Fehuʻi mei he Kau Lautohí

ʻI he tuʻunga fē ʻe toe fakakaukauʻi nai ai ha toe papitaiso tuʻo ua?

ʻI he tuʻunga pau, ʻe toe vakai nai ai ha tokotaha ʻosi papitaiso ki he tuʻunga totonu ʻo ʻene papitaisó pea fakakaukau nai ai ke toe papitaiso. Hangē ko ʻení, ʻi he taimi ʻo e papitaisó, ʻoku fai fakapulipuli nai ai ʻe ha taha ha meʻa pe kau ʻi ha tōʻonga ʻe lava ke iku atu ki hano tuʻusi kapau naʻá ne ʻosi papitaiso moʻoni. ʻE lava ke ne fai ha fakatapui ki he ʻOtuá ʻi he tuʻunga peheé? Ko ha taha pehē te ne ʻi ha tuʻunga ke fai ha fakatapui moʻoni kia Sihova kapau pē kuo ʻikai toe hoko atu ha tōʻonga taʻefakatohitapu. Ko ia ai, ko ha taha naʻe papitaiso lolotonga ha hoko ha taʻofiʻanga mafatukituki pehē ʻe feʻungamālie nai ke ne fakakaukau pe ʻe toe papitaiso ia.

Fēfē ha taha ia naʻe ʻikai te ne fai ha angahala ʻi he taimi ʻo ʻene papitaisó ka naʻá ne fai ha fehālaaki hili ʻene papitaisó ʻo fiemaʻu ki ai ha kōmiti fakamaau? Tau pehē naʻá ne taukaveʻi naʻe ʻikai te ne mahinoʻi kakato ʻa e meʻa naʻá ne fai ʻi he taimi naʻe papitaiso aí peá ne pehē ko hono papitaiso iá naʻe ʻikai moʻoni ke totonu. ʻI he fakataha mo ha tokotaha faihala, ʻoku totonu ke ʻoua ʻe ʻohake ʻe he kau mātuʻá ha ngaahi fehuʻi fekauʻaki mo hono papitaisó pea ʻeke ange pe ʻokú ne ongoʻi ko ʻene fakatapui mo papitaisó naʻe totonu. He ko ē, naʻá ne fanongo ʻi ha malanga Fakatohitapu fekauʻaki mo e ʻuhinga ʻo e papitaisó. Naʻá ne tali papau ʻa e ongo fehuʻi fekauʻaki mo e fakatapuí mo e papitaisó. Naʻá ne fetongi leva pea naʻe fakauku ia ʻi he vaí. Ko ia ai, ʻoku ʻuhinga lelei ke tui ʻokú ne mahinoʻi kakato ʻa e mafatukituki ʻo e meʻa naʻá ne faí. ʻE fakafeangai kiate ia ʻa e kau mātuʻá ʻi he tuʻunga ko ha tokotaha ʻosi papitaiso.

Kapau ʻe ʻohake ʻe ha taha ʻa e ʻīsiu fekauʻaki mo e totonu ʻo ʻene papitaisó, ʻe fakahanga ʻe he kau mātuʻá ʻa ʻene tokangá ki he Watchtower ʻo Maʻasi 1, 1960, peesi 159 mo e 160, mo e Fepueli 15, 1964, peesi 123 ki he 126, ʻa ia ʻoku fakamatalaʻi fakaikiiki ai ʻa e meʻa fekauʻaki mo e toe papitaisó. Faifai atu pē, ko e toe papitaiso ʻi he tuʻunga pau peheé (hangē ko e ʻikai ke fuʻu mahinoʻi feʻunga ʻa e Tohi Tapú ʻi he taimi naʻe papitaiso ai ha tahá) ko ha meʻa fakafoʻituitui pē ia.

Ko e hā ʻoku totonu ke fakakaukau ki ai ʻa e kau Kalisitiané ʻo kau ki he nofo fakatahá?

ʻOku fiemaʻu ʻe he tokotaha kotoa ha feituʻu ke nofo ai. Kae kehe, ʻi he ʻahó ni, ko e kakai tokolahi ʻoku ʻikai hanau ʻapi tonu. Ko ha tuʻunga fakaʻekonōmika ʻo ha taha, meʻa fakaemoʻuilelei, pe meʻa tefito kehe ʻe fiemaʻu nai ai ki he fāmili ofí, kau ai ha kāinga, ke nau nofo fakataha. ʻI he feituʻu ʻe niʻihi ʻo e māmaní, ʻoku fuʻu tokolahi nai ai ha kāinga ʻi ha loki pē ʻe taha ʻo ʻikai moʻoni ke ʻi ai ha tuʻunga fakapulipuli.

ʻOku ʻikai ko ha fatongia ia ʻo e kautaha ʻa Sihová ke ʻoatu ha lisi lōloa ʻo e lao ki he meʻa ʻoku feʻungamālie ki he nofoʻangá maʻá e faʻahinga kotoa ʻi he fakatahaʻanga ʻi māmani lahí. ʻOku fakalototoʻaʻi atu ʻa e kau Kalisitiané ke nau fakakaukau ki he ngaahi tefitoʻi moʻoni Fakatohitapú koeʻuhi ke fakapapauʻi ai pe ko ʻenau fokotuʻutuʻu ki he nofoʻangá ʻoku tali ʻe he ʻOtuá pe ʻikai. Ko e hā ʻa e niʻihi ʻo e tefitoʻi moʻoni ko ʻení?

