ia he taimí ni, ka ʻoku mou ngāueʻi ʻa e tui kiate ia.” (1 Pita 1:8) Ko ia ʻoku malava ke maʻu ha vahaʻangatae vāofi mo Sīsū neongo kuo teʻeki ke tau fetaulaki mo ia.
3. Ko e hā ʻa e pole hono ua ʻoku tau fehangahangai mo iá?
3 Ko e pole hono uá ʻoku ʻikai malava ke tau lea kia Sīsū. ʻI heʻetau lotú, ʻoku tau talanoa ai kia Sihova. Ko e moʻoni, ʻoku tau lotu ʻi he huafa ʻo Sīsuú, ka ʻoku ʻikai ke tau talanoa fakahangatonu kiate ia. Ko hono moʻoní, ʻoku ʻikai ke loto ʻa Sīsū ke tau lotu ange kiate ia. Ko e hā hono ʻuhingá? Koeʻuhi ko e lotú ʻoku totonu ke fai kia Sihova toko taha pē. (Māt. 4:10) Neongo ia, ʻe lava ke tau fakahāhā ʻetau ʻofa kia Sīsuú.
4. Ko e hā ʻa e pole hono tolú, pea ko e hā te tau lāulea ki ai ʻi he kupu ko ení?
4 Ko e pole hono tolú ʻoku nofo ʻa Sīsū ia ʻi hēvani, ko ia heʻikai lava ke tau fakamoleki ha taimi mo ia. Ka ʻe lava ke tau kei ʻiloʻi ʻa e meʻa lahi fekauʻaki mo Sīsū ʻo ʻikai ke ʻi ai tonu mo ia. Te tau sivisiviʻi ʻa e meʻa ʻe fā ʻe lava ke tau fai ke fakaivimālohiʻi ai ʻetau kaumeʻa mo iá. Neongo iá, tau ʻuluaki sivisiviʻi angé ʻa e ʻuhinga ʻoku mātuʻaki mahuʻinga ai ke tau langa hake ha kaumeʻa vāofi mo Kalaisí.
KO E HĀ ʻOKU FIEMAʻU AI KE TAU KAUMEʻA MO SĪSŪ?
5. Ko e hā kuo pau ai ke tau kaumeʻa mo Sīsuú? (Sio foki ki he puha “Kaumeʻa mo Sīsuú ʻOku Taki Atu ki he Kaumeʻa mo Sihova” mo e “Vakai Mafamafatatau ki he Ngafa ʻo Sīsuú.”)
5 Kuo pau ke tau hoko ko e kaumeʻa ʻo Sīsū kapau ʻoku tau loto ke maʻu ha vahaʻangatae lelei mo Sihova. Ko e hā ʻoku moʻoni ai iá? Fakakaukau ki ha ʻuhinga ʻe ua. ʻUluakí, naʻe tala ʻe Sīsū ki heʻene kau ākongá: “Ko e Tamaí tonu ʻokú ne ʻofa ʻiate kimoutolu, koeʻuhi kuo mou ʻofa ʻiate au.” (Sione 16:27) Naʻá ne toe pehē: “ʻOku ʻikai haʻu ha taha ki he Tamaí ka ʻi heʻene fou pē ʻiate au.” (Sione 14:6) Ko e feinga ke kaumeʻa mo Sihova ʻo ʻikai ke langa hake ha kaumeʻa vāofi mo Sīsuú ʻoku hangē ia ko e feinga ke hū ki ha fale ʻo ʻikai fou ʻi he matapaá. Naʻe ngāueʻaki ʻe Sīsū ha talanoa fakatātā meimei tatau ʻi heʻene fakamatalaʻi ʻa ia tonu ko e “matapā ki he fanga sipí.” (Sione 10:7) Ko e ʻuhinga hono uá ʻoku tapua haohaoa atu ʻe Sīsū ʻa e ngaahi ʻulungaanga ʻene Tamaí. Naʻá ne tala ange ki heʻene kau ākongá: “ʻIlonga ʻa ia kuó ne mātā aú kuó ne mātā foki ʻa e Tamaí.” (Sione 14:9) Ko ia ko ha founga mahuʻinga ke tau hoko ai ʻo ʻiloʻi ʻa Sihová ko e ako fekauʻaki mo e moʻui ʻa Sīsuú. ʻI heʻetau ako fekauʻaki mo Sīsuú, ʻe tupulaki ʻetau ʻofa kiate iá. Pea ʻi he lahi ange ʻetau ʻofa kia Sīsuú, ko e toe lahi ange ia ʻetau ʻofa ki heʻene Tamaí.
