ʻEKE ʻE HE TOʻUTUPÚ
Ko e Fakamalingá ko ha Meʻa Fakaoli ʻo ʻIkai Hano Maumau?
Ko e hā ʻa e fakamalinga?
Ko e kakai ʻe niʻihi ʻoku nau fakakaukau ki he fakamalingá ko hano fakahaaʻi atu ia ʻi he leá pe ngāué ʻokú ke manako ʻi ha tokotaha. ʻOku hala ke fakahaaʻi ʻokú ke manako ʻi ha tokotaha? ʻIkai ʻaupito. “Kapau ʻokú ke ʻi ha tuʻunga ke faialea pea ʻokú ke saiʻia ʻi ha tokotaha,” ko e lea ia ʻa ha kiʻi finemui ko Ann, “ko e hā ha toe founga ʻe lava ke ke ʻiloʻi ai pe ʻokú mo fetokangaʻaki?”
Kae kehe, ʻi he kupu ko ení, te tau lāulea ai ki he faʻahinga fakamalinga ʻoku kau ki ai hoʻo tōʻonga ʻo hangē ʻokú ke manako ʻi ha tokotaha ʻosi ange ko iá ʻoku ʻikai haʻo taumuʻa pehē.
“Ko hoʻo tokanga makehe ki ha taha koeʻuhí ʻokú ke loto ke kamataʻi ha vā fakaemanako mo ia ko e meʻa ia ʻe taha. Ka ʻoku kehe ʻa e tuʻungá ʻi he taimi ʻokú ke tohoakiʻi mai ai ʻa e tokanga ʻa ha taha pea tukunoaʻi ia koeʻuhí naʻe ʻikai ʻaupito ke ke fakamātoato koe ia.”—Deanna.
Ko e hā ʻoku fai pehē ai ʻa e kakai ʻe niʻihi?
Ko e kakai ʻe niʻihi ʻoku nau fakamalinga koeʻuhí pē ke fakalahi ʻenau tokaʻi-kitá. “ʻI hoʻo ʻiloʻi ʻe lava ke ke tohoakiʻi mai ʻa e faʻahinga tokanga ko iá, te ke loto nai ke toutou fai pehē,” ko e lea ia ʻa ha kiʻi finemui ko Hailey.
Ka ʻo kapau ʻokú ke fakahaaʻi ʻosi fakakaukauʻi ʻokú ke manako ʻi ha taha ka ko hono moʻoní ʻoku ʻikai ke pehē ia, ʻokú ke mātuʻaki taʻetokaʻi ai ʻa e ongoʻi ʻa e tokotaha ʻe tahá. Te ke fehuʻia foki hoʻo fakafuofua leleí. ʻOku pehē ʻi he Tohi Tapú: “Ko e valé ko ha meʻa fakafiefia ia ki he tokotaha ʻoku ʻikai ke fakakaukau leleí.”—Palōveepi 15:21.
ʻI ha ʻuhinga lelei, ʻoku fakamulitukuʻaki ʻe Hailey, “ʻI he kamatá ko e fakamalingá ʻe ʻikai nai hano maumau, ka ʻoku faʻa iku atu ia ki he fakatuʻutāmaki.”
Ko e hā hono ngaahi fakatuʻutāmakí?
Ko e fakamalingá ʻokú ne maumauʻi ho ongoongó.
“Ko ha tokotaha ʻoku fakamalinga ʻoku ʻikai ke ne ongoʻi malu mo anga-fakamatuʻotuʻa. ʻOkú ke ongoʻi nai ʻoku ʻikai ke ne faitotonu kiate koe ka ʻokú ne feinga pē ke maʻu ha meʻa meiate koe.”—Jeremy.
ʻOku pehē ʻi he Tohi Tapú: “Ko e ʻofá . . . ʻoku ʻikai te ne kumi ki heʻene lelei pē ʻaʻana.”—1 Kolinitō 13:4, 5.
Ke fakakaukau ki ai: Ko e hā ʻa e faʻahinga lea pe ngāue te ne ʻai koe ke ʻiloʻiʻaki ko ha tokotaha fakamalinga?
Ko e fakamalingá ʻokú ne fakalotomamahiʻi ʻa e tokotaha ʻokú ke fakamalinga ki aí.
“Kapau ʻoku ou fetaulaki mo ha taha ʻoku fakamalinga, ʻokú ne ʻai au ke fakamamaʻo meiate ia. ʻOku hangē ia ko e ʻuhinga pē ʻo ʻene talanoa mai kiate aú koeʻuhí ko e taʻahine au. Ko e kakai fakamalingá ʻoku ʻikai ke nau tokanga moʻoni mai kiate au; ʻoku nau tokanga pē fekauʻaki mo hono ʻai kinautolu ke ongoʻi lelei angé.”—Jaqueline.
ʻOku pehē ʻi he Tohi Tapú: “Tuku ki he tokotaha taki taha ke ne hanganaki kumi, ʻo ʻikai ki he lelei pē ʻaʻaná, ka ki he lelei ʻa e tokotaha kehé.”—1 Kolinitō 10:24.
Ke fakakaukau ki ai: Kuo faifai ange pea taki atu koe ke ke tui ʻoku manako ha tokotaha ʻiate koe, peá ke toki ʻiloʻi naʻá ke maʻuhala? Kapau ko ia, naʻe anga-fēfē hoʻo ongoʻí ʻi he hili iá? ʻE lava fēfē ke ke fakaʻehiʻehi mei hono fakalotomamahiʻi ha tokotaha kehe ʻi he founga ko iá?
Ko e fakamalingá ʻokú ne maumauʻi hoʻo ʻamanaki ke faialea loto-moʻoní.
“Ko ha tokotaha fakamalinga heʻikai ʻaupito loto ha tokotaha ke mali pe aʻu ʻo faialea mo ia. ʻE lava fēfē ke u ʻiloʻi pe falala moʻoni ki ha taha kapau ʻokú ne mātuʻaki fai ha fakangalingali?”—Olivia.
ʻI he Tohi Tapú ʻoku pehē ai ʻe he tokotaha-tohi-saame ko Tēvitá: “ʻOku ou fakaʻehiʻehi mei he faʻahinga ʻoku nau fufū honau tuʻunga totonú.”—Saame 26:4.
Ke fakakaukau ki ai: Ko e hā ʻa e faʻahinga tokotaha ʻoku fakamānako ki ha tokotaha fakamalinga? Ko e faʻahinga tokotaha ia ʻokú ke loto ke tohoakiʻi maí?