Tali ʻa e Fakamolemole ʻa Sihová

1-2. Ko e hā ʻa e fakafiemālie ʻe lava ke hokosia ʻe he kau faiangahala fakatomalá? (Sio foki ki he fakatātā.)

KO TUʻI Tēvita naʻá ne mahinoʻi lelei ʻa e ongoʻi halaia ʻi he ngaahi angahala ʻi he kuohilí. (Saame 40:12; 51:3; fakamatala talateu) Naʻá ne fai ʻa e ngaahi fehālaaki mafatukituki ʻi heʻene moʻuí. Ka naʻá ne fakahaaʻi ʻa e fakatomala loto-moʻoni, pea naʻe fakamolemoleʻi ia ʻe Sihova. (2 Sām. 12:13) Ko hono olá, naʻe mahinoʻi foki ʻe Tēvita ʻa e fiemālie ʻoku haʻu mei hono maʻu ʻa e fakamolemole ʻa Sihová.—Saame 32:1.

² Hangē ko Tēvitá, ʻe lava ke tau hokosia ʻa e fiemālie ʻoku haʻu mei hono maʻu ʻa e meesi ʻa Sihová. He fakafiemālie ē ke ʻiloʻi ʻoku loto-lelei ʻa Sihova ke fakamolemoleʻi ʻetau ngaahi angahalá—naʻa mo e angahala mafatukitukí—kapau ʻoku tau fakatomala loto-moʻoni, vete ʻetau angahalá, pea fai hotau lelei tahá ke ʻoua ʻe toe fai ʻa e fehālaaki tatau! (Pal. 28:13; Ngā. 26:20; 1 Sio. 1:9) Pea he fakanonga ē ke ʻiloʻi ʻokú ne fakamolemoleʻi fakaʻaufuli kitautolu ʻo hangē pē ia naʻe ʻikai ʻaupito ke tau faiangahalá!—ʻIsi. 33:16.

3-4. Naʻe anga-fēfē ongoʻi ʻa e tuofefine ʻe taha ʻi he hili ʻene papitaisó, pea ko e hā te tau lāulea ki ai ʻi he kupu ko ení?

³ Neongo ia, ʻi he taimi ʻe niʻihi, ʻe faingataʻa nai ki he niʻihi ke tali ʻa e fakamolemole ʻa Sihová. Fakakaukau kia Jennifer ʻa ia naʻe ʻohake ʻi he moʻoní. ʻI heʻene taʻu hongofulu tupú, naʻá ne kau ʻi he tōʻonga halá pea moʻui lōua. ʻI he ngaahi taʻu ki mui aí, naʻá ne toe foki kia Sihova pea faai atu pē ʻo ne papitaiso. ʻOkú ne pehē: “Ko ʻeku moʻui ki muʻá naʻe fonu ʻi he tuli ki he meʻa fakamatelié, fehokotaki fakasino taʻetāú, inu tōtuʻá mo e ʻita tōlilí. ʻI hoku ʻatamaí, naʻá ku ʻiloʻi ʻi he hili ʻeku kōlenga ki ha fakamolemole pea fakatomalá, ko e feilaulau ʻa Kalaisí naʻá ne fakamaʻa au. Ka naʻe ʻikai lava ke u fakatuipauʻi hoku lotó naʻe fakamolemoleʻi au.”

⁴ ʻOku faingataʻa ʻi he taimi ʻe niʻihi ke ke fakatuipauʻi ho lotó kuo fakamolemoleʻi koe ʻe Sihova ʻi hoʻo ngaahi fehālaaki ʻi he kuohilí? ʻOku loto ʻa Sihova ke tau ongoʻi malu ʻi heʻene mēsí ʻo hangē ko Tēvitá. ʻI he kupu ko ení, te tau lāulea ai ki he ʻuhinga ʻoku fiemaʻu ai ke tau tali ʻa e fakamolemole ʻa Sihová mo e meʻa ʻe lava ke ne tokoniʻi kitautolu ke fai peheé.

KO E HĀ ʻOKU FIEMAʻU AI KE TAU TALI ʻA E FAKAMOLEMOLE ʻA SIHOVÁ?