6. Ko e hā ʻa e ʻuhinga ʻe taha kuo pau ai ke tau maʻu ha vahaʻangatae mo Sīsū? Fakamatalaʻi.
6 Kuo pau ke tau maʻu ha vahaʻangatae mo Sīsū kae lava ke tali ʻetau ngaahi lotú. ʻOku ʻuhinga eni ke tau fai ʻa e meʻa lahi ange ʻi he leaʻaki pē ʻa e kupuʻi lea “ʻi he huafa ʻo Sīsū” ʻi heʻetau ngaahi lotu anga-mahení. Kuo pau ke tau ʻiloʻi ʻa e founga ʻoku ngāueʻaki ai ʻe Sihova ʻa Sīsū ʻi hono tali ʻetau ngaahi lotú. Naʻe tala ange ʻe Sīsū ki heʻene kau ʻapositoló: “ʻIlonga ha meʻa te mou kole ʻi hoku hingoá, te u fai eni.” (Sione 14:13) Neongo ko Sihova ʻa e tokotaha ʻokú ne fanongo mo tali ʻetau ngaahi lotú, kuó ne ʻoange ʻa e mafai kia Sīsū ke fakahoko ʻEne ngaahi filí. (Māt. 28:18) Ko ia, ki muʻa ke tali ʻe he ʻOtuá ʻetau ngaahi lotú, ʻokú ne sio pe kuo tau ngāueʻaki ʻa e faleʻi ʻa Sīsuú. Ko e fakatātaá, naʻe pehē ʻe Sīsū: “Kapau te mou fakamolemoleʻi ʻa e faihala ʻa e kakaí, ʻe fakamolemoleʻi foki kimoutolu ʻe hoʻomou Tamai fakahēvaní; he kapau ʻe ʻikai ke mou fakamolemoleʻi ʻa e faihala ʻa e kakaí, ʻe ʻikai foki ke fakamolemoleʻi ʻe hoʻomou Tamaí ʻa hoʻomou faihalá.” (Māt. 6:14, 15) He mahuʻinga leva ē ke tau fakafeangai ki he niʻihi kehé ʻi he anga-lelei ʻo hangē ko e fakafeangai mai ʻa Sihova mo Sīsū!
7. Ko hai ʻoku maʻu ʻaonga mei he feilaulau huhuʻi ʻa Sīsū?
7 Ko e faʻahinga pē ʻoku kaumeʻa vāofi mo Sīsuú te nau maʻu ʻaonga mei heʻene feilaulau huhuʻí. ʻOku anga-fēfē ʻetau ʻiloʻi iá? Naʻe pehē ʻe Sīsū te ne tuku atu “ʻene moʻuí maʻa hono ngaahi kaumeʻá.” (Sione 15:13) Ko e kakai faitōnunga naʻa nau moʻui ki muʻa ke haʻu ʻa Sīsū ki he māmaní ʻe fiemaʻu ke nau ako fekauʻaki mo ia pea hoko ʻo ʻofa kiate ia. Ko e kau tangata mo e kau fefine hangē ko ʻĒpalahame, Sela, Mōsese mo Lēhapi te nau toetuʻu, ka naʻa mo e kau sevāniti māʻoniʻoni ko eni ʻa Sihová ʻe fiemaʻu ke nau langa hake ha kaumeʻa mo Sīsū kae lava ke nau maʻu ʻa e moʻui taʻengatá.—Sione 17:3; Ngā. 24:15; Hep. 11:8-12, 24-26, 31.
8-9. Hangē ko ia ʻoku fakamatalaʻi ʻi he Sione 15:4, 5, ko e hā ʻoku lava ke tau fai koeʻuhi ko hotau vahaʻangatae mo Sīsuú, pea ko e hā ʻoku mahuʻinga ai iá?
8 ʻOku tau fiefia ʻi he ngāue fakataha mo Sīsū ʻi he ngāue fakamalangá mo hono akoʻi ʻa e ongoongo lelei ʻo e Puleʻangá. ʻI he ʻi māmani ʻa Sīsuú, naʻá ne hoko ko ha faiako. Pea talu ʻene foki ki hēvaní, ko Sīsū, ʻa e ʻulu ʻo e fakatahaʻangá, kuó ne hokohoko atu ke tataki ʻa e ngāue fakamalangá mo e faiakó. ʻOkú ne vakai hifo mo houngaʻia ʻi hoʻo ngaahi feinga ke tokoniʻi ʻa e tokolahi taha ʻe ala lavá ke hoko ʻo ʻiloʻi ia mo ʻene Tamaí. Ko hono moʻoní, ko e founga pē ʻoku lava ke tau fakahoko ai ʻa e ngāue ko ení ko e tokoni ʻa Sihova mo Sīsuú.—Lau ʻa e Sione 15:4, 5.
