ʻOku Tataki ʻe Sihova ʻEne Kautahá

1. Ko e hā kuo pau ke hanganaki fai ʻe he kau Kalisitiane ʻosi papitaisó?

KUÓ KE ʻosi papitaiso? Kapau ko ia, kuó ke talaki fakahāhā hoʻo tui kia Sihová pea mo hoʻo loto-lelei ke ngāue fakataha mo ʻene kautahá.b Ko e moʻoni, ko hoʻo tui kia Sihová kuo pau ke tupulaki ai pē. Pea ʻoku fiemaʻu ke ke hanganaki langa hake hoʻo tuipau ʻoku tataki ʻe Sihova ʻene kautahá ʻi he ʻahó ni.

2-3. ʻI he founga fē ʻoku tataki ai ʻe Sihova ʻene kautahá? ʻOmai ha fakatātā.

² ʻI he ʻahó ni, ʻoku tataki ʻe Sihova ʻene kautahá ʻi ha founga ʻoku tapua mai ai hono ʻulungāngá, taumuʻá mo ʻene ngaahi tuʻungá. Tau lāulea angé ki ha ʻulungaanga ʻe tolu ʻo Sihova ʻoku tapua mai ʻi heʻene kautahá.

³ ʻUluakí, “ʻoku ʻikai ke filifilimānako ʻa e ʻOtuá.” (Ngā. 10:34) Ko e ʻofá naʻá ne ueʻi ʻa Sihova ke ne foaki mai ʻa hono ʻAló ko ha “huhuʻi . . . maʻá e faʻahinga kotoa pē.” (1 Tīm. 2:6; Sione 3:16) ʻOku ngāueʻaki ʻe Sihova ʻene kakaí ke malangaʻi ʻa e ongoongo leleí ki he faʻahinga kotoa te nau fie fanongó, ʻo tokoniʻi ai ʻa e tokolahi taha ʻe ala lavá ke maʻu ʻaonga mei he huhuʻí. Uá, ko Sihova ko ha ʻOtua ʻo e maau mo e melino. (1 Kol. 14:33, 40) Ko ia ai, ʻoku totonu ke tau ʻamanekina ko ʻene kau lotú ʻoku nau tauhi kiate ia ko ha kulupu fokotuʻutuʻu maau mo melino. Tolú, ko Sihova ʻa e “Faiako Maʻongoʻongá.” (ʻAi. 30:20, 21) Ko e ʻuhinga ia ʻoku tokangataha ai ʻene kautahá ki hono akoʻi ʻene Folofola fakamānavaʻí, ʻi he fakatahaʻangá mo e ngāue fakamalangá. Naʻe anga-fēfē hoko ʻo hā mahino ʻa e ʻulungaanga ʻe tolu ko ia ʻo Sihová ʻi he muʻaki fakatahaʻanga Kalisitiané? ʻOku anga-fēfē hono fakahaaʻi ia ʻi onopōní? Pea ʻe lava fēfē ke tokoniʻi koe ʻe he laumālie māʻoniʻoní ʻi hoʻo ngāue fakataha mo e kautaha ʻa Sihová ʻi he ʻaho ní?

ʻOKU ʻIKAI FILIFILIMĀNAKO ʻA E ʻOTUÁ

4. ʻI he Ngāue 1:8, ko e hā naʻe fekauʻi ʻe Sīsū hono kau muimuí ke faí, pea ko e hā ʻa e tokoni te nau maʻú?

⁴ ʻI he ʻuluaki senitulí. Ko e pōpoaki naʻe malangaʻi ʻe Sīsuú naʻe ʻoatu ai ʻa e ʻamanaki ki he faʻahinga kotoa ʻo e tangatá. (Luke 4:43) Naʻá ne fekauʻi hono kau muimuí ke nau hoko atu ʻa e ngāue naʻá ne kamataʻí, ke faifakamoʻoni “ki he feituʻu taupotu taha ʻo e māmaní.” (Lau ʻa e Ngāue 1:8.) Ko e moʻoni, heʻikai malava ke nau fai ʻa e ngāue ko ení ʻaki pē honau mālohí tonu. Te nau fiemaʻu ʻa e laumālie māʻoniʻoní​—“ko e tokoní” ʻa ia naʻe talaʻofa ʻe Sīsū kiate kinautolú.​—Sione 14:26; Sāk. 4:6.