5. Ko e hā ʻoku loto ʻa Sētane ke tau tui ki aí? ʻOmai ha fakatātā.

⁵ ʻI hono tali ʻa e fakamolemole ʻa Sihová, te tau fakaʻehiʻehi ai mei he tō ʻi he taha ʻo e ngaahi tauhele ʻa Sētané. Manatuʻi ʻe fai ʻe Sētane ha meʻa pē ke taʻofi kitautolu mei he tauhi kia Sihová. Ke aʻusia ʻe Sētane ʻene taumuʻá, ʻokú ne feinga nai ke ʻai ke tau tui ko ʻetau ngaahi angahalá heʻikai lava ke fakamolemoleʻi. Fakakaukau ki he tangata ʻi Kolinitō naʻe fakamavaheʻi mei he fakatahaʻangá ko e fehokotaki fakasino taʻetāú. (1 Kol. 5:​1, 5, 13) ʻI heʻene fakatomala ki mui aí, naʻe loto ʻa Sētane ki he faʻahinga ʻi he fakatahaʻangá ke ʻoua ʻe fakamolemoleʻi ia—ke nau mātuʻaki anga-fefeka ʻo ʻikai ke talitali lelei ʻa e tangatá. ʻI he taimi tatau, naʻe loto ʻa Sētane ke ongoʻi ʻe he tangata fakatomalá ʻe ʻikai ala fakamolemoleʻi ia—ke mātuʻaki “lōmekina ia ʻe he loto-mamahi tōtuʻá” ʻo taʻofi ai ʻene tauhi kia Sihová. Kuo ʻikai liliu ʻe Sētane ʻene taumuʻá pe ko ʻene foungá. Ka “ʻoku ʻikai ke tau taʻeʻilo ki heʻene ngaahi fāliungá.”—2 Kol. 2:​5-11.

6. ʻE lava fēfē ke tau maʻu ʻa e fiemālie mei hono toʻo atu ʻa e kavenga ʻo e halaiá?

⁶ ʻI hono tali ʻa e fakamolemole ʻa Sihová, te tau maʻu ai ʻa e fiemālie mei hono toʻo atu ʻa e kavenga ʻo e halaiá. ʻI he taimi ʻoku tau faiangahala aí, ʻoku fakanatula pē ke ongoʻi halaia. (Saame 51:17) Ko ha meʻa lelei ia. Ko hotau konisēnisí ʻe lava ke ne ueʻi kitautolu ke fou ʻi he ngaahi sitepu lelei ke fakatonutonu hotau ʻalungá. (2 Kol. 7:​10, 11) Kae kehe, kapau ʻoku tau nofoʻaki ongoʻi halaia ʻi ha taimi fuoloa hili ʻetau fakatomala ʻi ha angahala, ʻe fakataueleʻi nai kitautolu ke tau foʻi. ʻI heʻetau tali ʻa e fakamolemole ʻa Sihová, ʻe lava ke tau tuku ai ʻa e halaiá ki he feituʻu ʻoku totonu ke ʻi aí—ke ʻi mui ʻiate kitautolu. ʻE lava leva ke tau tauhi kia Sihova ʻo fakatatau ki he founga ʻokú ne loto ki aí—ke tauhi kiate ia mo ha konisēnisi maʻa mo e fiefia loloto. (Kol. 1:​10, 11; 2 Tīm. 1:3) Ka ʻe lava fēfē ke tau fakatuipauʻi hotau lotó ke tali ʻa e fakamolemole ʻa e ʻOtuá?

KO E HĀ ʻE LAVA KE NE TOKONIʻI KITAUTOLU KE TALI ʻA E FAKAMOLEMOLE ʻA SIHOVÁ?

7-8. Naʻe anga-fēfē hono fakamatalaʻi ʻe Sihova ʻa ia tonu kia Mōsesé, pea ko e hā ʻa e falala pau ʻoku ʻomai aí? (ʻEkisoto 34:​6, 7)

⁷ Fakakaukauloto ki he founga kuo fakamatalaʻi ai ʻe Sihova ʻa ia tonú. Ko e fakatātaá, fakatokangaʻi ʻa e lea ʻa Sihova kia Mōsese ʻi Moʻunga Sainaí.a (Lau ʻa e ʻEkisoto 34:​6, 7.) Mei he meʻa kotoa naʻe lava ke leaʻaki ʻe Sihova fekauʻaki mo hono ʻulungāngá mo ʻene ngaahi foungá, naʻá ne fili ke fakamatalaʻi ʻa ia tonu “ko ha ʻOtua mohu meesi mo manavaʻofa.” ʻE taʻofi nai ʻe ha ʻOtua pehē ʻa e fakamolemolé mei ha tokotaha lotu faiangahala kuó ne fakatomala moʻoni? ʻIkai ʻaupito! ʻE hoko ia ko ha taʻefaimeesi mo ha loto-fefeka—ko ha ongo ʻulungaanga heʻikai ʻaupito ke fakahāhā ʻe Sihova.

