ʻAisea 41:10—“Oua Naa Ke Manavahe; He Oku ou Iate Koe”

“ʻOua ʻe ilifia, he ʻoku ou kau mo koe. ʻOua ʻe loto-moʻua, he ko au ʻa ho ʻOtuá. Te u fakaivimālohiʻi koe, ʻio, te u tokoniʻi koe, te u piki maʻu kiate koe ʻaki ʻa hoku nima toʻomataʻu ʻo e māʻoniʻoní.”—ʻAisea 41:10, Liliu Tohi Tapu Māmani Foʻoú.

“Oua naa ke manavahe; he oku ou iate koe: oua e loto vaivai; he ko au ko ho Otua teu fakamalohi koe; io, teu tokoni koe; io, teu boubou hake koe aki ae nima toomatau o eku agatonu.”—ʻAisea 41:10, Paaki Motuʻa.

ʻUhinga ʻo e ʻAisea 41:10

ʻOku fakapapauʻi mai ʻe Sihovaa ko e ʻOtuá ki heʻene kau lotu faitōnungá te ne poupouʻi kinautolu, ʻo tatau ai pe pē ko e hā ʻa e ngaahi palopalema te nau fehangahangai mo iá.

“ʻOku ou kau mo koe.” ʻOku ʻomai ʻe Sihova ki heʻene kau lotú ʻa e ʻuhinga ʻoku ʻikai totonu ai ke nau ilifiá—ʻoku ʻikai ke nau tuēnoa. Koeʻuhí ʻokú ne ʻafioʻi ʻa e meʻa ʻoku nau fouá pea ʻokú ne fanongo mai ki heʻenau ngaahi lotú, ʻo hangē ia ʻokú ne ʻi ai tonu mo kinautolú.—Saame 34:15; 1 Pita 3:12.

“Ko au ʻa ho ʻOtuá.” ʻOku fakafiemālieʻi ʻe Sihova ʻene kau lotú ʻaki hono fakamanatu kiate kinautolu ʻokú ne kei hoko pē ko honau ʻOtua pea ʻokú ne tali kinautolu ko ʻene kau lotu. ʻE lava ke nau fakapapauʻi heʻikai ʻaupito ha meʻa ʻe lava ke ne taʻofi ʻa e ʻOtuá mei hono tokoniʻi kinautolu.—Saame 118:6; Loma 8:32; Hepelū 13:6.

“Te u fakaivimālohiʻi koe, ʻio, te u tokoniʻi koe, te u piki maʻu kiate koe ʻaki ʻa hoku nima toʻomataʻu ʻo e māʻoniʻoní.” ʻOku toutou leaʻaki ʻe Sihova ʻa e foʻi fakakaukau tatau ʻi he ngaahi founga kehekehe ʻe tolu ke fakamamafaʻi te ne tokoniʻi moʻoni kinautolu. ʻOkú ne ngāueʻaki ha lea fakaefakatātā ke fakahaaʻi ʻa e meʻa te ne fai ʻi he taimi ʻoku fiemaʻu tokoni ai ʻene kakaí. Kapau ʻoku tō ha tokotaha, ʻoku ala mai ʻa Sihova ʻaki hono nima toʻomataʻú ke fusi hake ia.—ʻAisea 41:13.

Ko e founga tefito ʻoku fakaivimālohiʻi mo tokoniʻi ai ʻe he ʻOtuá ʻene kau lotú ʻoku fakafou mai ia ʻi heʻene Folofolá ko e Tohi Tapú. (Siosiua 1:8; Hepelū 4:12) Ko e fakatātaá, ʻoku ʻomai ʻe he Folofola ʻa e ʻOtuá ʻa e poto ʻaonga ki he faʻahinga ʻoku nau fehangahangai mo e ngaahi faingataʻa ʻo hangē ko e masivá, mahamahakí pe mole ha tokotaha ʻofeina ʻi he maté. (Palōveepi 2:6, 7) ʻOku toe ngāueʻaki foki ʻe he ʻOtuá hono laumālie māʻoniʻoní pe ivi ngāué, ke tokoni ki heʻene kau lotú ke nau maʻu ʻa e fakakaukau lelei pea ʻikai lōmekina kinautolu ʻe heʻenau ngaahi palopalemá.—ʻAisea 40:29; Luke 11:13.

Puipuituʻa ʻo e ʻAisea 41:10

Ko e ngaahi lea ko ení naʻá ne ʻoange ʻa e fakafiemālie ki he kau Siu faitōnunga naʻe taki pōpula ki mui ai ki Pāpiloné. Naʻe tomuʻa tala ʻe Sihova ʻi he ofi ki he ngata hono ʻave pōpula ʻa e kau Siú, ʻe ʻi ai ha ngaahi ongoongo ʻo ha tokotaha ikuna te ne laiki ʻa e ngaahi puleʻanga takatakaí pea fakaʻauha ʻa Pāpilone. (ʻAisea 41:2-4; 44:1-4) Lolotonga ʻa e ilifia ʻa Pāpilone mo e ngaahi puleʻanga takatakaí ʻi he ongoongo ko iá, naʻe ʻikai fiemaʻu ki he kau Siú ke nau hohaʻa, koeʻuhí ʻe maluʻi kinautolu ʻe Sihova. Naʻe tuʻo tolu ʻene fakapapauʻi kiate kinautolu ʻaki ʻa e ngaahi leá ni “ʻoua ʻe ilifia.”—ʻAisea 41:5, 6, 10, 13, 14.

Neongo ko e ngaahi leá ni naʻe fakataumuʻa ia ʻe Sihova ko e ʻOtuá ki he kau Siu faitōnunga naʻe taki pōpula ki Pāpiloné, ka naʻá ne fakapapauʻi foki ke fakatolonga mai ʻa e ngaahi lea ʻi he ʻAisea 41:10 ko ha fakafiemālie ki he kotoa ʻene kau lotú. (ʻAisea 40:8; Loma 15:4) ʻOkú ne tokoniʻi kinautolu ʻi he ʻahó ni ʻo hangē pē ko ʻene tokoniʻi ʻene kau sevāniti ʻi he kuohilí.