5-6. ʻI he ngaahi founga fē naʻe tokoniʻi ai ʻe he laumālie māʻoniʻoní ʻa e kau muimui ʻo Sīsuú?

⁵ Naʻe maʻu ʻe he kau muimui ʻo Sīsuú ʻa e laumālie māʻoniʻoní ʻi he Penitekosi 33 T.S. ʻI he tokoni ʻa e laumālie ko iá, naʻa nau kamata malanga leva, pea ʻi ha taimi nounou naʻe tali ʻe he laui afe ʻa e ongoongo leleí. (Ngā. 2:41; 4:4) ʻI he malanga hake ʻa e fakafepakí, naʻe ʻikai ke ikuʻi ʻe he manavaheé ʻa e kau ākongá ka naʻa nau hanga ki he ʻOtuá ki ha tokoni. Naʻa nau lotu: “Tuku ki hoʻo kau tamaioʻeikí ke nau hanganaki lea loto-toʻa ʻaki ʻa hoʻo folofolá.” Naʻe fakafonu leva kinautolu ʻaki ʻa e laumālie māʻoniʻoní pea naʻa nau hanganaki “lea loto-toʻa ʻaki ʻa e folofola ʻa e ʻOtuá.”​—Ngā. 4:18-20, 29, 31.

⁶ Naʻe toe fehangahangai ʻa e kau ākonga ʻa Sīsuú mo ha ngaahi pole. Ko e fakatātaá, naʻe ʻikai loko lahi ʻa e ngaahi tatau ʻo e Folofolá. Naʻe ʻikai ke nau maʻu ʻa e ʻū tohi tokoni fakaeako Tohi Tapu ʻoku tau maʻu he ʻaho ní. Pea naʻe pau ke malanga ʻa e kau ākongá ki he kakai naʻa nau lea ʻi he ngaahi lea kehekehe. Neongo ʻa e ngaahi pole kotoa ko iá, naʻe fai ʻe he kau ākonga faivelenga ko iá ha meʻa naʻe hā ngali taʻemalava​—ʻi he ngaahi hongofuluʻi taʻu siʻi pē, naʻa nau malangaʻi ʻa e ongoongo leleí ki he “meʻa fakatupu kotoa pē ʻi he lalo langí.”​—Kol. 1:6, 23.

7. ʻI he taʻu ʻe 100 tupu kuo maliu atú, naʻe anga-fēfē hono ʻiloʻi ʻe he kau sevāniti ʻa Sihová ʻa e meʻa ʻoku fiemaʻu ʻe he ʻOtuá meia kinautolú, pea naʻe anga-fēfē ʻenau talí?

⁷ ʻI onopooni. ʻOku hokohoko atu hono tataki mo fakaivia ʻe Sihova ʻene kakaí. Ko e moʻoni, ko e lahi taha ʻo ʻene tatakí ʻoku fakafou mai ia ʻi he Folofola fakamānavaʻi ʻe he laumālie ʻo e ʻOtuá. ʻOku tau maʻu ai ʻa e fakamatala fekauʻaki mo e ngāue fakafaifekau ʻa Sīsuú mo ʻene fekau ki hono kau muimuí ke nau hoko atu ʻa e ngāue naʻá ne kamataʻí. (Māt. 28:19, 20) ʻI he makasini ʻo Siulai 1881, naʻe pehē ai: “Naʻe ʻikai ke ui pe pani kimautolu ke maʻu ha lāngilangi pe maʻu ha koloa lahi, ka ke foaki atu kimautolu mo ʻemau koloá kotoa ke malangaʻi ʻa e ongoongo leleí.” Naʻe pehē ʻi he kiʻi tohi To Whom the Work Is Entrusted, naʻe pulusi ʻi he 1919: “Naʻe hā ngali lahi fakaʻulia ʻa e ngāué, ka ko e ngāue ia ʻa e ʻEikí, pea ʻi hono mālohí te tau fakahoko ia.” ʻIo, hangē ko e muʻaki kau Kalisitiané, ko e fanga tokoua ko ení naʻa nau foaki loto-toʻa atu kinautolu ʻi he ngāué, ʻo tuipau ʻe tokoniʻi kinautolu ʻe he laumālie māʻoniʻoní ke malanga ki he faʻahinga kakai kotoa pē. ʻOku tau maʻu foki ʻa e tuipau tatau he ʻahó ni.