Ko ha meʻa tefito ia ke fakakaukau ki he nunuʻa ʻe hoko kia kitautolu mo hotau tuʻunga fakalaumālié ʻi he nofo fakataha mo e kakai kehé. Ko e faʻahinga kakai fēfē kinautolu? Ko e kau lotu kinautolu kia Sihova? ʻOku nau moʻui ʻo fehoanaki mo e tuʻunga ʻa e Tohi Tapú? “ʻOua naʻa tuku ke kākāʻi kimoutolu,” ko e tohi ia ʻa e ʻapositolo ko Paulá. “ʻOku maumauʻi ʻa e ngaahi ʻulungaanga lelei ʻe he faʻa talanoa” pe feohi koví.—1 Kol. 15:33.

ʻOku fakamatala ʻa e Tohi Tapú ʻoku fakahalaiaʻi ʻe Sihova ʻa e feʻauakí mo e tonó. (Hep. 13:4) Ko ia ai, ko ha fokotuʻutuʻu pē ki he mohé ʻoku fakaʻatā ai ha faʻahinga taʻemali ko e tangata pe fefine ke nau nonofo ʻo hangē ha husepāniti mo ha uaifí, ʻe taʻefakahōifua moʻoni ia ki he ʻOtuá. Heʻikai loto ha Kalisitiane ke nofo ʻi ha feituʻu ʻoku fakaʻatā ai ʻa e ʻulungaanga taʻetāú.

ʻIkai ko ia pē, ʻoku ekinaki ʻa e Tohi Tapú ki he tokotaha kotoa ʻoku holi ke maʻu ʻa e hōifua ʻa e ʻOtuá ke nau “hola pe mei he fai feʻauaki.” (1 Kol. 6:18) Ko ia ai, ʻe fakapotopoto ki he kau Kalisitiané ke nau fakaʻehiʻehi mei ha fokotuʻutuʻu nofoʻanga ʻe fakatupunga ai ke ʻahiʻahiʻi kinautolu ke nau kau ʻi he tōʻonga taʻetāú. Ko e fakatātaá, vakai angé ki ha tuʻunga ʻoku mohe ai ha ngaahi fāmili Kalisitiane ʻi ha ʻapi tatau. ʻE fakatupunga nai ʻe ha fokotuʻutuʻu pehē ke ala hoko ai ha meʻa? Fēfē kapau ko ha ongo meʻa ʻoku ʻikai te na mali ʻoku taʻeʻamanekina pē ʻena toko ua koeʻuhí ko e niʻihi kehe ʻoku nau faʻa ʻi aí ʻoku ʻikai te nau ʻi ai ʻi ha taimi? ʻI he tuʻunga meimei tatau, ʻe fakatuʻutāmaki fakaeʻulungaanga ki ha ongo meʻa teʻeki mali ʻokú na femanakoʻaki ke na nofo ʻi ha ʻapi tatau. ʻOku fakapotopoto ke fakaʻehiʻehi mei he faʻahinga nofo peheé.

ʻE pehē pē ʻa e ʻikai feʻungamālie ki ha ongo meʻa kuó na ʻosi vete ke hokohoko atu ʻena nofo ʻi ha fale tatau. Ko ʻena tōʻongaʻaki ʻa e feohi vāofí ʻe lavangofua ke iku atu ia ki ha tōʻonga taʻetaau.—Pal. 22:3.

Ko e meʻa fakaʻosi ke fakakaukau ki ai ʻoku toe mahuʻinga ko e anga ʻo e vakai ʻa e koló ki he fili ʻa ha taha. Ko ha fokotuʻutuʻu nofoʻanga ʻoku pehē ʻe ha Kalisitiane ʻoku lelei pē ia ka ʻoku fakatupunga ai ha lau ʻi he koló ʻe fiemaʻu ke fai ha tokanga ki ai. ʻOku ʻikai ʻaupito te tau loto ke fakaongoongokoviʻi ʻa e huafa ʻo Sihová ʻe heʻetau tōʻongá. ʻOku fakamatalaʻi ia ʻe Paula ʻo peheni: “Ke taʻemelengatāmaki hoʻomou toʻonga ki he Siu mo e Kalisi fakatouʻosi, pea ki he siasi foki ʻa e ʻOtua: ʻo hange foki ʻoku ou fai fakaoleole ʻe au ki he kakai kehekehe ʻi heʻete meʻa kotoa pe, ʻo ʻikai te u kumi ʻa e lelei aʻata, ka ko e lelei ʻa e tokolahi; heiʻilo ʻe lava ai honau fakamoʻui.”—1 Kol. 10:32, 33.

Ko hono kumi pea fai ha fokotuʻutuʻu nofoʻanga ʻoku feʻungamālié ʻe faingataʻa moʻoni nai ia ki he faʻahinga ʻoku nau fakaʻamu ke pouaki ʻa e tuʻunga māʻoniʻoni ʻa Sihová. Kae kehe, kuo pau ki he kau Kalisitiané ke nau “sivi ʻo ʻilo, pe ko e ha ʻa e meʻa ʻe hōifua ai ʻa e ʻEiki.” ʻOku fiemaʻu ke nau fakapapauʻi heʻikai hoko ha meʻa taʻetaau ʻi honau ʻapí. (Ef. 5:5, 10) ʻOku fiemaʻu heni ke lotu ʻa e kau Kalisitiané ki ha tataki fakaʻotua pea fai ʻa e meʻa kotoa te nau malavá ke maluʻi ʻa e lelei fakaesino mo fakaeʻulungaanga ʻa e tokotaha taki taha pea pehē ki he huafa ʻo Sihová.