ʻOku Fakamoʻoniʻi ʻe he Ngaahi Kikite Faka-Mīsaiá ko Sīsū ʻa e Mīsaiá?

Tali ʻa e Tohi Tapú

ʻIo. Lolotonga ʻa e ʻi māmani ʻa Sīsuú, naʻá ne fakahoko ʻa e ngaahi kikite lahi fekauʻaki mo e “Mīsaia ko e Takimuʻá,” ʻa ia ko e tokotaha ʻe hoko ko e “Fakamoʻui ʻo e māmaní.” (Taniela 9:25; 1 Sione 4:14) Pea naʻa mo e hili ʻa e pekia ʻa Sīsuú, naʻe hokohoko atu pē ʻene fakahoko ʻa e ngaahi kikite Faka-Mīsaiá.—Saame 110:1; Ngāue 2:34-36.

Ko e hā ʻa e ʻuhinga ʻo e “Mīsaia”?

Ko e foʻi lea faka-Hepelū ko e Ma·shiʹach (Mīsaia) ʻoku tatau ia mo e foʻi lea faka-Kalisi ko e Khri·stos (Kalaisi) ʻokú na ʻuhinga fakatouʻosi ko e “Tokotaha Paní.” Ko ia ai, ko e “Sīsū Kalaisí” ʻoku ʻuhinga ko “Sīsū ko e Tokotaha Paní,” pe “Sīsū ko e Mīsaiá.”

ʻI he taimi ʻo e Tohi Tapú, ʻoku faʻa pani ha tokotaha ke hoko ki ha tuʻunga mafai makehe ʻaki hono lilingi ʻa e lolo ʻi hono ʻulú. (Livitiko 8:12; 1 Sāmiuela 16:13) Naʻe pani ʻa Sīsū ʻe he ʻOtuá ke hoko ko e Mīsaiá—ko ha tuʻunga mafai lahi. (Ngāue 2:36) Kae kehe, ʻi he ʻikai pani ʻa Sīsū ʻaki ʻa e loló, naʻe pani ia ʻe he ʻOtuá ʻaki ʻa e laumālie māʻoniʻoni.—Mātiu 3:16.

ʻE malava ki ha toe tokotaha ke ne fakahoko ʻa e kikite Faka-Mīsaiá?

ʻIkai. ʻI he hangē pē ko hano fakapapauʻi ʻe ha fakaʻilonga nima ha toko taha pē, ko hono fakahoko ʻo e ngaahi kikite ʻi he Tohi Tapú ʻoku tuhu ia ki ha Mīsaia pē ʻe taha, pe ko e Kalaisí. Neongo ia, ʻoku fakatokanga ʻi he Tohi Tapú “ʻe tupu hake ha kau Kalaisi loi mo ha kau palōfita loi pea te nau fai ha ngaahi mana lalahi mo ha ngaahi meʻa fakaofo ke takihalaʻi ʻaki naʻa mo e faʻahinga kuo filí, ʻo ka malava.”—Mātiu 24:24.

ʻE malava ke hā ʻa e Mīsaiá ʻi he kahaʻú?

ʻIkai. Naʻe tomuʻa tala ʻi he Tohi Tapú ko e Mīsaiá ʻe haʻu mei he hako ʻo Tuʻi Tēvita ʻo ʻIsilelí. (Saame 89:3, 4) Kae kehe, ko e ngaahi lēkooti tukufakaholo ʻa e kau Siú fekauʻaki mo Tēvitá naʻe mole ia, ngalingali ne mole ʻi hono fakaʻauha ʻe he kau Lomá ʻa Selusalema ʻi he 70 T.S.a Talu mei he taimi ko iá, mo e ʻikai malava ʻe ha taha ke fakamoʻoniʻi ʻokú ne kau ki he fāmili ʻo Tuʻi Tēvitá. ʻI hono kehé, ko e ngaahi lēkooti ko iá naʻe kei maʻu pē ia ʻi he taimi ʻo Sīsuú, ko e ʻuhinga ia naʻe ʻikai ke lavameʻa ai e poleʻi ia ʻe hono ngaahi filí ʻi heʻene pehē ko e hako ia ʻo Tēvitá.—Mātiu 22:41-46.

Ko e kikite Faka-Mīsaia ʻe fiha ʻoku ʻi he Tohi Tapú?

ʻOku ʻikai malava ke tala tonu ʻa e lahi ʻo e ngaahi kikite Faka-Mīsaiá. Ko e fakatātaá, ko e founga hono lau ʻo e ngaahi kikité ʻe kehekehe pē naʻa mo e ngaahi fakamatala mahino fekauʻaki mo e Mīsaiá. Ko e fakamatala ʻi he ʻAisea 53:2-7 ʻoku lave ai ki he ngaahi kikite fekauʻaki mo e Mīsaiá. ʻE lau nai ʻe he niʻihi ʻa e fakamatalá kotoa ko ha foʻi kikite pē ʻe taha, ka ko e niʻihi te nau vakai nai ki he tafaʻaki taki taha ko ha ngaahi kikite kehekehe ia.

