Meʻa ʻe Fai ʻe he Lotú Maʻaú
ʻI he fehangahangai mo ha puke lahi, naʻe kumi tokoni ʻa Pamela ki he kau mataotao fakafaitoʻó. Kae kehe, naʻá ne toe lotu ki he ʻOtuá ki ha mālohi ke kātekina ʻene faingataʻaʻiá. Naʻe tokoni ʻa e lotú kiate ia?
“Lolotonga hono faitoʻo au koeʻuhi ko ʻeku kanisaá, naʻá ku faʻa ongoʻi ilifia,” ko e fakamatala ia ʻa Pamela. “Ka ʻi he taimi naʻá ku lotu ai kia Sihova ko e ʻOtuá, naʻá ku ongoʻi nonga pea lava ke u fakakaukau lelei. ʻOku ou kei feʻao pē mo e langá, neongo ia ko e lotú ʻokú ne tokoniʻi au ke tauhi maʻu ha vakai pau. ʻI he ʻeke mai ʻe he kakaí pe ʻoku ou ongoʻi fēfē, ʻoku ou tala ange, ‘ʻOku ʻikai ke u ongoʻi sai, ka ʻoku ou fiefia pē!’”
Ko e moʻoni, ʻoku ʻikai ke tau tatali ke hoko ha puke lahi ka tau toki lotu. Ko kitautolu kotoa ʻoku tau fekuki mo e ngaahi faingataʻa, lalahi pe iiki, pea ʻoku tau faʻa ongoʻi ʻoku tau fiemaʻu ha tokoni ke fekuki ai mo ia. ʻE tokoni ʻa e lotú?
ʻOku pehē ʻi he Tohi Tapú: “Lī hoʻo kavengá kia Sihova, pea te ne tokoniʻi koe. ʻE ʻikai ʻaupito te ne tuku ʻa e tokotaha māʻoniʻoní ke ne tō.” (Saame 55:22) He fakakaukau fakafiemālie ē ko ia! Ko ia ʻe lava fēfē ke tokoniʻi koe ʻe he lotú? ʻI hoʻo lotu ki he ʻOtuá ʻi he founga totonú, te ne ʻoatu kiate koe ʻa e meʻa ʻokú ke fiemaʻu ke fekuki ai mo hoʻo ngaahi faingataʻaʻiá.—Sio ki he puha “Meʻa ʻe ʻOatu ʻe he Lotú Maʻau.”