Vahe 7
Ko e Meʻa Kuo Fai ʻe he ʻOtuá ke Fakahaofi ʻa e Faʻahinga ʻo e Tangatá
1, 2. (a) Naʻe anga-fēfē ʻa e hoko ʻo hounga ki ha senituliō Loma ʻa e tokotaha ko e ʻAlo ʻo e ʻOtuá? (e) Ko e hā naʻe fakaʻatā ai ʻe Sihova ke pekia ʻa Sīsuú?
ʻI HE hoʻatā efiafi ʻe taha ʻo e faʻahitaʻu māfana ʻi he meimei taʻu ʻe 2,000 kuo maliu atú, naʻe siofi ai ʻe ha senituliō Loma ha kau tangata ʻe toko tolu naʻa nau mate māmālie, ʻi he mate fakamamahi ʻaupito. Naʻe tautefito ʻa e tokanga ʻa e sōtia ko iá ki he toko taha ʻo kinautolu—ko Sīsū Kalaisi. Naʻe tutuki ʻa Sīsū ki ha fuʻu pou ʻakau. Naʻe fakapoʻuli ʻa e langí he hoʻatā mālié ʻi he fakaofi mai ʻa e mōmeniti ʻo ʻene pekiá. ʻI he taimi naʻá ne pekia aí, naʻe ngalulu mālohi ʻa e māmaní, pea naʻe kalanga ʻa e sōtiá: “Ta naʻe moʻoni pe ʻa e tangata ni: ko e ʻAlo ia ʻo e ʻOtua.”—Maʻake 15:39.
2 Ko e ʻAlo ʻo e ʻOtuá! Naʻe tonu ʻa e sōtia ko iá. Naʻá ne toki sio tonu ʻi he meʻa mahuʻinga lahi taha kuo hoko ʻi he māmaní. ʻI ha ngaahi taimi ki muʻa, naʻe ui ai ʻe he ʻOtuá tonu ʻa Sīsū ko hono ʻAlo ʻofeina. (Mātiu 3:17; 17:5) Ko e hā naʻe fakaʻatā ai ʻe Sihova ʻa hono ʻAló ke pekiá? Koeʻuhi ko e founga ia ʻa e ʻOtuá ki hono fakahaofi ʻa e faʻahinga ʻo e tangatá mei he angahalá mo e maté.
NAʻE FILI KI HA TAUMUʻA MAKEHE
3. Ko e hā naʻe feʻunga ai ʻa hono fili ʻo e ʻAlo tofu-pe-taha-naʻe-fakatupu ʻo e ʻOtuá ki ha taumuʻa makehe fekauʻaki mo e faʻahinga ʻo e tangatá?
3 Hangē ko ia naʻa tau ako ki ai ki muʻa ʻi he tohí ni, naʻe ʻi ai ʻa Sīsū ki muʻa pea toki hoko mai ko e tangatá. ʻOku ui ia ko e “ʻAlo tofu-pe-taha-naʻe-fakatupu” ʻo e ʻOtuá koeʻuhi naʻe fakatupu fakahangatonu ia ʻe Sihova. Hili iá naʻe ngāueʻaki leva ʻe he ʻOtuá ʻa Sīsū ki hono fakatupu mai ʻa e ngaahi meʻa kehe kotoa ke nau ʻi ai. (Sione 3:18; Kolose 1:16) Naʻe saiʻia ʻa Sīsū ʻo tautefito ki he faʻahinga ʻo e tangatá. (Palōvepi 8:30, 31) Tā neʻineʻi ke fili ʻe Sihova ʻa hono ʻAlo tofu-pe-taha-naʻe-fakatupú ke fakahoko ha taumuʻa makehe ʻi he taimi naʻe hoko ai ʻa e faʻahinga ʻo e tangatá ki he tautea ko e maté!
4, 5. Ki muʻa ke hāʻele hifo ʻa Sīsū ki he māmaní, ko e hā naʻe fakahaaʻi ʻe he Tohitapú ʻo kau ki he Hako faka-Mīsaiá?
4 ʻI he taimi naʻe tala ai ʻa e tauteá kia ʻĀtama, ʻIvi, mo Sētane ʻi he ngoue ʻo ʻĪtení, naʻe folofola ai ʻa e ʻOtuá ʻo kau ki ha Tokotaha-Faifakahaofi ʻi he kahaʻú ko ha “hako.” Ko e Hako ko ʻení, te ne hoko mai ʻo toʻo atu ʻa e ngaahi mahaki fakalilifu naʻe hanga ʻe Sētane ko e Tēvoló, “ko e Ngata ʻo ono ʻaho,” ʻo fakatupunga ke hokó. Ko hono moʻoní, ʻe laiki ʻe he Hako naʻe talaʻofá ʻa Sētane mo e faʻahinga kotoa ʻoku muimui ʻiate iá.—Sēnesi 3:15; 1 Sione 3:8; Fakahā 12:9.
5 ʻI he lolotonga ʻo e ngaahi senitulí, naʻe fakahaaʻi māmālie ai ha meʻa lahi ange ʻo fekauʻaki mo e Hakó, ʻa ia naʻe toe ui ko e Mīsaiá. Hangē ko ia kuo fakahā ʻi he saati ʻi he peesi 37, naʻe ʻomai ʻe he ngaahi kikite lahi ʻa e ngaahi fakaikiiki ʻo fekauʻaki mo e ngaahi tafaʻaki lahi ʻo ʻene moʻui ʻi he māmaní. Hangē ko ʻení, naʻe pau ke ne kātekina ʻa e ngaohikoviʻi lahi fakaʻulia koeʻuhi ke fakahoko ʻa hono ngafa ʻi he taumuʻa ʻa e ʻOtuá.—ʻAisea 53:3-5.