⁸ ʻOku tau falala pau heʻikai ʻaupito ke fakamatalahalaʻi ʻe Sihova ʻa ia tonu, he ko ia ko e ʻOtua ʻo e moʻoní. (Saame 31:5) Ko ia ʻe lava ke tau falala ki heʻene leá. Kapau ʻoku faingataʻa ke ke tuku ange ʻa e ongoʻi halaia ʻi he ngaahi angahala ʻi he kuohilí, ʻeke hifo: ‘ʻOku ou tui ʻoku mohu meesi mo manavaʻofa moʻoni ʻa Sihova pea heʻikai ʻaupito ke ne taʻofi ʻa e fakamolemolé mei ha taha faiangahala pē ʻoku fakatomala? ʻIkai ʻoku totonu leva ke u tali kuó ne fakamolemoleʻi au?’

9. ʻOku ʻuhinga ki he hā ʻa hono fakamolemoleʻi ʻa ʻetau ngaahi angahalá? (Saame 32:5)

⁹ Fakalaulauloto ki he meʻa naʻe fakamānavaʻi ʻe Sihova ʻa e kau hiki Tohi Tapú ke leaʻaki fekauʻaki mo ʻene fakamolemolé. Ko e fakatātaá, fakakaukau ki hono fakamatalaʻi ʻe he tokotaha hiki Tohi Tapu ko Tēvitá ʻa e fakamolemole ʻa Sihová. (Lau ʻa e Saame 32:5.) “Naʻá ke fakamolemoleʻi ʻa ʻeku faihalá mo ʻeku ngaahi angahalá,” ko e lea ia ʻa Tēvitá. Ko e foʻi lea faka-Hepelū naʻe liliu ko e “fakamolemoleʻi” ʻi he ngaahi veesi ko ení ʻoku toe ʻuhinga ia ki he “hiki hake” pe “fua.” ʻI hono fakamolemoleʻi ʻe Sihova ʻa Tēvitá, ʻi ha ʻuhinga, naʻá ne hiki hake ʻene ngaahi angahalá pea fua ia ʻo ʻave. Naʻe maʻu leva ʻe Tēvita ʻa e fiemālie mei hono toʻo atu ʻa e halaia mamafa kuó ne fuesiá. (Saame 32:​2-4) ʻE lava ke tau hokosia ʻa e fiemālie meimei tatau. ʻI heʻetau fakatomala loto-moʻoni ʻi ha ngaahi laka hala, ʻoku ʻikai fiemaʻu ke hokohoko atu ʻetau fua ʻa e kavenga ʻo e halaia ʻi heʻetau ngaahi angahala kuo hiki hake ʻe Sihova pea fua ʻo ʻave meiate kitautolú.

10-11. Ko e hā ʻoku tala mai kiate kitautolu fekauʻaki mo Sihova ʻe he kupuʻi lea “mateuteu ke fakamolemole”? (Saame 86:5)

¹⁰ Lau ʻa e Saame 86:5. ʻOku lave heni ʻa Tēvita fekauʻaki mo Sihova ʻokú ne “mateuteu ke fakamolemole.” ʻI hono fakamatalaʻi ʻa e kupuʻi lea ko ení, ʻoku pehē ʻe ha maʻuʻanga fakamatala Tohi Tapu fekauʻaki mo Sihova: “[Ko iá] ko ha ‘tokotaha fakamolemole’—ko hono ‘natulá’ ia.” Ko e hā ʻoku fakanatula ai kia Sihova ke fakamolemolé? ʻOku tali ia ʻi he konga hono hoko ʻo e vēsí: “ʻOkú ke mohu ʻi he ʻofa mateaki ki he faʻahinga kotoa ʻoku ui atu kiate koé.” Hangē ko ia naʻa tau ako ʻi he kupu ki muʻá, ko e ʻofa mateakí ʻokú ne ueʻi ʻa Sihova ke faʻu ha haʻi fekoekoeʻi mo tuʻuloa mo ʻene kau lotu faitōnungá. ʻI hono ueʻi ʻe heʻene ʻofa mateakí, “te ne fakamolemole loto-lelei” ʻa e kau faiangahala fakatomalá kotoa. (ʻAi. 55:​7, fkm. ʻi lalo) Kapau ʻoku faingataʻa ke ke tali ʻa e fakamolemole ʻa e ʻOtuá, te ke ʻeke hifo nai: ‘ʻOku ou tui ko Sihova ko ha Tokotaha-Fakamolemole—ʻa ia ʻokú ne mateuteu ke fakamolemoleʻi ʻa e faʻahinga fakatomala kotoa ʻoku nau ui kiate ia ki ha mēsí? ʻIkai ʻoku totonu leva ke u tali naʻá ne fakamolemoleʻi au ʻi he taimi naʻá ku tangi ai kiate ia ki ha mēsí?’

