ʻE Lava Ke Ke Fili Ho Kahaʻú

ʻI he taʻu ʻe 3,500 nai kuo maliu atú, naʻe tala ʻe Sihova ko e ʻOtuá ki he faʻahinga naʻa nau lotu kiate iá ʻa e meʻa kuo pau ke nau fai ke maʻu ai ha kahaʻu malu: “Kuó u fokotuʻu ʻa e moʻui mo e mate ʻi ho ʻaó, ko e tāpuaki mo e mala; pea kuo pau ke ke fili ʻa e moʻuí koeʻuhi ka ke moʻui, ʻa koe mo ho hakó.”​—Teutalōnome 30:19.

Ke maʻu ha kahaʻu fisifisimuʻa, naʻe pau ke fai ʻe he kakai ko iá ʻa e fili totonú. ʻI he ʻahó ni ʻoku fiemaʻu ke tau fai ʻa e fili tatau. ʻOku fakamatalaʻi ʻi he Tohi Tapú ʻa e founga ke fili ai ki ha kahaʻu malu: “ʻAki hoʻo ʻofa kia Sihova ko ho ʻOtuá, ʻaki hoʻo fanongo ki hono leʻó.”​—Teutalōnome 30:20.

ʻE LAVA FĒFĒ KE TAU ʻOFA KIA SIHOVA PEA FANONGO KI HONO LEʻÓ?

AKO MEI HE TOHI TAPÚ: Ke ʻofa kia Sihová, kuo pau ke tau ʻuluaki ako fekauʻaki mo ia mei he Tohi Tapú. ʻI hoʻo fai iá, te ke ʻiloʻi ko ha ʻOtua ʻofa ia ʻokú ne loto ke ke maʻu ʻa e lelei tahá. ʻOkú ne fakaafeʻi koe ke lotu kiate ia “koeʻuhí he ʻokú ne tokanga mai.” (1 Pita 5:7) ʻOku talaʻofa ʻe he Tohi Tapú kapau te ke feinga ke ʻunuʻunu ofi kiate ia, “te ne ʻunuʻunu ofi mai kiate [koe].”​—Sēmisi 4:8.

NGĀUEʻAKI ʻA E MEʻA ʻOKÚ KE AKÓ: Ko e fanongo ki he ʻOtuá ʻoku ʻuhingá ke muimui ki heʻene tataki fakapotopoto ʻoku maʻu ʻi he Tohi Tapú. ʻI hoʻo fai peheé, “ʻe toki lavameʻa ai ho halá pea te ke toki fai fakapotopoto ai.”​—Siosiua 1:8.