Fakamatala ‘i Lalo

a ʻI he taimi naʻe lea ai ʻa Sīsū fekauʻaki mo e fakaʻilonga ʻo e ngaahi ʻaho fakaʻosí, naʻá ne ʻoatu ha ngaahi talanoa fakatātā ki heʻene kau ākongá. ʻOku mahuʻinga ke fakatokangaʻi naʻá ne ʻuluaki lave ki he “tamaioʻeiki anga-tonu mo potó,” ko e kiʻi kulupu tokosiʻi ʻo e fanga tokoua paní ʻa ia te nau takimuʻa ʻi he kakai ʻa e ʻOtuá. (Māt. 24:45-47) Naʻá ne ʻoatu leva mo ha ngaahi talanoa fakatātā fekauʻaki mo e kotoa ʻo e kau paní. (Māt. 25:1-30) Fakaʻosí, naʻá ne lea fekauʻaki mo e faʻahinga te nau poupouʻi ʻa e fanga tokoua ʻo Kalaisí pea te nau moʻui taʻengata ʻi he māmaní. (Māt. 25:31-46) ʻI he tuʻunga meimei tatau, ko e taimi naʻe kamata ke fakahoko ai ʻi hotau ʻahó ni ʻa e kikite ʻa ʻIsikelí, naʻe ʻuluaki ngāueʻaki ia ki he faʻahinga kuo nau maʻu ʻa e ʻamanaki ke moʻui ʻi hēvaní. Pea neongo naʻe ʻikai ke fakafofongaʻi maʻu pē ʻe he matakali ʻe hongofulu ʻo ʻIsilelí ʻa e faʻahinga te nau moʻui taʻengata ʻi he māmaní, ko e fāʻūtaha naʻe fakamatalaʻi ʻi he kikite ko ení ʻoku fakamanatu mai ai kiate kitautolu ʻa e fāʻūtaha ʻoku hoko ʻi he vahaʻa ʻo e faʻahinga ko ení mo e kau paní.