¹¹ ʻOku tau maʻu ʻa e fakafiemālie ʻi hono ʻiloʻi ʻoku mahinoʻi kakato ʻe Sihova ʻa hotau natula angahalaʻiá. (Saame 139:​1, 2) ʻOku māʻalaʻala eni ʻi he saame ʻe taha ʻa Tēvita, ʻa ia ʻe lava ke ne toe tokoniʻi kitautolu ke tali ʻa e fakamolemole ʻa Sihová.

ʻOUA NAʻA NGALO ʻA E MEʻA ʻOKU MANATUʻI ʻE SIHOVÁ

12-13. Fakatatau ki he Saame 103:​14, ko e hā ʻoku manatuʻi ʻe Sihova fekauʻaki mo kitautolú, pea ʻoku ueʻi ia ʻe he meʻá ni ke ne fai ʻa e hā?

¹² Lau ʻa e Saame 103:14. ʻOku lave ʻa Tēvita kia Sihova “ʻokú ne manatu ko e efu pē kitautolu.” ʻOku fakamatalaʻi heni ʻe Tēvita ʻa e ʻuhinga ʻe taha ʻoku mateuteu ai ʻa Sihova ke fakamolemoleʻi ʻa e kau lotu fakatomalá: ʻOkú ne lāuʻilo ki hotau natula angahalaʻiá. Ke mahinoʻi lelei ange ení, tau vakai fakalelei angé ki he lea ʻa Tēvitá.

¹³ ʻOku pehē ʻe Tēvita ko Sihova “ʻokú ne ʻafioʻi lelei ʻa e anga hotau ngaohí.” Naʻá ne ngaohi ʻa ʻĀtama “mei he efu ʻo e kelekelé” peá ne ʻafioʻi lelei ko e faʻahinga haohaoa ʻo e tangatá ʻoku nau maʻu ʻa e ngaahi fakangatangata fakanatula—ko e fakatātaá, ʻoku fiemaʻu ke nau kai, mohe mo mānava. (Sēn. 2:7) Ka ʻi he faiangahala ʻa ʻĀtama mo ʻIví, ko e tupu mei he efú naʻe toe ʻuhinga ia ki ha meʻa lahi ange. ʻI hotau tuʻunga ko hona hakó, naʻa tau maʻu tukufakaholo ha natula angahalaʻia ʻokú ne ʻai ke tau hehema ke fai ʻa e ngaahi meʻa halá. ʻOku ʻikai ngata pē hono ʻiloʻi ʻe Sihova hotau natula angahalaʻiá; ʻoku lave ʻa Tēvita fekauʻaki mo ia ʻokú Ne ‘manatuʻi’ ia. Ko e foʻi lea faka-Hepelū naʻe ngāueʻaki hení ʻe lava ke ʻuhingá ke fai ha ngāue pau. Te tau fakanounou nai ʻa e ʻuhinga ʻo e lea ʻa Tēvitá ʻo peheni: ʻOku mahinoʻi ʻe Sihova te tau tōnounou ʻi he taimi ʻe niʻihi; ʻi heʻetau fai peheé, ʻoku ueʻi ia ke ne tali ʻetau fakatomala loto-moʻoní ʻaki hono fakahāhā mai ʻa e mēsí mo e fakamolemolé.—Saame 78:​38, 39.

14. (a) ʻOku anga-fēfē hono fakamatalaʻi ʻe Tēvita ʻa e lahi ʻo e fakamolemole ʻa Sihová? (Saame 103:12) (e) ʻOku anga-fēfē hono fakahaaʻi ʻe he faʻifaʻitakiʻanga ʻa Tēvitá ʻa e kakato ʻo e fakamolemole ʻa Sihová? (Sio ki he puha “Founga ʻOku Fakamolemole Ai ʻa Sihova pea Fakangaloʻí.”)

