Ko e Hā ʻOku Leaʻaki ʻe he Tohi Tapú Fekauʻaki mo Hono Tokangaʻi ʻo e Ngaahi Mātuʻa Taʻumotuʻá?

Tali ʻa e Tohi Tapú

Ko e fānau lalahí ʻoku nau maʻu ha fatongia mahuʻinga ʻa ia ko hono fakapapauʻi ʻoku tokangaʻi lelei ʻenau mātuʻa taʻumotuʻá. ʻOku pehē ʻi he Tohi Tapú ko e fānau lalahí ʻoku totonu ke “tuku ke nau fuofua fakaha enau aga fakalotu i abi, bea totogi lelei ki heenau mātua . . . , he oku lelei bea malie ia i he ao oe Otua.” (1 Tīmote 5:4, Paaki Motuʻa) ʻI he taimi ʻoku fakapapauʻi ai ʻe he fānau lalahí ʻoku tokangaʻi lelei ʻa ʻenau mātuʻa taʻumotuʻá, ʻoku nau toe talangofua ai ki he fekau ke fakaʻapaʻapaʻi ʻenau ngaahi mātuʻá.​—ʻEfesō 6:2, 3.

ʻOku ʻikai ke ʻomai ia ʻi he Tohi Tapú ha fakamatala fakaikiiki ki he founga hono tokangaʻi ʻa e ngaahi mātuʻa taʻumotuʻá. Kae kehe, ʻokú ne ʻomai ʻa e ngaahi faʻifaʻitakiʻanga ʻo e kau tangata mo e kau fefine ʻo e tuí ʻa ia naʻa nau fai pehē. ʻOku toe ʻomai foki ai ʻa e ngaahi faleʻi ʻaonga ʻe lava ke tokoni ki he faʻahinga ʻoku nau tokangaʻi ʻenau ngaahi mātuʻá.

• Naʻe anga-fēfē hono tokangaʻi ʻe he niʻihi ʻenau mātuʻa taʻumotuʻá ʻi he taimi ʻo e Tohi Tapú?

• Ko e hā ʻa e faleʻi ʻaonga mei he Tohi Tapú ʻe tokoni ki he faʻahinga ʻoku nau tokangaʻi ʻenau ngaahi mātuʻá?

• ʻOku pehē nai ʻe he Tohi Tapú ko ha fiemaʻu pau ia ke tokangaʻi ʻa e ngaahi mātuʻa taʻumotuʻá ʻi ʻapi?

Naʻe anga-fēfē hono tokangaʻi ʻe he niʻihi ʻenau mātuʻa taʻumotuʻá ʻi he taimi ʻo e Tohi Tapú?

Naʻa nau fai ia ʻi he ngaahi founga lahi, ʻo fakatatau ki he ngaahi tuʻungá.

• Ko Siosifa naʻá ne nofo mamaʻo mei heʻene tamai taʻumotuʻá, ʻa Sēkope. ʻI he malava pē ʻa Siosifa ke fai ha fokotuʻutuʻu kia Sēkope ke hiki mai ʻo nofo ofi kiate iá, naʻá ne fakahoko leva ia. Naʻe ʻoange leva ʻe Siosifa ʻa e nofoʻanga ke nofo ai ʻene tamaí, pea fafangaʻi mo maluʻi ia.​—Sēnesi 45:9-11; 47:11, 12.

• Ko Lute naʻá ne hiki ki he fonua ʻo ʻene faʻē-ʻi-he-fonó pea ngāue mālohi ke tokangaʻi ia.​—Lute 1:16; 2:2, 17, 18, 23.

• Ko Sīsū, ʻi ha taimi nounou ki muʻa ke pekiá, naʻá ne tuku ki he ʻapositolo ko Sioné ke ne tokangaʻi ʻene faʻeé, ʻa Mele, ʻa ia ko ha uitou nai ia.​—Sione 19:26, 27.a

Ko e hā ha faleʻi ʻaonga mei he Tohi Tapú ʻe tokoni ki he faʻahinga ʻoku nau tokangaʻi ʻenau ngaahi mātuʻá?