8-9. Ko e hā ʻa e ngaahi founga kuo ngāueʻaki ʻe he kautaha ʻa Sihová ke fakalahi ʻa e ngāue fakamalangá?

⁸ Kuo ngāueʻaki ʻe he kautaha ʻa Sihová ʻa e ngaahi meʻangāue lelei taha ʻoku ala maʻú ke fakamafola ʻa e ongoongo leleí. Kuo kau ki heni ʻa e ʻū tohi kuo pulusi, “Tulama-ʻAta ʻo e Fakatupú,” kalamafoní, kā mo e meʻa fakaleʻolahí, fakamafola letiō pea ki muí ni mai ko e komipiutá mo e ʻInitanetí. ʻOku toe fakahoko foki ʻe he kautaha ʻa e ʻOtuá ʻa e ngāue liliu-lea lahi taha ʻi he hisitōliá! Ko e hā hono ʻuhingá? Koeʻuhi ke fanongo ʻa e faʻahinga kakai kotoa pē ki he ongoongo leleí ʻi heʻenau leá tonu. ʻOku ʻikai ke filifilimānako ʻa Sihova; naʻá ne tomuʻa tala ko e ongoongo leleí ʻe talaki ia “ki he puleʻanga mo e matakali mo e lea mo e kakai kotoa pē.” (Fkh. 14:6, 7) ʻOkú ne finangalo ke aʻu ʻa e pōpoaki ʻo e Puleʻangá ki he tokotaha kotoa.

⁹ Kae fēfē ʻa e faʻahinga ʻoku faingataʻa ke aʻu ki aí, mahalo ʻoku nau nofo ʻi he ngaahi nofoʻanga ʻoku leʻohi pe ʻā malu? Koeʻuhi ke aʻu ki he kakai ko ení, naʻe ngāueʻaki ʻe he kautaha ʻa Sihová ʻa e founga kehekehe ʻo e faifakamoʻoni ki he kakaí. Ko e fakatātaá, ʻi he 2001, naʻe tali ʻe he Kulupu Pulé ke ngāueʻaki ʻa e papa tuʻuaki tohí mo e founga tuʻuaki kehe ʻi Falanisē pea pehē ki ha ngaahi feituʻu kehe ki mui ai. Naʻe ola lelei ia. ʻI he 2011 naʻe kamataʻi ai ha polokalama ʻi ʻAmelika ʻi ha feituʻu moʻumoʻua ʻi he Kolo Niu ʻIoké. ʻI he ʻuluaki taʻú, ko e tohi ʻe 102,129 mo e makasini ʻe 68,911 naʻe tufakí. Pea naʻe kole ʻe he kakai ʻe toko 4,701 ke nau ako Tohi Tapu! ʻOku hā mahino, ko e laumālie māʻoniʻoní naʻá ne poupouʻi ʻa e ngāue ko ení. Ko ia naʻe tali ʻe he Kulupu Pulé ke ngāueʻaki ʻa e papa tuʻuaki tohí ʻi māmani lahi.

10. Ko e hā ʻe lava ke tau fai ke fakaleleiʻi ai ʻetau ngāue fakafaifekaú?

¹⁰ Meʻa ʻe lava ke ke faí. Ngāuekakatoʻaki ʻa e ako ʻoku tokonaki mai ʻe Sihova ʻi he ngaahi fakatahá. Ngāue maʻu pē mo hoʻo kulupu ngāue fakamalangá. ʻE lava ke ke maʻu mei ai ʻa e tokoni fakafoʻituitui, pehē foki ki he fakalototoʻa mei he faʻifaʻitakiʻanga lelei ʻa e niʻihi kehé. Kītaki ʻi he ngāue fakafaifekaú. Hangē ko ia ʻoku fakamanatu mai ʻi he konga tohi ʻo e kaveingá, ʻoku tau fakahoko ʻa e finangalo ʻo e ʻOtuá, ʻo ʻikai ʻi hotau mālohí tonu, ka ʻi he laumālie māʻoniʻoní. (Sāk. 4:6) He ko ē, ʻoku tau fai ʻa e ngāue ʻa e ʻOtuá.