¹⁴ ʻOku lahi fēfē ʻa e fakamolemole ʻa Sihová? (Lau ʻa e Saame 103:12.) ʻOku pehē ʻe Tēvita ʻi he taimi ʻoku fakamolemole ai ʻa Sihová, ʻokú Ne ʻave ʻetau ngaahi angahalá ʻo “hangē ko e mamaʻo ʻa e hopoʻanga laʻaá [hahaké] mei he tōʻanga laʻaá [hihifó].” ʻI ha ʻuhinga, ko e hahaké ʻoku tuʻu maʻu pē ia ʻi he mamaʻo taha mei he hihifó; ko e ongo tafaʻakí ʻoku ʻikai ʻaupito malava ke na fetaulaki. Ko e hā ʻoku tala mai heni fekauʻaki mo e ngaahi angahala ʻoku fakamolemoleʻi ʻe Sihová? ʻOku fakatātaaʻi ia ʻe ha maʻuʻanga fakamatala ʻe taha ʻo peheni: “Kapau ʻoku mamaʻo pehē hono ʻave ʻetau angahalá, ʻe lava leva ke tau fakapapauʻi ko e nanamu, naʻa mo e manatu ki aí kuo pau ke toʻo fakaʻaufuli atu.” Fakaʻuta atu ki ai—ʻi heʻetau nāmuʻi ha meʻa ʻoku lava ke ne fakamanatu mai ha meʻa ʻi he kuohilí. Ka ʻi he taimi ʻoku fakamolemole ai ʻa Sihová, ʻoku hangē ia naʻe ʻikai ha meʻa naʻa mo ha nanamu te ne toe fakamanatu mai ʻa e angahalá pea ʻai ia ke ne kei lau kiate kitautolu.—ʻIsi. 18:​21, 22; Ngā. 3:19.

15. Ko e hā ʻe lava ke tau faí kapau ʻoku tau fuesia ha ongoʻi halaia hokohoko ʻi heʻetau ngaahi fehālaaki ʻi he kuohilí?

¹⁵ ʻE lava fēfē ke tokoniʻi kitautolu ʻe he ngaahi lea ʻa Tēvita ʻi he Saame 103 ke tali ʻa e fakamolemole ʻa Sihová? Kapau ʻoku tau fuesia ha ongoʻi halaia hokohoko ʻi heʻetau ngaahi angahala ʻi he kuohilí, ʻeke hifo: ‘ʻOku ou fakangaloʻi ʻa e meʻa ʻoku manatuʻi ʻe Sihová—ʻa ia, ʻoku ou fakangaloʻi ko iá ʻokú ne lāuʻilo ki hoku natula angahalaʻiá pea te ne fakamolemoleʻi ha tokotaha faiangahala fakatomala hangē ko aú? ʻOku ou toe manatuʻi ʻa e meʻa ʻoku fili ʻa Sihova ke fakangaloʻí—ʻa ia, ʻoku ou manatuʻi ʻa e ngaahi angahala kuó ne fakamolemoleʻí pea heʻikai ʻaupito ke ne kei lau kiate aú?’ ʻOku ʻikai tokangataha ʻa Sihova ki heʻetau ngaahi angahala ʻi he kuohilí. Pea ʻoku totonu ke pehē pē mo kitautolu. (Saame 130:3) ʻI heʻetau tali ʻa e fakamolemole ʻa Sihová, ʻe malava ai ke tau fakamolemoleʻi kitautolu ʻi heʻetau ngaahi fehālaaki ʻi he kuohilí pea ngaʻunu ki muʻa.

16. Fakatātaaʻi ʻa e fakatuʻutāmaki ʻo e nōfoʻi ʻi he ongoʻi halaia ʻi he ngaahi angahala ʻi he kuohilí. (Sio foki ki he fakatātaá.)

