ʻEKE ʻE HE TOʻUTUPÚ
ʻE Lava Fēfē ke Tokoniʻi Au ʻe he Tohi Tapú?—Konga 1: Fekumi ʻi Hoʻo Tohi Tapú
“Naʻá ku feinga ke lau ʻa e Tohi Tapú, ka naʻá ku loto-siʻi koeʻuhi ko ʻene fuʻu lahí!”—Briana, 15.
ʻOku pehē hoʻo ongoʻí? Ko e kupu ko ení te ne tokoniʻi koe!
Ko e hā ke lau ai ʻa e Tohi Tapú?
ʻOku ongo fakapipiko ʻa e fakakaukau ki hono lau ʻa e Tohi Tapú? Kapau ko ia, ʻoku mahino pē ia. Te ke fakakaukau nai ki he Tohi Tapú ko ha tohi ʻoku laka hake hono pēsí he laui afé, ʻoku tohi mata iiki pea ʻikai ha fakatātā—pea ʻoku ʻikai manakoa ia hangē ko e TV mo e vitioó!
Ka ke fakakaukau angé ki ai ʻi he foungá ni: Kapau te ke sio ki ha fuʻu puha tukuʻanga koloa ʻi he kuonga muʻá, te ke fieʻilo nai fekauʻaki mo e meʻa ʻoku ʻi lotó?
Ko e Tohi Tapú ʻoku hangē ia ko e puha tukuʻanga koloa ko iá. ʻOku ʻi ai ʻa e ngaahi makakoloa ʻo e potó ʻa ia te ne tokoniʻi koe ke
Fai ha ngaahi fili lelei
Fetaulaki lelei ange mo hoʻo mātuʻá
Maʻu ʻa e ngaahi kaumeʻa lelei tahá
Fekuki mo e loto-moʻuá
ʻE lava fēfē ke ʻaonga ha tohi mei he kuonga muʻá ki hotau ʻahó ni? Koeʻuhí “ko e potu Folofola kotoa pē kuo fakamānavaʻi ia ʻe he ʻOtuá.” (2 Tīmote 3:16) ʻOku ʻuhinga iá ko e faleʻi ʻi he Tohi Tapú ko e haʻu ia mei he Matavai lelei taha ʻoku ala maʻú.
Ko e Tohi Tapú ko ha puha tukuʻanga koloa ʻa ia ʻoku ʻi ai ʻa e ngaahi koloa mahuʻinga taʻefakatataua ʻo e potó
ʻOku totonu ke fēfē ʻeku lau ʻa e Tohi Tapú?
Ko e founga ʻe taha ko hono lau ʻa e Tohi Tapú mei he kamataʻangá ki heʻene ʻosi. ʻE ʻoatu ai kiate koe ha vakai fakalūkufua ki he pōpoaki ʻi he Tohi Tapú. ʻOku lahi ʻa e ngaahi founga ke lau ai ʻa e Tohi Tapú. Fakakaukau ki ha fakatātā ʻe ua:
ʻE lava ke ke lau fakahokohoko ʻa e tohi ʻe 66 ʻi he Tohi Tapú meia Sēnesi kia Fakahā.
ʻE lava ke ke lau ʻi he fakahokohoko taimi ʻa e Tohi Tapú—ʻa ia ʻi he fakahokohoko ʻo e ngaahi meʻa naʻe hoko, ka ʻoku nau felāveʻi.
Fokotuʻu: ʻOku ʻomai ʻi he fakamatala fakalahi A7 ʻi he Liliu Tohi Tapu Māmani Foʻoú ʻa e lisi fakahokohoko ʻa e ngaahi meʻa tefito ne hoko ʻi he moʻui ʻa Sīsuú ʻi he māmaní.
Ko e founga hono ua ke lau ʻa e Tohi Tapú ko hono fili ha fakamatala ʻoku felāveʻi mo ha pole ʻokú ke fehangahangai mo ia. Ko e fakatātaá:
Te ke saiʻia ke maʻu ha ngaahi kaumeʻa falalaʻanga? Lau ʻa e talanoa ʻo Sionatane mo Tēvitá. (1 Sāmiuela, vahe 18-20) Pea ngāueʻaki ʻa e pepa ngāue “Founga ke Maʻu ha Ngaahi Kaumeʻa Mateaki” ke ako ai ha ngaahi lēsoni ʻaonga mei he fakamatalá.
Te ke saiʻia ke fakaivimālohiʻi hoʻo malava ke talitekeʻi ʻa e fakatauelé? Lau ʻa e talanoa ʻo e founga hono talitekeʻi ʻe Siosifa ʻa e fakatauelé. (Sēnesi, vahe 39) Pea ngāueʻaki ʻa e pepa ngāue “Founga ke Talitekeʻi ʻa e Fakatauelé . . . Siosifa—Konga 1” mo e “Tukuakiʻi Loi! Siosifa—Konga 2” ke ako ai ha ngaahi lēsoni ʻaonga mei he fakamatalá.
Te ke saiʻia ke ako ki he founga ʻe tokoniʻi ai koe ʻe he lotú? Lau ʻa e hokosia ʻa Nehemaiá. (Nehemaia, vahe 2) Pea ngāueʻaki ʻa e pepa ngāue “Tali ʻe he ʻOtuá ʻEne Lotú” ke ako ai ha ngaahi lēsoni ʻaonga mei he fakamatalá.
Fokotuʻu: ʻI he taimi ʻokú ke lau ai ʻa e Tohi Tapú, fakapapauʻi ʻoku lōngonoa ʻa e ʻātakaí koeʻuhi ke ke lava ai ʻo tokangataha.
Ko e founga hono tolu ke lau ʻa e Tohi Tapú ko hono fili ha fakamatala pe ha saame, lau ia, pea fakakaukau leva ki he founga ʻe lava ke ke ngāueʻaki ai iá. Hili hono lau iá, ʻeke hifo kiate koe ʻa e ngaahi fehuʻi hangē ko ení:
Ko e hā naʻe fakakau ai eni ʻe Sihova ʻi he Tohi Tapú?
Ko e hā ʻokú ne fakahaaʻi mai fekauʻaki mo e ʻulungaanga ʻo Sihová pe founga ʻo ʻene fai ʻa e ngaahi meʻá?
ʻE lava fēfē ke u ngāueʻaki ʻa e fakamatala ko ení ʻi heʻeku moʻuí?
Fokotuʻu: ʻAi ha taumuʻa! Tohiʻi hifo ʻa e ʻaho ʻokú ke saiʻia ke kamata ai hoʻo polokalama lau Tohi Tapú.