SIHOVA KO HA ʻOTUA ʻO E MAAU MO E MELINO

11. Naʻe anga-fēfē ʻa e ngāue fāʻūtaha ʻa e kulupu pule ʻi he ʻuluaki senitulí ke tauhi maʻu ʻa e maau ʻi he kakai ʻa e ʻOtuá?

¹¹ ʻI he ʻuluaki senitulí. Naʻe ngāue fāʻūtaha ʻa e kulupu pule ʻi Selusalemá ke tauhi maʻu ʻa e maau mo e melino ʻi he kakai ʻa e ʻOtuá. (Ngā. 2:42) Ko e fakatātaá, ʻi he malanga hake ʻa e ʻīsiu fekauʻaki mo e kamú ʻi he 49 T.S. nai, naʻe vakaiʻi ʻe he kulupu pulé ʻa e meʻá ni ʻi he tataki ʻa e laumālie māʻoniʻoní. Kapau naʻe māvahevahe ai pē ʻa e fakatahaʻangá ʻi he ʻīsiu ko ení, naʻe mei taʻofi ai ʻa e ngāue fakamalangá. Neongo ko e kau ʻapositoló mo e kau mātuʻá ko e kau Siu, naʻe ʻikai ke tākiekina kinautolu ʻe he talatukufakaholo faka-Siú pe ko e faʻahinga naʻa nau pouaki fefeka iá. Ka naʻa nau hanga ki he Folofola ʻa e ʻOtuá mo hono laumālié ki ha tataki. (Ngā. 15:1, 2, 5-20, 28) Ko e hā ʻa e olá? Naʻe tāpuakiʻi ʻe Sihova ʻenau filí, tauhi maʻu ʻa e melinó mo e fāʻūtahá, pea laka ki muʻa ʻa e ngāue fakamalangá.​—Ngā. 15:30, 31; 16:4, 5.

12. ʻOku anga-fēfē hono fakahaaʻi ʻoku maau mo melino ʻa e kautaha ʻa Sihová ʻi he ʻaho ní?

¹² ʻI onopooni. Kuo ngāue ʻa e kautaha ʻa Sihová ke tauhi maʻu ʻa e maau mo e melino ʻi he kakai ʻa Sihová. ʻI he ʻīsiu ʻo e Zion’s Watch Tower and Herald of Christ’s Presence ʻo Nōvema 15, 1895, naʻe ʻi ai ha kupu ai naʻe fakakaveinga “Tuʻunga Taau mo Maau,” ʻo makatuʻunga ʻi he 1 Kolinitō 14:40. Naʻe pehē ʻi he kupú: “Naʻe lahi ʻa e meʻa naʻe tala ange ʻe he kau ʻapositoló ki he muʻaki Siasí fekauʻaki mo e māú . . . ʻOku mahuʻinga ke hokohoko atu ʻa e muimui kakato ‘ki he ngaahi meʻa naʻe tohi ʻi muʻa ko hotau fakahinohinó.’” (Loma 15:4) ʻIo, ko e maau mo e melino tatau pē ko ia naʻe fakaʻilongaʻiʻaki ʻa e muʻaki kau Kalisitiané ʻoku hā mahino ʻi he kautaha ʻa Sihová ʻi he ʻaho ní. Ko e fakatātaá: Kapau te ke maʻu ha Ako Taua Leʻo ʻi ha fakatahaʻanga ʻe taha​—naʻa mo ha fonua kehe​—ʻokú ke ʻiloʻi ʻa e founga ʻe fakahoko ai ʻa e akó mo e kupu ʻe fai ai ʻa e lāuleá. Te ke ongoʻi fiemālie pē. Ko e laumālie pē ʻo e ʻOtuá ʻe lava ke ne ʻai ke malava ʻa e fāʻūtaha makehe ko ení!​—Sēf. 3:9, fkm. ʻi lalo.

13. ʻI he fakakaukau ki he Sēmisi 3:17, ko e hā ʻa e ngaahi fehuʻi ʻoku totonu ke tau ʻeke hifo?

