ʻOku Fai ʻe he Kau Fakamoʻoni ʻa Sihová ʻa e Ngāue Fakamisinalé?

ʻIo. Pe ko fē pē feituʻu ʻoku mau nofo aí, ko e kotoa ʻo e Kau Fakamoʻoni ʻa Sihová ʻoku nau feinga ke maʻu ha fakakaukau pe laumālie fakamisinale, ʻo vahevahe maʻu pē ʻemau tuí mo e kakai ʻoku mau fetaulaki mo iá.​—Mātiu 28:19, 20.

Tānaki atu ki aí, ʻoku ʻaʻahi ʻa e Kau Fakamoʻoni ʻe niʻihi pe hiki ki he ngaahi feituʻu ʻi honau fonuá ʻa ia ʻoku tokolahi ai ʻa e kakai ʻoku teʻeki ke nau fanongo ki he ongoongo lelei mei he Tohi Tapú. Ko e Kau Fakamoʻoni ʻe niʻihi ʻoku nau hiki ki he ngaahi fonua mulí koeʻuhí ke fakalahi ʻenau ngāue fakafaifekaú. ʻOku nau fiefia ke kau ʻi hono fakahoko ʻa e kikite naʻe fai ʻe Sīsū: “Te mou hoko ko e kau fakamoʻoni kiate au . . . ki he feituʻu taupotu taha ʻo e māmaní.”​—Ngāue 1:8.

ʻI he 1943, naʻa mau fokotuʻu ha ʻapiako ke tokonaki ʻa e ngaahi ako makehe ki he niʻihi ʻemau kau misinalé. Talu mei he taimi ko iá, laka hake ʻi he Kau Fakamoʻoni ʻe toko 8,000 kuo nau maʻu ʻa e ako ko ení, ʻoku ʻiloa ko e Akoʻanga Tohi Tapu Taua Leʻo ko Kiliatí.