ʻOkú Ke Maʻu ʻa e Tuí?

Ke fakahōifua kia Sihova, kuo pau ke tau maʻu ʻa e tuí. Neongo ia, ʻoku pehē ʻe he Tohi Tapú “ko e tuí ʻoku ʻikai ko ha meʻa ia ʻa e kakai kotoa pē.” (2 Tes. 3:2) Naʻe lea ʻa e ʻapositolo ko Paulá ʻo fekauʻaki mo hono kau fakatangá, ko e “kau tangata fakatupu maumau mo fulikivanú,” naʻe fiemaʻu ke ne hao meiate kinautolu. Ka ko ʻene fakamatala fekauʻaki mo e tuí ʻoku ngāueʻaki ia ʻi ha tuʻunga lahi ange. Ko e kakai ʻe niʻihi ʻoku nau fili ke tukunoaʻi ʻa e fakamoʻoni māʻalaʻala ʻoku ʻi ai ha Tokotaha-Fakatupu—ko e ʻOtuá. (Loma 1:20) ʻOku taukaveʻi nai ʻe he niʻihi ʻoku nau tui ʻoku ʻi ai ha mafai māʻolunga ange. Ka ko e foʻi fakakaukau ko iá ʻoku ʻikai ko e tui ia ʻoku fiemaʻu ke fakahōifua kia Sihová.

ʻOku fiemaʻu ke tau tuipau ʻoku ʻi ai ʻa Sihova pea “ko ia te ne fakapaleʻi” ʻa e faʻahinga ʻoku tui mālohí. (Hep. 11:6) Ko e tuí ko ha tafaʻaki ia ʻo e fua ʻo hono laumālié. Ko e hanga kia Sihova ʻi he lotú ʻe lava ke ne tokoniʻi ha tokotaha ke maʻu ʻa e laumālie māʻoniʻoní. (Luke 11:​9, 10, 13) Ko ha founga tefito ke maʻu ʻa e laumālie ko iá ko hono lau ʻa e Folofola fakamānavaʻi ʻa e ʻOtuá. ʻE lava leva ke tau fakakaukau ki he meʻa ʻoku tau laú pea feinga ke ngāueʻaki ʻa e meʻa ʻoku tau akó. ʻE tākiekina leva ʻe he laumālie ʻo Sihová ʻetau moʻuí, pea tokoniʻi kitautolu ke tau maʻu ʻa e tui ʻoku fakahōifua kiate iá.