ʻOku ʻomai ʻe he Tohi Tapú ʻa e ngaahi tefitoʻi moʻoni ʻe lava ke ne tokoniʻi ʻa e faʻahinga ʻoku nau tokangaʻi ʻenau mātuʻa taʻumotuʻá ke fekuki mo e pole ʻo e ongoʻi helaʻia fakaesino mo fakaeongo he taimi ʻe niʻihi ʻi hono tokangaʻi kinautolú.

• Fakaʻapaʻapaʻi hoʻo ongo mātuʻá.

  Meʻa ʻoku leaʻaki ʻe he Tohi Tapú: “Fakaʻapaʻapa ki hoʻo tamaí mo hoʻo faʻeé.”​—ʻEkisoto 20:12.

  ʻE lava fēfē ke ngāueʻaki ʻa e tefitoʻi moʻoni ko ení? Fakahāhā ʻa e fakaʻapaʻapa ki hoʻo mātuʻá ʻaki hoʻo fakaʻatā kinaua ke na fai ʻa e ngaahi meʻa ʻokú na saiʻia aí. ʻI he lahi taha ʻe ala lavá, tuku ke nau fili ʻa e founga ke tokangaʻi ai kinautolú. ʻI he taimi tatau, fakahāhā kiate kinautolu ʻa e fakaʻapaʻapa ʻaki hono fai ha meʻa pē te ke lava ke tokoniʻi ai kinautolu.

• Feinga ke mahinoʻi hoʻo mātuʻá pea fakamolemoleʻi kinautolu.

  Meʻa ʻoku leaʻaki ʻe he Tohi Tapú: “Ko e vavanga fakaefakakaukau ʻa ha tangata ʻoku fakatuotuai moʻoni ai ʻa ʻene ʻitá, pea ko e meʻa fakaʻofoʻofa ia kiate ia ʻene tukunoaʻi ha fakatupu ʻita.”​—Palōveepi 19:11.

  ʻE lava fēfē ke ke ngāueʻaki ʻa e tefitoʻi moʻoni ko ení? Kapau ʻoku leaʻaki ʻe ha mātuʻa taʻumotuʻa ha lea ʻikai lelei kiate koe pe hā ngali ʻoku ʻikai houngaʻia ʻi ha meʻa ʻokú ke fai, ʻeke hifo kiate koe, ‘ʻE fēfē ʻeku ongoʻí kapau naʻá ku ʻi he tuʻunga meimei tatau?’ ʻI he taimi ʻokú ke feinga ai ke mahinoʻi pea fakamolemoleʻi kinautolú, te ke fakaʻehiʻehi ai mei hono ʻai ʻa e tuʻungá ke toe kovi angé.

• Kumi tokoni ki he niʻihi kehé.

  Meʻa ʻoku leaʻaki ʻe he Tohi Tapú: “ʻOku taʻelavameʻa ʻa e ngaahi palaní ʻi he ʻikai fai ha alēleá, ka ʻoku lavameʻa ia ʻi he tokolahi ʻa e kau faleʻí.”​—Palōveepi 15:22.

  ʻE lava fēfē ke ke ngāueʻaki ʻa e tefitoʻi moʻoni ko ení? Fai ha fekumi fekauʻaki mo e founga ke tokangaʻi ai ha mātuʻa ʻoku nau maʻu nai ha mahaki tauhi. Fekumi ki he ngaahi meʻa ʻe ala lava ʻi ho feituʻú ʻo fai ke tokoni kiate koe ʻi hono tokangaʻi hoʻo mātuʻá. Talanoa mo ha niʻihi ʻa ia kuo nau tokangaʻi ha mātuʻa taʻumotuʻa. Kapau ʻokú ke maʻu ha fanga tokoua pe fanga tuofāfine, talanoa mo kinautolu pea fai fakataha ha fili ki he founga ke tokangaʻi ai hoʻo mātuʻá.

