ʻOkú Ke Manatuʻi?

Kuó ke lau fakalelei ʻa e ngaahi ʻīsiu ʻo e Taua Leʻo ʻi he taʻu ní? Sai, sio angé pe ʻe lava ke ke tali ʻa e ngaahi fehuʻi ko ení:

ʻOku totonu ke fēfē ʻetau fakafeangai ki he kau paní?

ʻOku tau houngaʻia ʻi heʻenau tuí; ka, ʻoku ʻikai ke tau tokanga tōtuʻa kiate kinautolu. ʻOku tau fakaʻehiʻehi mei hono “fai ha fakavīkivikiʻi.” (Sute 16, fkm. ʻi lalo) Heʻikai ke tau ʻeke kiate kinautolu ha ngaahi fehuʻi fakafoʻituitui fekauʻaki mo ʻenau ʻamanakí.​—w20.01, p. 29.

Ko e hā ʻoku totonu ke ke tuipau ai ʻoku fakatokangaʻi koe ʻe Sihova?

ʻOku fakahaaʻi ʻi he Tohi Tapú naʻá ne fakatokangaʻi koe ki muʻa ke fanauʻi koé. Pea ʻokú ne fanongo mai ki hoʻo lotú. ʻOkú ne ʻiloʻi hoʻo fakakaukaú mo e meʻa ʻoku ʻi ho lotó mo e kaunga hoʻo tōʻongá kiate iá. (1 Kal. 28:9; Pal. 27:11) Kuó ne tohoakiʻi koe kiate ia.​—w20.02, p. 12.

Ko fē taimi ke tau lea aí mo e taimi ke ʻikai lea aí?

ʻOku tau lea fiefia fekauʻaki mo Sihova. ʻOku tau lea kapau ʻoku tau sio ki ha tokotaha ʻokú ne huʻu atu ʻi ha ʻalunga hala. ʻOku lea ʻa e kau mātuʻá ke fai ha faleʻi ʻo ka fiemaʻu. ʻOku ʻikai ke tau lea (pe ʻoatu) ʻa e ngaahi fakaikiiki fekauʻaki mo ʻetau ngāue ʻi he fonua ʻoku fakataputapuí. ʻOku ʻikai ke tau fakahaaʻi ʻa e ngaahi meʻa fakapulipulí.​—w20.03, p. 20-21.

ʻOku anga-fēfē ʻa e kehe ʻa e fanga heʻe ʻi he Sioeli vahe 2 mei he fanga heʻe ʻi he Fakahā vahe 9?

ʻOku pehē ʻi he Sioeli 2:20-29 ʻe kapusi ʻe he ʻOtuá ʻa e fanga heʻé pea talaʻofa ke fai ha totongi fakafoki ki he maumau naʻa nau fakatupungá. Hili iá, ʻoku huaʻi hifo ʻe he ʻOtuá hono laumālié. Naʻe fakahoko ia ʻi hono ʻohofi ʻe he kau Pāpiloné ʻa ʻIsileli pea ki mui ai. ʻOku fakamatalaʻi ʻi he Fakahā 9:1-11 ʻa e kau pani ʻoku nau hangē ko e fanga heʻé ʻi hotau taimí ʻi heʻenau talaki ʻa e fakamaau ʻa e ʻOtuá ki he fokotuʻutuʻu fulikivanu ko ení, ʻoku ʻai ai hono kau poupoú ke nau mātuʻaki tailiili.​—w20.04, p. 3-6.

Ko hai ʻa e tuʻi ʻo e tokelaú he ʻaho ní?

Ko Lūsia mo ʻene faʻahí. Kuo nau kaunga fakahangatonu ki he kakai ʻa e ʻOtuá, ʻo tapui ʻa e ngāue fakamalangá pea fehiʻanekinaʻi ʻa e Kau Fakamoʻoní. Ko e tuʻi ʻo e tokelaú kuó ne feʻauhi mo e tuʻi ʻo e tongá.​—w20.05, p. 13.

Ko e ngaahi ʻulungaanga ʻe hiva pē ʻi he Kalētia 5:22, 23 ʻa e “fua ʻo e laumālié”?

ʻIkai. ʻOku tokoniʻi kitautolu ʻe he laumālie māʻoniʻoní ke fakatupulekina ha ngaahi ʻulungaanga lelei kehe, hangē ko e māʻoniʻoní. (ʻEf. 5:8, 9)​—w20.06, p. 17.

Ko e hā ha fakatuʻutāmaki ʻe taha hono tuku atu ʻa e ngaahi meʻa fekauʻaki mo kitautolu ʻi he mītia fakasōsialé?

Ko e meʻa ʻokú ke tuku atú ʻe fakahaaʻi atu nai ai ʻokú ke pōlepole, ʻo ʻikai ke anga-fakatōkilalo.​—w20.07, p. 6-7.

Ko e hā ʻe lava ke ako ʻe he kau faifekau Kalisitiané mei he kau toutai taukeí?

Naʻa nau toutai ʻi he taimi mo e feituʻu ʻoku ngalingali ʻe maʻu ai ʻa e iká. ʻOku akoʻi ke nau ngāueʻaki ʻa e naunau totonú. Pea ʻoku nau ngāue loto-toʻa ʻi he tuʻunga faingataʻá. ʻE lava ke tau fai ʻa e meʻa tatau ʻi heʻetau ngāue fakafaifekaú.​—w20.09, p. 5.

Ko e hā ʻa e ngaahi founga ʻe lava ke tau tokoniʻi ai ʻetau kau ako Tohi Tapú ke fakalolotoʻi ʻenau ʻofa kia Sihová?

ʻE lava ke tau fakalototoʻaʻi kinautolu ke lau fakaʻaho ʻa e Tohi Tapú pea fakalaulauloto ki he meʻa naʻa nau laú. Pea ʻe lava ke tau akoʻi kinautolu ke lotu.​—w20.11, p. 4.

Ko hai ʻoku kau ʻi he fakamatala ko eni: “ʻE toetuʻu kotoa pē koeʻuhi ko Kalaisi”?​—1 Kol. 15:22.

Naʻe ʻikai ke pehē ʻe he ʻapositolo ko Paulá ko e faʻahinga kotoa ʻo e tangatá ʻe fokotuʻu hake. Naʻá ne lave ki he kau Kalisitiane paní, ko e faʻahinga naʻe “fakatoputapuʻi ʻo fāʻūtaha mo Kalaisi Sīsuú.” (1 Kol. 1:2; 15:18)​—w20.12, p. 5-6.

Ko e hā ʻe fai ʻe he kau paní hili ʻenau ‘liliu ʻi ha foʻi kemo pē ʻa e matá, ʻi he lolotonga ʻa e ifi ʻa e talupite fakaʻosí’?​—1 Kol. 15:51-53.

Te nau kau fakataha mo Kalaisi ʻi hono puleʻi ʻa e kakaí ʻaki ha tokotoko ukamea. (Fkh. 2:26, 27)​—w20.12, p. 12-13.