9 ʻOku akoʻi māʻalaʻala mai ʻe he Folofolá kuo pau ke tau maʻu ʻa e ʻofa kia Sīsū pea tauhi maʻu ia kae lava ke tau fakahōifuaʻi ʻa Sihova. Ko ia tau lāulea angé ki he meʻa ʻe fā ʻe lava ke tau fai ke hoko ai ko ha kaumeʻa ʻo Sīsū.
FOUNGA HONO LANGA HAKE HA KAUMEʻA MO SĪSŪ
ʻE lava ke ke hoko ko e kaumeʻa ʻo Sīsū ʻaki ʻa e (1) hoko ʻo ʻiloʻi lelei ange ia, (2) faʻifaʻitaki ki he anga ʻene fakakaukaú mo e tōʻongá, (3) poupou ki he fanga tokoua ʻo Kalaisí mo e (4) poupou ki he fokotuʻutuʻu ʻa e fakatahaʻangá (Sio ki he palakalafi 10-14)b
10. Ko e hā ʻa e ʻuluaki sitepu ki heʻetau langa hake ha kaumeʻa mo Sīsū?
10 (1) Hoko ʻo ʻiloʻi ʻa Sīsū. ʻE lava ke tau fai eni ʻaki hono lau ʻa e tohi ʻa Mātiu, Maʻake, Luke mo Sione. ʻI heʻetau fakalaulauloto ki he ngaahi fakamatala Fakatohitapu fekauʻaki mo e moʻui ʻa Sīsuú, te tau hoko ai ʻo ʻofa mo fakaʻapaʻapaʻi ʻa Sīsū koeʻuhi ko ʻene fakafeangai anga-lelei ki he kakaí. Ko e fakatātaá, neongo ko ia honau ʻEikí, naʻe ʻikai ke ne fakafeangai ki heʻene kau ākongá ʻo hangē ha kau tamaioʻeikí. Neongo ia, naʻá ne fakahaaʻi ʻene ngaahi fakakaukau mo e ongoʻi lolotó kiate kinautolu. (Sione 15:15) Naʻe kaungāmamahi ʻa Sīsū mo kinautolu pea tangi mo kinautolu. (Sione 11:32-36) Naʻa mo hono kau fakafepakí naʻa nau ʻiloʻi naʻá ne hoko ko ha kaumeʻa ʻo e faʻahinga naʻa nau tali ʻene pōpoakí. (Māt. 11:19) ʻI heʻetau faʻifaʻitaki ki he anga ʻo e fakafeangai ʻa Sīsū ki heʻene kau ākongá, ko hotau vahaʻangatae mo e niʻihi kehé ʻe lelei ange, te tau ongoʻi fiemālie mo fiefia ange, pea ʻe tupulaki ʻetau houngaʻia ʻia Kalaisí.
11. Ko e hā ʻa e sitepu hono ua ke hoko ai ko e kaumeʻa ʻo Sīsuú, pea ko e hā ʻoku mahuʻinga aí?
11 (2) Faʻifaʻitaki ki he anga ʻo e fakakaukau mo e tōʻonga ʻa Sīsū. Ko e lelei ange ʻetau ʻiloʻi mo faʻifaʻitaki ki he anga ʻene fakakaukaú, ko e vāofi ange ia ʻetau kaumeʻa mo iá. (1 Kol. 2:16) ʻE lava fēfē ke tau faʻifaʻitaki kia Sīsū? Fakakaukau ki ha faʻifaʻitakiʻanga ʻe taha. Naʻe fakakaukau lahi ange ʻa Sīsū ki hono tokoniʻi ʻa e niʻihi kehé ʻi hono fakahōhōʻiaʻi ʻa ia tonú. (Māt. 20:28; Loma 15:1-3) Koeʻuhi ko ʻene maʻu ʻa e fakakaukau fakaeʻatamai ko ení, naʻá ne feilaulauʻi-kita mo faʻa fakamolemole. Naʻe ʻikai ke ne ʻitangofua ʻi he meʻa naʻe leaʻaki ʻe he kakaí fekauʻaki mo iá. (Sione 1:46, 47) Pea naʻe ʻikai ke ne tukulotoa ʻa e fehālaaki ʻa e kakaí ʻi he kuohilí ke uesia ai ʻene vakai kiate kinautolú. (1 Tīm. 1:12-14) Naʻe pehē ʻe Sīsū: “Ko e meʻa eni ʻe ʻilo ai ʻe he faʻahinga kotoa ko ʻeku kau ākonga kimoutolú—ʻo kapau ʻoku mou maʻu ʻa e ʻofá ʻi homou lotolotongá.” (Sione 13:35) Fēfē ke ke ʻeke hifo, “ʻOku ou muimui ki he faʻifaʻitakiʻanga ʻa Sīsuú ʻaki hono fai ʻa e meʻa kotoa ʻoku ou malavá ke tauhi maʻu ʻa e melino mo hoku fanga tokouá?”