  

• Hoko ʻo anga-fakanānā.

  Meʻa ʻoku leaʻaki ʻe he Tohi Tapú: “Ko e potó ʻoku ʻi he faʻahinga ia ʻoku anga-fakanānaá.”​—Palōveepi 11:2.

  ʻE lava fēfē ke ke ngāueʻaki ʻa e tefitoʻi moʻoni ko ení? Feinga ke mahinoʻi ʻa e meʻa te ke lava ʻo faí mo e meʻa ʻe ʻikai te ke lavá. Ko e fakatātaá, ʻoku fakangatangata ʻa e taimi mo e ivi ʻo e tokotaha kotoa. Ko e ngaahi fakangatangata ko ení ʻe lava ke ne uesia ʻa e ngaahi meʻa kotoa ʻokú ke loto ke fai maʻa hoʻo mātuʻá. Kapau ʻokú ke ongoʻi ʻoku fuʻu lahi ʻa e ngaahi meʻa ʻoku fiemaʻú kae lava ke ke toki tokangaʻi ai hoʻo mātuʻa taʻumotuʻá, ʻe lava ke ke kole ki ha tokoni mei he niʻihi kehe ʻi he fāmilí pe ko ha taha ʻoku taukei ʻi hono tokangaʻi ʻa e kau taʻumotuʻá.

• Fiemaʻu ke ke tokangaʻi mo koe foki.

  Meʻa ʻoku leaʻaki ʻe he Tohi Tapú: “ʻOku ʻikai ha tangata ʻe faifai ange peá ne fehiʻa ki hono sino pē ʻoʻoná, ka ʻokú ne fafanga mo tauhi ia.”​—ʻEfesō 5:29.

  ʻE lava fēfē ke ke ngāueʻaki ʻa e tefitoʻi moʻoni ko ení? Neongo ko ho fatongia ia ke tokangaʻi hoʻo mātuʻá, ka ʻoku toe fiemaʻu ke ke tokanga ki hoʻo ngaahi fiemaʻú foki pea pehē ki hoʻo fāmilí kapau ʻokú ke ʻosi mali. Tokangaʻi hoʻo kaí. ʻOku fiemaʻu ke ke maʻu ha mālōlō feʻunga. (Tangata Malanga 4:6) ʻI he taimi taki taha, ʻoku fiemaʻu ke ke vaheʻi ha taimi ke kiʻi mālōlō ai. ʻI hoʻo fai ʻa e ngaahi meʻá ni, te ke ʻi ha tuʻunga lelei ange ai​—fakaeongo, fakaeʻatamai mo fakaesino​—ke tokangaʻi hoʻo mātuʻá.

ʻOku pehē nai ʻe he Tohi Tapú ko ha fiemaʻu pau ia ke tokangaʻi ʻa e ngaahi mātuʻa taʻumotuʻá ʻi ʻapi?

ʻOku ʻikai ke ʻomai ʻe he Tohi Tapú ia ha fakahinohino pau ki he fānau lalahí kuo pau ke nau tokangaʻi ʻa e ngaahi mātuʻá ʻi ʻapi. ʻOku fili ʻa e ngaahi fāmili ʻe niʻihi ke tauhi ʻenau mātuʻa taʻumotuʻá ʻi ʻapi ʻi he lahi taha ʻe ala lavá. Ka ʻi ha tuʻunga nai ʻe niʻihi, te nau ongoʻi ko e fili lelei tahá ia ke ʻave ki he fale tauhiʻanga vaivaí. ʻE fakatahataha nai ʻa e fāmilí ke fili ʻa e meʻa ʻe lelei taha ki he mātuʻá mo e faʻahinga ʻoku nau tokangaʻi kinautolú.​—Kalētia 6:4, 5.