¹⁶ Fakakaukau ki he fakatātaá. Ko e nōfoʻi ʻi he ongoʻi halaia ʻi heʻetau ngaahi angahala ʻi he kuohilí ʻoku hangē ia haʻo feinga ke fakaʻuli ʻo lele ki muʻa ʻi ha meʻalele lolotonga iá ʻokú ke toutou sio ʻi he sioʻatá ki mui. ʻOku lelei ke ʻai pē mo kiʻi hila ki mui ʻi he sioʻatá; ʻe lava ke ke ʻiloʻi ai ha fakatuʻutāmaki ʻe ala hoko ʻi mui ʻiate koe. Ka ke ngaʻunu ki muʻa ʻi ha founga malú, kuo pau ke ke tokangataha ki he hala ʻi muʻa ʻiate koé. ʻI he tuʻunga meimei tatau, ʻe lava ke hoko ʻo ʻaonga kapau ʻe ʻai pē mo tau kiʻi sio ki mui ki heʻetau ngaahi fehālaaki ʻi he kuohilí; ʻe lava ke tau ako mei ai pea fakaivimālohiʻi ai ʻetau fakapapau ke ʻoua ʻe toe fai iá. Ka ʻo kapau ʻoku tau hanganaki tokangataha ki he ngaahi fehālaaki ʻi he kuohilí, ko e ongoʻi halaia ʻoku tau fuesiá te ne fakangatangata nai ʻa e meʻa ʻe lava ke tau fai ʻi he taimí ni ʻi he tauhi ki he ʻOtuá. ʻI hono kehé, ʻofa ke tau hanganaki tokangataha ki he hala ʻoku toka mei muʻa ʻiate kitautolú. ʻOku tau ʻaʻeva ʻi he hala ʻoku taki atu ki he moʻui ʻi he māmani foʻou naʻe talaʻofa ʻe he ʻOtuá, ʻa ia ko e ngaahi manatu tamakí “ʻe ʻikai toe manatua.”—ʻAi. 65:17; Pal. 4:25.

HOKOHOKO ATU KE FAKATUIPAUʻI HO LOTÓ

17. Ko e hā ʻoku fiemaʻu ai ke tau hanganaki fakatuipauʻi hotau lotó ki he ʻofa mo e fakamolemole ʻa Sihová?

¹⁷ ʻOku fiemaʻu ke tau hanganaki fakatuipauʻi ki hotau lotó ʻa e ʻofa mo e fakamolemole ʻa Sihová. (1 Sio. 3:19) Ko e hā hono ʻuhingá? Koeʻuhí ko Sētane heʻikai ke ne foʻi ʻi heʻene ngaahi feinga ke fakatuipauʻi kitautolu ʻoku ʻikai ke ʻofaʻi pe malava ke fakamolemoleʻi kitautolu. Pe ko e hā pē ʻa e foungá, ko ʻene taumuʻá ʻoku taha pē—ke ne taʻofi ʻetau tauhi kia Sihová. ʻOku lava ke tau ʻamanekina ʻe toe fakalalahi ange ʻa e ngaahi feinga ʻa Sētané koeʻuhí ʻokú ne ʻiloʻi ʻoku toe siʻi pē hono taimí. (Fkh. 12:12) Kuo pau ke ʻoua te tau fakaʻatā ia ke ne ikuna!

18. Ko e hā ʻe lava ke ke fai ke fakatuipauʻi ki ho lotó ʻa e ʻofa mo e fakamolemole ʻa Sihová?

¹⁸ Ke fakaivimālohiʻi hoʻo falala pau ki he ʻofa ʻa Sihová, ngāueʻaki ʻa e ngaahi fokotuʻu naʻe lāulea ki ai ʻi he kupu ki muʻá. Ke fakatuipauʻi ki ho lotó ʻa e fakamolemole ʻa Sihová, fakakaukauloto ki he founga kuo fakamatalaʻi ai ʻe Sihova ʻa ia tonú. Fakalaulauloto ki he meʻa naʻá ne fakamānavaʻi ʻa e kau hiki Tohi Tapú ke nau leaʻaki fekauʻaki mo ʻene fakamolemolé. ʻOua naʻa ngalo ʻokú ne ʻiloʻi lelei ho natula angahalaʻiá pea fakafeangai kiate koe ʻi he meesi. Pea manatuʻi ko ʻene fakamolemolé ʻoku kakato. Pea ʻi hoʻo maʻu leva ʻa e falala pau tatau mo ia naʻe maʻu ʻe Tēvita ki he meesi ʻa Sihová, ʻe malava ai ke ke pehē, “Mālō Sihova, ʻi hono ‘fakamolemoleʻi ʻa ʻeku faihalá mo ʻeku ngaahi angahalá’!”—Saame 32:5.