Ko e Hā ʻOku Ui Ai ʻa Sīsū ko e ʻAlo ʻo e ʻOtuá?

Tali ʻa e Tohi Tapú

ʻOku ui ʻi he Tohi Tapú ʻa Sīsū ‘ko e ʻAlo ʻo e ʻOtuá.’ (Sione 1:49) Ko e lea ‘ʻAlo ʻo e ʻOtuá’ ʻoku fakamoʻoniʻi ai ko e ʻOtuá ʻa e Tokotaha-Fakatupú, pe ko e Matavai ia ʻo e moʻui kotoa pē, kau ai ʻa Sīsū. (Saame 36:9; Fakahā 4:11) ʻOku ʻikai ke akoʻi he Tohi Tapú naʻe hoko ʻa e ʻOtuá ko ha tamai ki ha kiʻi tama ʻi he founga tatau ʻoku fakatupu ai ʻe he tangatá ʻenau fānaú.

ʻOku toe ui ʻe he Tohi Tapú ʻa e kau ʻāngeló ko e “ngaahi foha ʻo e ʻOtua moʻoní.” (Siope 1:6) Pea ʻoku toe pehē ʻe he Tohi Tapú ko e ʻuluaki tangatá, ʻa ʻĀtama ko ha “foha ʻo e ʻOtuá.” (Luke 3:38) Kae kehe, koeʻuhi ko Sīsū ʻa e ʻuluaki fakatupu ʻa e ʻOtuá pea ko ia toko taha pē naʻe fakatupu fakahangatonu ʻe he ʻOtuá, ʻoku fakamatalaʻi ai ia ʻe he Tohi Tapú ko e Foha tuʻu-ki-muʻa ʻo e ʻOtuá.

• Naʻe moʻui ʻa Sīsū ʻi hēvani ki muʻa ke ʻaloʻi ia ʻi he māmaní?

• Ko e hā naʻe fai ʻe Sīsuú ki muʻa ke ne haʻu ki he māmaní?

Naʻe moʻui ʻa Sīsū ʻi hēvani ki muʻa ke ʻaloʻi ia ʻi he māmaní?

ʻIo. Ko ha meʻamoʻui laumālie ʻa Sīsū ʻi hēvani ki muʻa ke ʻaloʻi mai ko ha tangata ʻi he māmaní. Naʻe pehē tonu ʻe Sīsū: “Kuó u ʻalu hifo mei he langí.”​—Sione 6:38; 8:23.

Naʻe fakatupu ʻe he ʻOtuá ʻa Sīsū ki muʻa ke ne fakatupu ha toe meʻa kehe. ʻI he fekauʻaki mo Sīsuú, ʻoku pehē ʻi he Tohi Tapú:

• “Ko ia . . . ko e ʻuluaki fakatupu ia ʻi he meʻa fakatupu kotoa pē.”​—Kolose 1:15.

• Ko ia “ko e kamataʻanga ʻo e fakatupu ʻe he ʻOtuá.”​—Fakahā 3:14.

Naʻe fakahoko ʻe Sīsū ʻa e kikite fekauʻaki mo e tokotaha ʻa ia “ko hono tupuʻangá ʻoku talu mei muʻa, mei he ngaahi ʻaho ʻo e kuohilí.”​—Maika 5:2; Mātiu 2:4-6.

Ko e hā naʻe fai ʻe Sīsuú ki muʻa ke ne haʻu ki he māmaní?

Naʻá ne maʻu ha tuʻunga fakahēvani naʻe hakeakiʻi. Naʻe lave ʻa Sīsū ki he tuʻunga ko ení ʻi he taimi naʻá ne lotu ai:“Tamai, ke ke fakalāngilangiʻi au . . . ʻaki ʻa e lāngilangi naʻá ku maʻu ʻi heʻeku ʻi ho tafaʻakí ki muʻa ke tuʻu ʻa e māmaní.”​—Sione 17:5.

Naʻá ne tokoni ki heʻene Tamaí ʻi hono fakatupu ʻo e ngaahi meʻá kotoa. Naʻe ngāue ʻa Sīsū fakataha mo e ʻOtuá “ko ha tufunga pōtoʻi.” (Palōveepi 8:30) ʻI he fekauʻaki mo Sīsuú, ʻoku pehē ʻi he Tohi Tapú: “Naʻe fakafou ʻiate ia, ʻa hono fakatupu ʻa e ngaahi meʻa kehe kotoa pē ʻi he langí pea ʻi he māmaní.”​—Kolose 1:16.

Naʻe ngāue ʻa e ʻOtuá fakafou ʻia Sīsū ke fakatupu ʻa e ngaahi meʻa kehe kotoa pē. Ko e fakatupu ko ení naʻe kau ki ai ʻa e ngaahi meʻamoʻui laumālie kotoa pē pea kau ki ai mo e ʻunivēsí. (Fakahā 5:11) ʻI he tuʻunga ko ení, ko e ngāue fakataha ʻa e ʻOtuá mo Sīsuú ʻoku hangē ia ko e ngāue fakataha ha ʻākiteki mo ha tokotaha langa. Ko e tokotaha ʻākitekí ʻokú ne faʻu ʻa e palaní; ko e tokotaha langá leva ʻokú ne langa ʻo fakatatau ki he palaní.

Naʻá ne hoko ko Folofola. ʻI he lea fekauʻaki mo e moʻui ʻa Sīsū ki muʻa ke hoko ko e tangatá, ʻoku ui he Tohi Tapú ʻa Sīsū ko “Folofola.” (Sione1:1) ʻOku hā mahino, ʻoku ʻuhinga ení naʻe ngāueʻaki ʻe he ʻOtuá ʻa hono ʻAló ke ʻoatu ʻa e fakamatala mo e ngaahi tuʻutuʻuni ki he ngaahi meʻamoʻui laumālie kehé.

ʻOku hā naʻe toe hoko ʻa Sīsū ko ha Tangata-Lea ʻa e ʻOtuá ki he faʻahinga ʻo e tangatá. Ngalingali naʻe lea ʻa e ʻOtuá ʻo fakafou ʻia Sīsū, ʻa ia ko Folofola, ʻi hono ʻoatu ʻa e ngaahi tuʻutuʻuni kia ʻĀtama mo ʻIvi ʻi he ngoue ko ʻĪtení. (Sēnesi 2:16, 17) Ngalingali ko Sīsū ʻa e ʻāngelo naʻá ne tataki ʻa e kau ʻIsilelí ʻi he toafá pea ko ia ʻa e leʻo naʻe pau ke talangofua ki ai ʻa e kau ʻIsilelí.​—ʻEkisoto 23:20-23.a