Ko e Hā ʻOku ʻIkai ke Ngāueʻaki Ai ʻe he Kau Fakamoʻoni ʻa Sihová ʻa e Kolosí ʻi Heʻenau Lotú?

ʻOku vakai ʻa e kakai tokolahi ki he kolosí ko ha fakaʻilonga fakaemāmanilahi ia ʻo e lotu faka-Kalisitiané. Neongo ko e kau Kalisitiane ʻa e Kau Fakamoʻoni ʻa Sihová, ʻoku ʻikai ke mau ngāueʻaki ʻa e kolosí ʻi heʻemau lotú. Ko e hā hono ʻuhingá?

Ko e ʻuhinga ʻe taha ʻoku fakahaaʻi ʻe he Tohi Tapú naʻe ʻikai pekia ʻa Sīsū ʻi ha kolosi ka ʻi ha ʻakau pē. ʻIkai ko ia pē, ʻoku fakatokanga mālohi ʻe he Tohi Tapú ki he kau Kalisitiané ke “hola mei he tauhi ʻaitolí,” ʻa ia ʻe ʻuhingá ko e ʻikai ngāueʻaki ʻa e kolosí ʻi he lotú.​—1 Kolinitō 10:14; 1 Sione 5:​21.

Ko e meʻa mahuʻingá, naʻe pehē ʻe Sīsū: “ʻI he meʻá ni ʻe ʻilo ai ʻe he faʻahinga kotoa ko kimoutolú ko ʻeku kau ākonga, ʻo kapau ʻoku mou maʻu ʻa e ʻofá ʻi homou lotolotongá.” (Sione 13:34, 35) Naʻe fakahaaʻi ai ʻe Sīsū ko e ʻofa feilaulauʻi-kitá​—ʻikai ko e kolosí pe ko ha toe ʻīmisi—te ne fakaʻilongaʻi hono kau muimui moʻoní.