¹³ Meʻa ʻe lava ke ke faí. ʻOku finangalo ʻa Sihova ki heʻene kakaí ke nau “feinga tōtōivi ke tauhi maʻu ʻa e laumālie taha ʻi he haʻi fāʻūtaha ko e melinó.” (ʻEf. 4:1-3) Ko ia ʻeke hifo: ‘ʻOku ou pouaki ʻa e fāʻūtaha mo e melino ʻi he fakatahaʻangá? ʻOku ou talangofua ki he faʻahinga ʻoku takimuʻá? ʻE lava ke falala mai ʻa e niʻihi kehé kiate au, tautefito kapau ʻoku ou maʻu ha fatongia ʻi he fakatahaʻangá? ʻOku ou tauhi taimi, fie tokoni mo vēkeveke ke ngāue?’ (Lau ʻa e Sēmisi 3:17.) Kapau ʻoku fiemaʻu ke ke fakaleleiʻi ha meʻa, lotu ʻo kole ʻa e laumālie māʻoniʻoní. Ko e lahi ange hoʻo fakaʻatā ia ke ne fakafuo ho ʻulungāngá pea tākiekina hoʻo tōʻongá, ko e lahi ange ia ʻa e ʻofa ʻa e fanga tokouá mo e fanga tuofāfiné ʻiate koé pea fakamahuʻingaʻi koe.

AKOʻI MO TEUʻI KITAUTOLU ʻE SIHOVA

14. Fakatatau ki he Kolose 1:9, 10, naʻe anga-fēfē hono akoʻi ʻe Sihova ʻene kakaí ʻi he ʻuluaki senitulí?

¹⁴ ʻI he ʻuluaki senitulí. ʻOku leleiʻia ʻa Sihova ʻi hono akoʻi ʻene kakaí. (Saame 32:8) Ko hono finangaló ke nau ʻiloʻi ia, ʻofa kiate ia pea moʻui taʻengata ko ʻene fānau ʻofeina. Ka ne taʻeʻoua ʻa e ako ʻokú ne tokonaki maí ʻe taʻemalava kotoa ʻa e ngaahi meʻá ni. (Sione 17:3) Naʻe ngāueʻaki ʻe Sihova ʻa e fakatahaʻanga Kalisitiane ʻi he ʻuluaki senitulí ke akoʻi ʻene kakaí. (Lau ʻa e Kolose 1:9, 10.) Naʻe fakahoko ʻe he laumālie māʻoniʻoní​—ko e “tokoní” ʻa ia naʻe talaʻofa ʻe Sīsuú ha ngafa mahuʻinga. (Sione 14:16) Naʻe ʻoange ai ki he kau ākongá ʻa e vavanga fakaefakakaukau lahi ange ki he Folofolá pea fakamanatu ange ʻa e ngaahi meʻa lahi naʻe leaʻaki mo fai ʻe Sīsuú, ʻa ia naʻe toki hiki ki mui ai ʻi he Ngaahi Kōsipelí. Ko e ʻilo ko ení naʻá ne fakaivimālohiʻi ʻa e tui ʻa e muʻaki kau Kalisitiané pehē foki ki heʻenau ʻofa ki he ʻOtuá, ko hono ʻAló mo e niʻihi kehé.

15. ʻI he ngaahi founga fē kuó ke fakamoʻoniʻi ai hono fakahoko ʻe Sihova ʻene talaʻofa ʻi he ʻAisea 2:2, 3?

¹⁵ ʻI onopooni. Naʻe tomuʻa tala ʻe Sihova “ʻi he fakaʻosiʻosi ʻo e ngaahi ʻahó” ko e kakai mei he ngaahi puleʻanga kotoa pē te nau ʻaukolo ki hono moʻunga fakaefakatātaá ke fakahinohino ai fekauʻaki mo ʻene ngaahi foungá. (Lau ʻa e ʻAisea 2:2, 3.) ʻOku tau fakamoʻoniʻi hono fakahoko ʻo e kikite ko iá. Ko e lotu moʻoní kuo hakeakiʻi ia ʻo māʻolunga mamaʻo ange ʻi ha faʻahinga lotu taʻemaʻa pē. Pea ko ha kātoanga kai fakalaumālie ē kuo tokonaki mai ʻe Sihová! (ʻAi. 25:6) Fakafou ʻi he “tamaioʻeiki anga-tonu mo potó,” ʻokú ne ʻomai ai kiate kitautolu ʻa e meʻakai hulu fau kae toe kehekehe foki, mei he ngaahi kupu mo e malangá ki he fanga kiʻi katuni mo e vitiō. (Māt. 24:45) ʻOku tau ongoʻi tatau mo e kaumeʻa ʻo Siope ko ʻIlaiū, naʻá ne pehē: “Ko hai ha faiako ʻe hangē [ko e ʻOtuá]?”​—Siope 36:22.

