FAKAMATALAʻI ʻO E NGAAHI KONGA TOHI TAPÚ
Selemaia 29:11—“ʻOku Ou ʻIlo pe ʻa e Ngaahi Fakakaukau ʻOku Ou Fakakaukau Kiate Kimoutolu”
“‘ʻOku ou ʻiloʻi lelei ʻa e ngaahi fakakaukau ʻoku ou fakakaukau ʻaki kiate kimoutolú,’ ko e fakahaaʻi ia ʻe Sihová,a ‘ko e ngaahi fakakaukau ʻo e melino, ʻo ʻikai ko ha kovi, ke ʻoatu kiate kimoutolu ha kahaʻu pea mo ha ʻamanaki.’”—Selemaia 29:11, Liliu Tohi Tapu Māmani Foʻoú.
“‘ʻOku ou ʻilo pe ʻa e ngaahi fakakaukau ʻoku ou fakakaukau kiate kimoutolu—ko Sihova ia mei he Taʻehamai—ko e ngaahi fakakaukau lelei, ʻo ʻikai sio kovi, ke ʻange kiate kimoutolu ha ʻamui mo ha ʻamanaki.’”—Selemaia 29:11, Paaki Foʻou.
ʻUhinga ʻo e Selemaia 29:11
Naʻe talaʻofa ʻe Sihova ki heʻene kau lotú te ne ʻoange kiate kinautolu ha kahaʻu melino. Neongo naʻe hiki eni ki he kakai ʻi he kuohilí, ko e ngaahi lea ko ení ʻokú ne kei fakahaaʻi mai ʻa e fakakaukau ʻa e ʻOtuá ʻi he ʻahó ni. Ko e “ʻOtuá ʻa ia ʻokú ne foaki mai ʻa e ʻamanakí.” (Loma 15:13) Ko hono moʻoní, naʻá ne hiki ʻa e ngaahi talaʻofa ko ení ʻi he Tohi Tapú koeʻuhi “ke tau maʻu ai ha ʻamanaki” ki ha kahaʻu lelei ange.—Loma 15:4.
Puipuituʻa ʻo e Selemaia 29:11
Ko e ngaahi lea ko ení ko e konga ia ʻo ha tohi naʻe ʻave ki he kau ʻIsileli ʻi Pāpiloné, ʻa ia naʻe ʻave fakamālohi mei Selusalemá.b (Selemaia 29:1) Naʻe tala ʻe he ʻOtuá ki he faʻahinga naʻe ʻave fakamālohí te nau nofo pōpula ʻi ha vahaʻa taimi fuoloa pea ke nau langa ha ngaahi fale, tō ʻa e ngaahi ngoue pea ʻohake ha fāmili. (Selemaia 29:4-9) Kae kehe, naʻe toe tānaki atu ʻe he ʻOtuá: “ʻI he kakato ʻa e taʻu ʻe 70 ʻi Pāpiloné, te u fai ha tokanga kiate kimoutolu, pea te u fakahoko ʻa ʻeku talaʻofá ʻaki ʻeku fakafoki mai kimoutolu ki [Selusalema].” (Selemaia 29:10) Ko ia ai, naʻe fakapapauʻi ʻe he ʻOtuá heʻikai te ne fakangaloʻi kinautolu pea ko ʻenau ʻamanaki ke toe foki ki Selusalemá ʻe hoko moʻoni.—Selemaia 31:16, 17.
Naʻe fakahoko ʻe he ʻOtuá ʻene talaʻofa ki he kau ʻIsilelí. Hangē ko ia naʻá ne tomuʻa talá, naʻe ikunaʻi ʻa Pāpilone ʻe he Tuʻi Pēsia ko Kōlesí. (ʻAisea 45:1, 2; Selemaia 51:30-32) Ki mui aí, naʻe fakaʻatā ʻe Kōlesi ʻa e kau Siú ke nau foki ki honau fonuá. Hili ʻa e taʻu ʻe 70 ʻo e nofo pōpulá, naʻa nau toe foki ki Selusalema.—2 Kalonikali 36:20-23; ʻĒsela 3:1.
Ko hono fakahoko ʻa e talaʻofa ʻoku hā ʻi he Selemaia 29:11 ko ha fakapapauʻiʻanga ia ki he faʻahinga ʻoku nau maʻu ʻa e ʻamanaki ki he ngaahi talaʻofa ʻa e ʻOtuá ʻi he ʻahó ni. Ko e ngaahi talaʻofa ko ení ʻoku kau ki ai ʻa e melino ʻi māmani lahi fakafou ʻi he Puleʻanga ʻo e ʻOtuá ʻi he pule ʻa Kalaisi Sīsū.—Saame 37:10, 11, 29; ʻAisea 55:11; Mātiu 6:10.
Maʻuhala Fekauʻaki mo e Selemaia 29:11
Maʻuhala: ʻOku ʻi ai ʻa e “palani” pau ʻa e ʻOtuá ki he tokotaha taki taha.
Moʻoni: ʻOku fakaʻatā ʻe he ʻOtuá ʻa e kakaí ke nau fili maʻa kinautolu ʻa e meʻa te nau fai ʻaki ʻenau moʻuí. Ko ʻene ngaahi lea ʻi he Selemaia 29:11 naʻe fakataumuʻa ia ki he kau ʻIsileli ʻi Pāpiloné ko ha kulupu, pea naʻe ʻi ai ʻene fakakaukau ki he kulupu ko iá—ko ha kahaʻu melino. (Selemaia 29:4) Neongo ia, naʻe fakaʻatā ʻe he ʻOtuá ʻa e tokotaha taki taha ke ne fili pe te ne maʻu ʻaonga mei heʻene talaʻofá pe ʻikai. (Teutalōnome 30:19, 20; Selemaia 29:32) Ko e faʻahinga ʻoku nau fili ke kumi ki he ʻOtuá ʻoku nau fai ia ʻaki ʻenau lotu kiate ia ʻi he loto-moʻoni.—Selemaia 29:12, 13.
Lau ʻa e Selemaia vahe 29 fakataha mo e fakamatala nounou ʻi laló mo e maʻuʻanga fakamatala fekolosiʻakí.
a Ko e Sihová, ko e huafa fakafoʻituitui ia ʻo e ʻOtuá.—Saame 83:18.
b ʻI he fekauʻaki mo e Selemaia 29:11, ʻoku pehē ʻe he The Expositor’s Bible Commentary: “Ko e taha eni ʻa e ngaahi talaʻofa fakaofo taha ʻoku tau maʻu ʻi he Tohi Tapú ʻoku fakahaaʻi mai ai ʻa e manavaʻofa kaungāongoʻi ʻa Iauē [Sihova] ki he faʻahinga naʻe ʻave fakamālohí pea ʻoange kiate kinautolu ha ʻuhinga ke nau fakatuʻamelie ki ai mo maʻu ha ʻamanaki.”—Voliume 7, peesi 360.