Ko e ʻOtuá ko ha Tolu-Tahaʻi-ʻOtua?

Tali ʻa e Tohi Tapú

ʻOku akoʻi ʻe he ngaahi lotu faka-Kalisitiane lahi ko e ʻOtuá ko ha Tolu-Tahaʻi-ʻOtua. Kae kehe, fakatokangaʻi ʻa e meʻa ʻoku leaʻaki ʻe he Encyclopædia Britannica: “ʻOku halaʻatā ke ʻasi ʻa e foʻi lea Tolu-Tahaʻi-ʻOtuá pe ko e tokāteline tofu pē ko iá ʻi he Fuakava Foʻoú . . . Naʻe tupu māmālie ʻa e tokāteliné ʻi ha ngaahi senituli fakataha mo e fekīhiaki lahi.”

Ko hono moʻoní, ko e ʻOtua ʻo e Tohi Tapú kuo ʻikai ʻaupito ke fakamatalaʻi ia ko ha konga ʻo ha Tolu-Tahaʻi-ʻOtua. Fakatokangaʻi ʻa e lau ʻa e ngaahi veesi Tohi Tapu ko ení:

“Ko Sihova ko hotau ʻOtuá ko e tahaʻi Sihova ia.”​—Teutalōnome 6:4.

“Ko koe, ʻa ia ko ho huafá ko Sihova, ko koe pē toko taha ʻa e Fungani Māʻolunga ʻi he māmaní kotoa.”​—Saame 83:18.

“Ko ʻeni ia ʻe maʻu ai ʻa e moʻui taʻengatá, ko ʻenau hoko ʻo ʻiloʻi koe, ko e ʻOtua moʻoni pē taha, pea mo e tokotaha ko ia naʻá ke fekau maí, ʻa Sīsū Kalaisi.”​—Sione 17:3.

“Ko e ʻOtuá tokotaha pē.”​—Kalētia 3:20.

Ko e hā ʻoku pehē ai ʻe he tokolahi taha ʻo e ngaahi lotu faka-Kalisitiané ko e ʻOtuá ko ha Tolu-Tahaʻi-ʻOtua?