Niʻihi ʻo e ngaahi kikite Faka-Mīsaia naʻe fakahoko ʻe Sīsū

Kikite	Maʻu ʻi he	Fakahoko
Hako ʻo ʻĒpalahamé	Sēnesi 22:17, 18	Mātiu 1:1
Hako ʻo e foha ʻo ʻĒpalahame ko ʻAisaké	Sēnesi 17:19	Mātiu 1:2
Fanauʻi ʻi ʻIsileli ʻi he matakali ʻo Siutá	Sēnesi 49:10	Mātiu 1:1, 3
Mei he laine fakatuʻi ʻo Tuʻi Tēvitá	ʻAisea 9:7	Mātiu 1:1
Fanauʻi ʻe ha tāupoʻou	ʻAisea 7:14	Mātiu 1:18, 22, 23
ʻAloʻi ʻi Pētelihema	Maika 5:2	Mātiu 2:1, 5, 6
Ui ʻaki ʻa e hingoa ʻImānuelab	ʻAisea 7:14	Mātiu 1:21-23
Kamata ʻi he anga-fakatōkilalo	ʻAisea 53:2	Luke 2:7
Tāmateʻi ʻo e fānau valevalé hili hono fanauʻi ʻo Sīsuú	Selemaia 31:15	Mātiu 2:16-18
Ui mai mei ʻIsipite	Hōsea 11:1	Mātiu 2:13-15
Ui ko e Nāsaletic	ʻAisea 11:1	Mātiu 2:23
Muʻomuʻa ha talafekau	Malakai 3:1	Mātiu 11:7-10
Pani ko ha Mīsaia ʻi he 29 T.S.d	Taniela 9:25	Mātiu 3:13-17
Fakahaaʻi ʻe he ʻOtuá ko Hono ʻAló	Saame 2:7	Ngāue 13:33, 34
Mamahiʻi ʻa e fale ʻo e ʻOtuá	Saame 69:9	Sione 2:13-17
Talaki ʻo e ongoongo leleí	ʻAisea 61:1	Luke 4:16-21
Ngāue fakafaifekau ʻi Kālelí ko ha maama lahi	ʻAisea 9:1, 2	Mātiu 4:13-16
Tokotaha ngāue fakaemana hangē ko Mōsesé	Teutalōnome 18:15	Ngāue 2:22
Hangē ko Mōsesé, naʻá ne leaʻaki ʻa e ngaahi fakakaukau ʻa e ʻOtuá	Teutalōnome 18:18, 19	Sione 12:49
Fakamoʻui ʻa e tokolahi naʻe mahamahaki	ʻAisea 53:4	Mātiu 8:16, 17
ʻIkai tohoakiʻi ʻa e tokangá kiate ia tonu	ʻAisea 42:2	Mātiu 12:17, 19
Fakahāhā ʻa e manavaʻofa ki he kau faingataʻaʻiá	ʻAisea 42:3	Mātiu 12:9-20; Maʻake 6:34
Fakahaaʻi ʻa e fakamaau totonu ʻa e ʻOtuá	ʻAisea 42:1, 4	Mātiu 12:17-20
Tokotaha Faleʻi Fakaofo	ʻAisea 9:6, 7	Sione 6:68
Talaki ʻa e huafa ʻo Sihová	Saame 22:22	Sione 17:6
Leaʻaki ʻa e ngaahi talanoa fakatātā	Saame 78:2	Mātiu 13:34, 35
Ko ha Taki	Taniela 9:25	Mātiu 23:10
ʻIkai tui ʻa e tokolahi kiate ia	ʻAisea 53:1	Sione 12:37, 38
Maka tūkiaʻanga	ʻAisea 8:14, 15	Mātiu 21:42-44
Siʻaki ʻe he faʻahinga ʻo e tangatá	Saame 118:22, 23	Ngāue 4:10, 11
Fehiʻa taʻeʻuhinga	Saame 69:4	Sione 15:24, 25
Hū fakatuʻi ki Selusalema ʻi ha ʻasi	Sākalaia 9:9	Mātiu 21:4-9
Fakahīkihikiʻi ʻe he fānaú	Saame 8:2	Mātiu 21:15, 16
Haʻu ʻi he huafa ʻo Sihová	Saame 118:26	Sione 12:12, 13
Lavakiʻi ʻe ha kaumeʻa falalaʻanga	Saame 41:9	Sione 13:18
Lavakiʻi ki ha konga siliva ʻe 30e	Sākalaia 11:12, 13	Mātiu 26:14-16; 27:3-10
Liʻaki ia hono ngaahi kaumeʻá	Sākalaia 13:7	Mātiu 26:31, 56
Kau fakamoʻoni loi fekauʻaki mo ia	Saame 35:11	Mātiu 26:59-61
Fakalongolongo ʻi he ʻao hono kau tukuakiʻí	ʻAisea 53:7	Mātiu 27:12-14
ʻAnuhi	ʻAisea 50:6	Mātiu 26:67; 27:27, 30
Taaʻi ʻi he ʻulú	Maika 5:1	Maʻake 15:19
Haha	ʻAisea 50:6	Sione 19:1
ʻIkai ke talitekeʻi ʻa e faʻahinga naʻa nau taaʻi iá	ʻAisea 50:6	Sione 18:22, 23
Faʻufaʻu ʻe he kau taki fakapuleʻangá ha kovi kiate ia	Saame 2:2	Luke 23:10-12
Tutuki hono nimá mo e vaʻé ki he ʻakaú	Saame 22:16	Mātiu 27:35; Sione 20:25
Fai ʻe he kakaí ha lulu ki hono ngaahi kofú	Saame 22:18	Sione 19:23, 24
Lau fakataha mo e kau angahalá	ʻAisea 53:12	Mātiu 27:38
Manukiʻi, leakoviʻi	Saame 22:7, 8	Mātiu 27:39-43
Faingataʻaʻia maʻá e kau angahalaʻiá	ʻAisea 53:5, 6	1 Pita 2:23-25
Hā ngali liʻaki ʻe he ʻOtuá	Saame 22:1	Maʻake 15:34
ʻOange ʻa e uaine mahi mo e uaine kuo huʻi ʻaki ʻa e ʻahu ke inu	Saame 69:21	Mātiu 27:34
Fieinua ki muʻa pē ke pekiá	Saame 22:15	Sione 19:28, 29
Tuku atu hono laumālié ki he ʻOtuá	Saame 31:5	Luke 23:46
Mole ʻene moʻuí	ʻAisea 53:12	Maʻake 15:37
Tokonaki ʻa e huhuʻí ke toʻo atu ʻa e angahalá	ʻAisea 53:12	Mātiu 20:28
ʻIkai fasi hano hui	Saame 34:20	Sione 19:31-33, 36
Hokaʻi	Sākalaia 12:10	Sione 19:33-35, 37
Tanu fakataha mo e koloaʻiá	ʻAisea 53:9	Mātiu 27:57-60
Fokotuʻu hake mei he maté	Saame 16:10	Ngāue 2:29-31
Fetongi ʻa e tokotaha lavakí	Saame 109:8	Ngāue 1:15-20
Nofo ʻi he nima toʻomataʻu ʻo e ʻOtuá	Saame 110:1	Ngāue 2:34-36

