Saame 46:10—“Mou Logo be, bea Ilo ko Au koe Otua”

“Fakamoʻulaloa pea ʻiloʻi ko au ʻa e ʻOtuá. ʻE hakeakiʻi au ʻi he lotolotonga ʻo e ngaahi puleʻangá; ʻe hakeakiʻi au ʻi he māmaní.”​—Saame 46:10, Liliu Tohi Tapu Māmani Foʻoú.

“Mou logo be, bea ilo ko au koe Otua: teu hakeakiʻi au i he lotolotoga oe hiteni, teu hakeakiʻi au i mamani.”​—Saame 46:10, Paaki Motuʻa.

ʻUhinga ʻo e Saame 46:10

ʻOku enginaki ‘a e ʻOtuá ki he tokotaha kotoa ke lotu ange kiate ia pea lāuʻilo ki heʻene totonu ke pule ki he māmaní. Ko hono mālohí mo e mafaí ʻoku ʻikai ala fakaʻikaiʻi, ko ha moʻoniʻi meʻa kuo pau ke lāuʻilo ki ai ʻa e tokotaha kotoa ʻoku loto ke moʻui taʻengatá.​—Fakahā 4:11.

“Fakamoʻulaloa pea ʻiloʻi ko au ʻa e ʻOtuá.” Ko e ngaahi liliu Tohi Tapu ʻe niʻihi ʻoku nau fakalea ʻa e ʻuluaki konga ʻo e fakamatala ko ení ko e “mou logo be.” Kuo taki atu eni ki he maʻuhala ʻo pehē ko ha fekau ia ke hoko ʻo ʻapasia pe fakalongolongo ʻi he fale lotú. Kae kehe, ko e kupuʻi lea faka-Hepelū naʻe liliu ko e “fakamoʻulaloa pea ʻiloʻi ko au ʻa e ʻOtuá” ko e enginaki tonu ia meia Sihovaa ko e ʻOtuá ki he kakai ʻo e ngaahi puleʻanga kotoa pē, ʻo ekinaki kiate kinautolu ke tuku ʻenau fakafepaki kiate iá pea ke ʻiloʻi ko ia toko taha pē ʻoku taau ke fai ki ai ʻa e lotú.

ʻOku maʻu ʻa e enginaki meimei tatau ʻi he Saame 2. ʻI aí, ʻoku talaʻofa ʻa e ʻOtuá te ne fai ha meʻa ki he faʻahinga ʻoku fakafepaki kiate iá. ʻI he tafaʻaki ʻe tahá, ko e faʻahinga ʻoku nau lāuʻilo ki he mafai ʻo e ʻOtuá ʻoku nau falala kiate ia ki ha tataki, mālohi pea mo e poto. ʻI he “hūfanga kiate Iá,” ʻoku nau fiefia mo ongoʻi malu ai, tautefito ʻi he lolotonga ʻa e ngaahi taimi faingataʻá.​—Saame 2:9-12.

“ʻE hakeakiʻi au ʻi he lotolotonga ʻo e ngaahi puleʻangá; ʻe hakeakiʻi au ʻi he māmaní.” ʻI he kuohilí, naʻe hakeakiʻi ʻa Sihova ko e ʻOtuá ʻi he taimi naʻá ne ngāueʻaki ai hono fuʻu mālohí ke maluʻi hono kakaí. (ʻEkisoto 15:1-3) ʻI he kahaʻú, ʻe hakeakiʻi ia ʻi ha tuʻunga ʻoku lahi mamaʻo ange ʻi he taimi ʻe fakamoʻulaloa ai ʻa e tokotaha kotoa ʻi he māmaní ki hono mafaí pea lotu kiate ia.​—Saame 86:9, 10; ʻAisea 2:11.

Puipuituʻa ʻo e Saame 46:10

ʻOku ui ʻe ha maʻuʻanga fakamatala ʻe taha ʻa e Saame 46 “ko ha himi ʻoku fakafiefiaʻi ai ʻa e mālohi ʻo e ʻOtuá, ʻa e toʻa ʻokú ne maluʻi hono kakaí.” ʻI hono hivaʻi ʻa e Saame 46, naʻe fakahaaʻi ai ʻe he kakai ʻa e ʻOtuá ʻenau falala ki he malava ʻa Sihova ke maluʻi mo tokoniʻi kinautolú. (Saame 46:1, 2) Ko e ngaahi leá naʻe fakamanatu ange ai kiate kinautolu naʻe kau maʻu pē ʻa Sihova mo kinautolu.​—Saame 46:7, 11.

Ke fakaivimālohiʻi ʻenau falala ki he mālohi fakaemaluʻi ʻo Sihova ko e ʻOtuá, ko e sāmé naʻá ne fakaafeʻi kinautolu ke nau fakakaukauloto ki heʻene ngaahi ngāue fakaofó. (Saame 46:8) Naʻe tautautefito hono fakahanga ai ʻa e tokangá ki heʻene malava ke fakangata ʻa e taú. (Saame 46:9) ʻI ha tuʻunga, naʻe fakangata ʻe Sihova ʻa e taú ʻi he ngaahi taimi ʻo e Tohi Tapú ʻaki ʻene maluʻi hono kakaí mei he ngaahi puleʻanga fakafilí. Kae kehe, ʻoku talaʻofa mai ʻe he Tohi Tapú ʻe vavé ni ke fai pehē ʻa e ʻOtuá ʻi ha tuʻunga ʻoku toe lahi ange ʻi he taimi te ne fakangata ai ʻa e taú ʻi he kotoa ʻo e māmaní.​—ʻAisea 2:4.

ʻOku kei tokoniʻi ʻe Sihova ʻene kau lotú ʻi he ʻahó ni? ʻIo. Ko hono moʻoní, ko e ʻapositolo ko Paulá naʻá ne fakalototoʻaʻi lahi ʻa e kau Kalisitiané ke nau falala kiate Ia ki ha tokoni. (Hepelū 13:6) Ko e ngaahi fakakaukau ʻoku maʻu ʻi he Saame 46 ʻokú ne fakaivimālohiʻi ʻetau falala ki he mālohi fakaemaluʻi ʻo e ʻOtuá. ʻOku tokoniʻi ai kitautolu ke tau vakai ki he ʻOtuá “ko hotau hūfangaʻanga mo hotau mālohi.”​—Saame 46:1.

Sio ʻi he vitiō nounou ko ení ke maʻu ha vakai fakalūkufua ki he tohi ʻo e Ngaahi Sāmé.