12. Ko e hā ʻa e sitepu hono tolu ke hoko ai ko e kaumeʻa ʻo Sīsuú, pea ʻe lava fēfē ke tau fou ai?
12 (3) Poupou ki he fanga tokoua ʻo Kalaisí. ʻOku vakai ʻa Sīsū ki he meʻa ʻoku tau fai maʻa hono fanga tokoua paní ʻo hangē ʻoku tau fai ange ia kiate iá. (Māt. 25:34-40) Ko e founga tefito ʻetau poupou ki he kau paní ko e kau kakato ki hono malangaʻi ʻo e Puleʻangá mo e ngāue ngaohi ākonga ʻa ia naʻe fakahinohino ʻe Sīsū ki hono kau muimuí ke nau faí. (Māt. 28:19, 20; Ngā. 10:42) ʻI he tokoni pē ʻa e ‘fanga sipi kehé’ ʻoku lava ai ʻa e fanga tokoua ʻo Kalaisí ke fakahoko ʻa e ngāue fakamalanga lahi he taimí ni ʻi he māmaní. (Sione 10:16) Kapau ʻokú ke kau ʻi he fanga sipi kehé, ko e taimi taki taha ʻokú ke kau ai ʻi he ngāue ko ení, ʻokú ke fakahaaʻi ai hoʻo ʻofa ki he kau paní pehē foki kia Sīsū.
13. ʻOku lava fēfē ke tau ngāueʻaki ʻa e akonaki ʻa Sīsū ʻi he Luke 16:9?
13 ʻOku tau toe hoko ko e kaumeʻa ʻo Sihova mo Sīsū ʻaki ʻetau ngāueʻaki ʻetau paʻangá ke poupou ki he ngāue ʻokú na tatakí. (Lau ʻa e Luke 16:9.) Ko e fakatātaá, ʻe lava ke tau tokoni ki he ngāue ʻi māmani lahí, ʻa ia ʻoku kau ai hono fakapaʻanga ʻa e malangaʻi ʻo e ongoongo leleí ʻi he ngaahi feituʻu tuʻu mavahé, langa mo tauhi ʻa e ngaahi fale ʻoku poupou ki he lotu moʻoní, pea tokonaki ʻa e tokoni fakamatelie ki he faʻahinga ʻi ha fakatamaki. ʻE lava foki ke tau poupou fakapaʻanga ki heʻetau fakatahaʻangá tonu pea tokoniʻi ʻa e faʻahinga ʻoku tau ʻiloʻi ʻoku nau fiemaʻu tokoní. (Pal. 19:17) Ko e ngaahi founga eni ʻoku lava ke tau poupou ai ki he fanga tokoua ʻo Kalaisí.
14. Hangē ko ia ʻi he ʻEfesō 4:15, 16, ko e hā ʻa e sitepu hono fā ki he hoko ko e kaumeʻa ʻo Sīsuú?
14 (4) Poupou ki he fokotuʻutuʻu ʻa e fakatahaʻanga Kalisitiané. ʻOku tau fakaivimālohiʻi ʻetau kaumeʻa mo Sīsū ko e ʻulu ʻo e fakatahaʻangá ʻi he taimi ʻoku tau ngāue fakataha ai mo e faʻahinga kuo fakanofo ke tokangaʻi kitautolú. (Lau ʻa e ʻEfesō 4:15, 16.) Ko e fakatātaá, ʻoku tau feinga he taimí ni ke fakapapauʻi ko e kotoa ʻo e ngaahi Fale Fakatahaʻangá ʻoku ngāue ʻaonga kakato ʻaki. Ke fakahoko ení, kuo fakatahaʻi ʻa e ngaahi fakatahaʻanga ʻe niʻihi pea liliu mo e ngaahi feituʻu ngāué. Ko e fokotuʻutuʻu ko ení kuo fakahaofi ai ʻa e paʻanga lahi. Kae kehe, ʻi he taimi tatau, kuo fiemaʻu ki he kau malanga ʻe niʻihi ke nau feʻunuʻaki ki he ngaahi tuʻunga foʻou. Ko e kau malanga faitōnunga ko iá kuo nau ngāue nai ʻi ha fakatahaʻanga ʻi he laui taʻu pea kuo nau vāofi mo e fanga tokoua mo e fanga tuofāfine ʻi aí. Ka ko eni kuo kole ange ke nau hiki ki ha fakatahaʻanga kehe. Kuo pau pē naʻe fiefia ʻa Sīsū ʻi he vakai hifo ki he kau ākonga mateaki ko ení ʻoku nau poupou ki he fokotuʻutuʻu ko ení!
