Filipai 4:6, 7—“Neongo pe Ko e Ha ʻa e Meʻa, ʻOua Te Mou Lotomoʻua Ai”

“ʻOua ʻe hoko ʻo loto-moʻua ʻi ha faʻahinga meʻa, ka ʻi he meʻa kotoa pē mou ʻai ke ʻilo hoʻomou ngaahi kolé ʻe he ʻOtuá, fakafou ʻi he lotu mo e hū tōtōaki fakataha mo e fakafetaʻi; pea ko e nonga ʻa e ʻOtuá ʻa ia ʻoku fakalaka atu ʻi he mahino kotoa pē te ne maluʻi homou lotó pea mo homou ngaahi mafai fakaefakakaukaú fakafou ʻia Kalaisi Sīsū.”—Filipai 4:6, 7, Liliu Tohi Tapu Māmani Foʻoú.

“Neongo pe ko e ha ʻa e meʻa, ʻoua te mou lotomoʻua ai; ka ʻi he meʻa kotoa pe tuku ke ha ki he ʻOtua hoʻomou ngaahi kole, ʻi he lotu mo e hufia, pea fai mo e fakafetaʻi. Pea ko e nonga ʻa e ʻOtua, ʻa ia ʻoku mamaʻo ʻi he tatae ʻa e ʻatamai kotoa pe, te ne maluʻi homou loto mo hoʻomou ngaahi fakakaukau ʻia Kalaisi Sisu.”—Filipai 4:6, 7, Paaki Foʻou.

ʻUhinga ʻo e Filipai 4:6, 7

ʻI he taimi ʻoku loto-moʻua tōtuʻa ai ʻa e kau lotu ʻa e ʻOtuá, ʻe lava ke nau lotu ki he ʻOtuá ki ha fakafiemālie. ʻOkú ne talaʻofa te ne foaki kiate kinautolu ha nonga ʻi loto, ʻa ia te ne tokoniʻi kinautolu ke nau fekuki mo ʻenau loto-moʻuá pea maluʻi ʻenau ngaahi fakakaukaú mo e ngaahi ongoʻí. ʻOku fakahaaʻi ʻi he veesi 6 ʻa e founga lotu ʻe lava ke ne tokoniʻi kinautolu ke nau maʻu ʻa e nonga ko iá.

Ko e ngaahi hū tōtōakí ʻoku fai ia fakataha mo e kōlenga fakamātoato. Ko ha tokotaha ʻokú ne hū tōtōaki nai ki he ʻOtuá ʻi he taimi ʻokú ne loto-mafasia aí pe ʻi ha tuʻunga fakatuʻutāmaki, ʻo hangē pē ko ia naʻe fai ʻe Sīsū. (Hepelū 5:7) Ko e ngaahi lotu ko iá ʻoku ʻikai ke fai tuʻo taha ia ka ʻoku toutou fai maʻu pē.

Ko e ngaahi kolé ko ha kole ia ki ha meʻa pau ki he ʻOtuá. Ko ʻene kau lotú ʻe lava ke nau fai ha ngaahi kole “ʻi ha faʻahinga meʻa,” pe “ʻi ha faʻahinga tuʻunga.” Kae kehe, ko e ngaahi lotu ko iá kuo pau ke fehoanaki ia mo e finangalo ʻo e ʻOtuá ʻo hangē ko ia ʻoku fakahaaʻi ʻi he Tohi Tapú.—1 Sione 5:14.

Ko e ngaahi lotu ʻo e fakafetaʻi ki he ʻOtuá ʻoku fakahaaʻi atu ai ʻa e houngaʻia ki he meʻa kuó ne faí pea mo e meʻa te ne fai maʻa kitautolú. ʻI heʻetau tokangataha ki he ngaahi meʻa kuo fai mai ʻe he ʻOtuá, te ne tokoniʻi kitautolu ke fiefia maʻu ai pē.—1 Tesalonaika 5:16-18.

ʻI hono tali ʻe he ʻOtuá ʻa e ngaahi lotu ko iá, ʻokú ne ʻomai ʻa e nonga ki heʻene kau lotú. “Ko e nonga ʻa e ʻOtuá” ʻoku ʻuhinga eni ki he nonga ʻoku tau maʻu mei hono maʻu ʻa e kaungāmeʻa vāofi mo ia. (Loma 15:13; Filipai 4:9) Ko e nonga ko ení “ʻoku fakalaka atu ia ʻi he mahino kotoa pē” koeʻuhí ʻoku mei he ʻOtuá ia pea ʻe lava ke ne tokoniʻi kitautolu ʻo fakalaka atu ia ʻi he meʻa ʻoku tau ʻamanekiná.

ʻOku pehē ʻe he veesi Tohi Tapu ko ení ko e nonga ʻa e ʻOtuá ʻe lava ke ne maluʻi hotau ngaahi lotó. Ko e foʻi lea faka-Kalisi ko eni ʻoku liliu ko e “maluʻi” ʻoku fekauʻaki ia mo ha foʻi lea fakakautau ʻa ia ʻokú ne fakamatalaʻi ʻa e ngāue ʻoku fai ʻe he kau sōtiá ke maluʻi ha kolo. ʻI he tuʻunga meimei tatau, ko e nonga ʻa e ʻOtuá ʻokú ne maluʻi ʻa e loto mo e fakakaukau ʻa ha tokotaha. ʻOku tokoniʻi ai ia ke fakaʻehiʻehi mei he hoko ʻo lōmekina ʻe he ngaahi palopalema fakamamahí.

Ko e nonga ʻoku ʻomai ʻe he ʻOtuá ʻokú ne maluʻi kitautolu “fakafou ʻia Kalaisi Sīsū,” koeʻuhí fakafou ʻia Sīsū ʻe lava ai ke tau maʻu ha vahaʻangatae mo e ʻOtuá. Naʻe foaki ʻe Sīsū ʻene moʻuí ko ha feilaulau huhuʻi koeʻuhi ko ʻetau ngaahi angahalá. Kapau ʻoku tau tui kiate ia, ʻe lava ke tau fiefia ʻi he ngaahi tāpuaki ʻa e ʻOtuá. (Hepelū 11:6) Ko Sīsū foki ʻa e fakalaloá ʻi he taimi ʻoku tau lotu ai ki he ʻOtuá. Naʻe pehē ʻe Sīsū: “ʻOku ʻikai haʻu ha taha ki he Tamaí ka ʻi heʻene fou pē ʻiate au.”—Sione 14:6; 16:23.

Puipuituʻa ʻo e Filipai 4:6, 7

Ko e tohi Tohi Tapu ʻo Filipaí ko ha tohi ia naʻe hiki ʻe he ʻapositolo ko Paulá ki he kau Kalisitiane naʻa nau nofo ʻi he kolo ʻo Filipaí.a ʻI he vahe 4 ʻo e tohí, naʻe fakalototoʻaʻi ʻe Paula ʻa e faʻahinga ʻi he fakatahaʻangá ke nau fiefia, pea fakamālō kiate kinautolu ʻi heʻenau nima-homó, ʻa ia naʻá ne ʻai ai ia ke ne fiefia. (Filipai 4:4, 10, 18) Naʻá ne fakahaaʻi ʻa e founga ʻe taki atu ai ʻe he lotú ki hono maʻu ʻa e nonga ʻa e ʻOtuá, pea naʻá ne fakahaaʻi ʻa e meʻa ʻoku totonu ke tau fakakaukau ki aí mo e meʻa ke tau fai kae lava ke tau maʻu ʻa e tokoni mei he “ʻOtua ʻo e melinó.”—Filipai 4:8, 9.