a ʻOku fakamatala ʻa e Cyclopedia ʻa McClintock mo Strong: “ʻOku lava ke siʻi ʻa e veiveiua ko e ngaahi lēkooti ʻo e ngaahi matakali mo e ngaahi fāmili Siú naʻe mole ia ʻi hono fakaʻauha ʻo Selusalemá, ʻo ʻikai ki muʻa ai.”

b Ko e hingoa faka-Hepelū ko e ʻImānuelá, ʻoku ʻuhingá “ʻOku ʻIate Kitautolu ʻa e ʻOtuá,” ʻa ia ʻoku fakamatalaʻi mahino ai ʻa e ngafa ʻo Sīsū ko e Mīsaiá. Ko ʻene ʻi he māmaní mo ʻene ngaahi ngāué naʻe fakamoʻoniʻi ai ʻoku kau ʻa e ʻOtuá mo ʻene kau lotú.—Luke 2:27-32; 7:12-16.

c Ko e foʻi lea “Nāsaleti” ʻoku ngalingali ko ʻene haʻu mei he foʻi lea faka-Hepelū ko e neʹtser, ʻoku ʻuhingá ko e “huli.”

d Ki ha fakaikiiki ʻo e fakahokohoko taimi ʻi he Tohi Tapú ʻa ia ʻoku tuhu ki he 29 T.S ko e taʻu naʻe aʻu mai ai ʻa e Mīsaiá, sio ki he kupu “Naʻe Tomuʻa Tala ʻe he Kikite ʻa Tanielá ʻa e Aʻu Mai ʻa e Mīsaiá.”

e Ko e kikite ko ení ʻoku hā ia ʻi he tohi ʻa Sākalaiá, neongo ʻoku pehē ʻe he tokotaha-tohi Tohi Tapu ko Mātiú “naʻe folofolaʻaki fakafou ʻi he palōfita ko Selemaiá.” (Mātiu 27:9) ʻOku ngalingali ko e tohi ʻa Selemaiá naʻe faʻa muʻomuʻa ia ʻi he konga ʻo e Tohi Tapú ʻoku ui ko e “Kau Palōfitá.” (Luke 24:44) Ngalingali naʻe ngāueʻaki ʻe Mātiu ʻa “Selemaia” ke lave ki he konga kotoa ʻo e tohi ko iá, ʻa ia naʻe kau ki ai ʻa e tohi Sākalaiá.