KAUMEʻA MO SĪSŪ ʻO TAʻENGATA
15. ʻE anga-fēfē ʻa e lelei ange ʻetau kaumeʻa mo Sīsuú ʻi he kahaʻú?
15 Ko e faʻahinga ʻoku pani ʻaki ʻa e laumālie māʻoniʻoní ʻoku nau maʻu ʻa e ʻamanaki ʻo e ʻi ai mo Sīsū ʻo taʻengata pea kaungāʻea mo ia ʻi he Puleʻanga ʻo e ʻOtuá. Ko hono moʻoní te nau ʻi ai mo Kalaisi—sio kiate ia, talanoa mo ia pea fakamoleki ʻa e taimi mo ia. (Sione 14:2, 3) Ko e faʻahinga ʻoku nau maʻu ʻa e ʻamanaki ke moʻui ʻi he māmaní te nau maʻu foki ʻa e ʻofa mo e tokanga ʻa Sīsuú. Neongo heʻikai ke nau sio kia Sīsū, ko honau vahaʻangatae mo iá ʻe tupu ke toe mālohi ange ʻi heʻenau fiefia ʻi he moʻui naʻe talaʻofa ʻe Sihova mo Sīsū maʻanautolú.—ʻAi. 9:6, 7.
16. Ko e hā ʻa e ngaahi tāpuaki ʻoku tau maʻu mei heʻetau kaumeʻa mo Sīsuú?
16 ʻI heʻetau tali ʻa e fakaafe ʻa Sīsū ke hoko ko hono kaumeʻá, ʻoku tau maʻu ai ʻa e ngaahi tāpuaki lahi. Ko e fakatātaá, ʻoku tau maʻu ʻaonga mei heʻene ʻofá mo e poupoú he taimí ni. ʻOku tau maʻu ʻa e faingamālie ke moʻui taʻengata. Pea ko e mahuʻinga tahá, ko ʻetau kaumeʻa mo Sīsuú ʻe taki atu ia ki he koloa lelei tahá—ko ha vahaʻangatae fakafoʻituitui vāofi mo e Tamai ʻa Sīsuú, ʻa Sihova. Ko ha monū moʻoni ē ke ui ko e kaumeʻa ʻo Sīsū!
HIVA 25 Fakamoʻoni e Tuʻunga Ākongá
a ʻI he ngaahi taʻu naʻe talanoa mo ngāue fakataha ʻa e kau ʻapositoló mo Sīsū, pea nau hoko ko e ngaahi kaumeʻa lelei. ʻOku loto foki ʻa Sīsū ke tau hoko ko hono kaumeʻa, ka ʻoku tau fehangahangai mo e ngaahi pole naʻe ʻikai ke fehangahangai ʻa e kau ʻapositoló mo ia. ʻE lāulea ʻa e kupu ko ení ki he niʻihi ʻo e ngaahi pole ko iá pea ʻomai ai mo e ngaahi fokotuʻu ki he founga ʻe lava ke tau langa hake ai mo tauhi maʻu ha kaumeʻa vāofi mo Sīsū.
b FAKAMATALA ʻO E FAKATĀTĀ: (1) ʻI he lotu fakafāmilí, ʻe lava ke tau ako ai fekauʻaki mo e moʻui mo e ngāue fakafaifekau ʻa Sīsuú. (2) ʻI he fakatahaʻangá, ʻe lava ke tau tuli ki he melino mo hotau fanga tokouá. (3) ʻI heʻetau kau kakato ʻi he ngāue fakafaifekaú, ʻoku tau poupou ai ki he fanga tokoua ʻo Kalaisí. (4) ʻI hono fakatahaʻi ʻa e ngaahi fakatahaʻangá, ʻe lava ke tau ngāue fakataha mo e kau mātuʻá.