Tokoni ki he Kau Ngāue Fakafalemahaki ʻOku Nau Fekuki mo e Loto-Mafasiá

Ko Bryn ʻokú ne nofo ʻi North Carolina ‘o ‘Ameliká ko ha mēmipa ia ʻo e Kōmiti Fetuʻutaki Fakafalemahaki fakalotofonuá, ʻoku nau fengāueʻaki vāofi mo e ngaahi falemahakí ke tokangaʻi ʻa e ngaahi fiemaʻu ʻa e Kau Fakamoʻoni ʻa Sihova ʻoku nau puké.

Koeʻuhi ko e COVID-19 naʻe ʻikai ke toe tali ʻe he ngaahi falemahakí ha kau ʻaʻahi. Naʻe telefoni ʻa Bryn ki he talēkita ʻokú ne tokangaʻi ʻa e ngaahi ʻaʻahi fakalotú ʻi ha falemahaki fakalotofonua ke ʻiloʻi ʻa e founga ʻe lava ke ne fai ai ha tokoni ki he Kau Fakamoʻoni ʻoku nau puké.

Naʻe fakahoko ʻa e telefoni ʻa Bryn ki he tokoni talēkitá. Koeʻuhi ko e fakangatangata ʻo e ʻaʻahí, naʻe kole ai ʻe Bryn pe ʻe lava ke ʻave ʻene fika telefoní ki he Kau Fakamoʻoni ʻoku nau puke ʻi falemahakí koeʻuhi ke ne lava ʻo lea kiate kinautolu. Naʻe tali ʻene kolé.

Naʻe fakakaukau leva ʻa Bryn ki he kau ngāue ʻi falemahakí. Naʻá ne tala ange ki he tokoni talēkitá ʻokú ne houngaʻia ʻi he kau ngāue ʻa e falemahakí pea ʻofa pē ʻoku nau moʻui lelei. Naʻá ne toe tānaki atu foki naʻá ne sio ko e kakaí ʻi he feituʻu kotoa pē kae tautautefito ki he kau ngāue ʻi falemahakí ʻoku nau hokosia ʻa e loto-mafasia lahi koeʻuhi ko e mahaki fakaʻauhá.

Naʻe fakapapauʻi ange ʻe he tokoni talēkitá kuo ʻai ʻ e he COVID-19 ʻa e moʻuí ke mātuʻaki fakalotomafasia moʻoni ʻi he falemahakí.

Naʻe tala ange leva ʻe Bryn: “ʻOku maʻu ʻi heʻemau uepisaití ʻa e ngaahi fakamatala ʻe lava ke ne tokoniʻi ʻa e kakaí ke nau fekuki mo e loto-mafasiá. Kapau te ke ʻaʻahi ki he jw.org pea taipeʻi ʻa e ‘loto-mafasia’ ʻi he puha fekumí te ke maʻu ai ʻa e ngaahi kupu fakalototoʻa ki hoʻo kau ngāué.”

Lolotonga ʻena talanoá, naʻe ʻaʻahi ʻa e tokoni talēkitá ki he uepisaití pea naʻá ne taipeʻi ʻa e foʻi lea “loto-mafasia” ʻi he puha fekumí pea naʻá ne sio ai ki he fakaʻaliʻali ʻa e ngaahi kupú. “Tōtōatu! ” ko ʻene leá ia. “Te u fakahaaʻi eni ki he talēkitá. ʻE ʻaonga eni ki heʻemau kau ngāué pea mo e niʻihi kehé. Te u pulusi ha ngaahi tatau pea ʻave ia kiate kinautolu.”

Hili ha ngaahi uike mei ai, naʻe lea ʻa Bryn ki he talēkitá ʻa ia naʻá ne fakahoko ange naʻa nau vakaiʻi ʻa e uepisaití pea kuo nau pulusi ha ngaahi tatau ʻo e ngaahi kupu fekauʻaki mo e loto-mafasiá mo e ngaahi kaveinga ʻoku felāveʻi mo iá. Naʻa nau vahevahe ia ki he kau nēsí mo e kau ngāue ʻi he falemahakí.

Naʻe pehē ʻe Bryn: “Naʻe fakamālō mai ʻa e talēkitá ki heʻetau ngāué pea mo e ngaahi kupu ʻaonga kuo pulusí. Naʻe mātuʻaki ʻaonga ʻaupito.”