ʻOku Fōtunga Fēfē ʻa e Tēvoló?
Tali ʻa e Tohi Tapú
Ko e Tēvoló ko ha tokotaha laumālie taʻehāmai, ʻa ia ʻoku ʻuhingá ʻoku ʻikai hano fōtunga hā mai.—‘Efesō 6:11, 12.
Ko e kau ʻaati tokolahi kuo nau tā ha fakatātā ʻo e Tēvoló ʻokú ne fōtunga hangē ha kosí pea ʻoku ʻi ai hono ongo meʻatui, hiku pea ʻokú ne toʻo ha fuʻu huhu. Kuo pehē ʻe he tokolahi ko e ngaahi fakatātā ko ia ʻo e Tēvoló naʻe tā ia ʻe ha kau ʻaati ʻi onoʻaho ʻa ia ʻoku ngalingali naʻe tākiekina kinautolu ʻe he ngaahi fananga mo e talatupuʻa ʻi he kuonga muʻá.
ʻOku anga-fēfē hono fakamatalaʻi ʻe he Tohi Tapú ʻa e Tēvoló?
ʻOku fakamatalaʻi ʻe he Tohi Tapú ʻa e Tēvoló ʻi ha ngaahi founga kehekehe. ʻOku tokoni eni ke tau mahinoʻi ʻa hono angaʻitangatá kae ʻikai ko hono fōtungá. Ko e ngaahi fakatātā eni ʻe niʻihi:
Ko ha ʻāngelo ʻo e māmá. ʻOkú ne fakangalingali ʻokú ne ʻoange ha meʻa lelei ki he kakaí ʻi heʻene feinga ke tohoakiʻi kinautolu ke muimui ki heʻene ngaahi akonakí kae ʻikai ko e ngaahi akonaki ʻa e ʻOtuá.—2 Kolinitō 11:14.
Ko ha laione ngungulu. ʻOkú ne ʻohofi anga-kakaha ʻa e kau lotu ʻa e ʻOtuá.—1 Pita 5:8.
Ko ha fuʻu talākoni. ʻOkú ne fakamanavahē, mālohi mo fakatupu ʻauha.—Fakahā 12:9.