16. Ko e hā ʻe lava ke ke fai ke tupu fakalaumālie aí?

¹⁶ Meʻa ʻe lava ke ke faí. ʻE tokoniʻi koe ʻe he laumālie ʻo e ʻOtuá ke ngāueʻaki ʻa e meʻa ʻokú ke lau mo ako ʻi he Folofola ʻa e ʻOtuá. Lotu ʻo hangē ko e tokotaha-tohi-sāmé: “Fakahinohinoʻi au, ʻe Sihova, ʻo fekauʻaki mo ho halá. Te u ʻaʻeva ʻi hoʻo moʻoní. Fakafāʻūtahaʻi ʻa hoku lotó ke u manavahē ki ho huafá.” (Saame 86:11) Ko ia hokohoko atu hono maʻu ʻa e meʻakai fakalaumālie ʻoku tokonaki mai ʻe Sihova fakafou ʻi heʻene Folofolá mo ʻene kautahá. Ko e moʻoni, ʻoku ʻikai ko hoʻo taumuʻá pē ke maʻu ʻa e ʻiló. ʻOkú ke loto ke maongo ʻa e moʻoní ki ho lotó pea ngāueʻaki ia ʻi hoʻo moʻuí. ʻE lava ke tokoniʻi koe ʻe he laumālie ʻo Sihová ke fai ia. ʻOkú ke loto foki ke fakalototoʻaʻi ho fanga tokouá mo e fanga tuofāfiné. (Hep. 10:24, 25) Ko e hā hono ʻuhingá? Koeʻuhi ko ho fāmili fakalaumālie kinautolu. Lotu ʻo kole ʻa e laumālie ʻo e ʻOtuá ke ne tokoniʻi koe ke fai ha ngaahi tali loto-moʻoni ʻi he fakatahá pea fai ho lelei tahá kapau ʻoku ʻi ai haʻo konga. ʻI hoʻo fai peheé ʻokú ke fakahaaʻi ai kia Sihova mo hono ʻAló ʻokú ke ʻofa ʻi heʻena ‘fanga sipi’ mahuʻingá.​—Sione 21:15-17.

17. ʻI he ngaahi founga fē ʻe lava ke ke fakahaaʻi ai ʻokú ke poupou faitōnunga ki he kautaha ʻa Sihová?

¹⁷ ʻOku vavé ni ke toe pē ʻa e kautaha ʻe taha ʻi he māmaní pea ko e kautaha ia ʻoku tataki ʻe he laumālie ʻo e ʻOtuá. Ko ia ngāue faivelenga mo e kautaha ʻa Sihová. Tapua atu ʻa e ʻofa taʻefilifilimānako ʻa e ʻOtuá ki he kakaí ʻaki hono fanongonongo ʻa e ongoongo leleí ki he faʻahinga kotoa ʻokú ke fetaulaki mo iá. Faʻifaʻitaki ki heʻene ʻofa ki he māú mo e melinó ʻaki hono pouaki ʻa e fāʻūtaha ʻi he fakatahaʻangá. Pea fanongo ki hoʻo Faiako Maʻongoʻongá ʻaki ʻa e feinga ke maʻu ʻaonga kakato mei he kātoanga kai fakalaumālie ʻokú ne tokonaki maí. Pea ʻi he taimi ʻe ngata ai ʻa e māmani ʻo Sētané, heʻikai ke ke manavahē. ʻI hono kehé, te ke tuʻu loto-toʻa mo e faʻahinga ʻoku nau tauhi mateaki fakataha mo e kautaha ʻa Sihová.