ʻUHINGA NE PEKIA AI ʻA E MĪSAIÁ
6. Fakatatau ki he Tāniela 9:24-26, ko e hā ʻe lavaʻi ʻe he Mīsaiá, pea ʻi he founga fē?
6 Ko e kikite naʻe hiki ʻi he Tāniela 9:24-26 naʻe tala ki muʻa ai ko e Mīsaiá—Tokotaha Pani ʻa e ʻOtuá—te ne fakahoko ha taumuʻa lahi. Te ne haʻu ki he māmaní “ke fakaʻosi ʻa e angahala, pea ke silaʻi ʻa e hia, pea ke fakamolemole ʻa e kovi, pea ke fakahu mai ʻa e maʻoniʻoni” ʻo taʻengata. ʻE toʻo atu ʻe he Mīsaiá ʻa e tautea ko e maté mei he faʻahinga anga-tonu ʻo e tangatá. Ka te ne fai ʻa e meʻá ni ʻi he founga fē? ʻOku fakamatala ʻa e kikité ʻo pehē ʻe “tuʻusi” ia, pe ʻai ke ne pekia.
7. Ko e hā naʻe fai ai ʻe he kau Siú ʻa e ngaahi feilaulau monumanú, pea ko e hā naʻe tomuʻa fakatātaaʻi ʻe he ngaahi meʻá ni?
7 Naʻe maheni ʻa e kau ʻIsileli ʻo e kuonga muʻá mo e foʻi fakakaukau ʻo e fakamolemoleʻanga maʻá e faihalá. ʻI heʻenau lotu naʻe fai ʻi he malumalu ʻo e Lao ko ia naʻe ʻoange kiate kinautolu ʻe he ʻOtuá ʻo fakafou mai ʻia Mōsesé, naʻa nau fai maʻu ai pē ʻa e ngaahi feilaulau monumanu. Naʻe fakamanatu ʻe he ngaahi feilaulaú ni ki he kakai ʻo ʻIsilelí ʻoku fiemaʻu ki he faʻahinga ʻo e tangatá ha meʻa ke fakamolemoleʻi pe ʻufiʻufi ʻaki ʻenau ngaahi angahalá. Naʻe fakamatalaʻi fakanounou ʻe he ʻaposetolo ko Paulá ʻa e tefitoʻi moʻoni ko ʻení ʻi he foungá ni: “Ka ʻikai ha lilingi toto, ʻoku ʻikai ha fakamolemole.” (Hepelū 9:22) ʻOku ʻikai ke moʻulaloa ʻa e kau Kalisitiané ki he Lao ʻa Mōsesé mo e ngaahi fiemaʻu naʻe ʻi aí, ʻo hangē ko e ngaahi feilaulaú. (Loma 10:4; Kolose 2:16, 17) ʻOku nau toe ʻilo ko e ngaahi feilaulau monumanú ʻoku ʻikai lava ke nau tokonaki ha fakamolemoleʻi tuʻuloa mo fakaʻaufuli ʻo e ngaahi angahalá. Ka, naʻe tomuʻa fakatātaaʻi ʻe he ngaahi foaki fakaefeilaulau ko ʻení ha feilaulau mahuʻinga mamaʻo ange—ʻa ia ko e Mīsaiá, pe ko Kalaisi. (Hepelū 10:4, 10; fakafehoanaki mo Kalētia 3:24.) Ka, te ke ʻeke nai, ‘Naʻe fiemaʻu moʻoni ki he Mīsaiá ke pekia?’
8, 9. Ko e hā ʻa e ngaahi meʻa mātuʻaki mahuʻinga naʻe fakamoleki ʻe ʻĀtama mo ʻIví, pea naʻe anga-fēfē hono uesia hona ngaahi hakó ʻe he meʻa naʻá na faí?
8 ʻIo, naʻe pau ke pekia ʻa e Mīsaiá kapau naʻe ʻuhingá ke fakahaofi ʻa e faʻahinga ʻo e tangatá. Ke mahino ʻa e ʻuhinga ki aí, kuo pau ke tau fakakaukau atu ki he ngoue ko ʻĪtení pea feinga ke makupusi ʻa e lahi fau ʻo e meʻa naʻe fakamoleki ʻe ʻĀtama mo ʻIvi ʻi he taimi naʻá na angatuʻu ai ki he ʻOtuá. Naʻe fokotuʻu kiate kinaua ʻa e moʻui ʻitānití! ʻI he tuʻunga ko e fānau ʻa e ʻOtuá, naʻá na toe maʻu ha vahaʻangatae fakahangatonu mo ia. Ka ʻi heʻena fakataleʻi ʻa e tuʻunga-pule ʻa Sihová, naʻe mole ai meiate kinaua ʻa e ngaahi meʻa kotoa ko iá peá na ʻomai ai ʻa e angahalá mo e maté ki he faʻahinga ʻo e tangatá.—Loma 5:12.
9 Naʻe hangē ia ko hano fakamoleki noaʻia atu ʻe heʻetau ʻuluaki ongo mātuʻá ha fuʻu koloa lahí, ʻo ʻai ai kinaua ke na tō ki ha fuʻu moʻua kāfakafa. Naʻe tuku mai ʻe ʻĀtama mo ʻIvi ʻa e moʻua ko iá ki hona hakó. Koeʻuhi naʻe ʻikai ke fanauʻi mai kitautolu ʻi he haohaoa mo e taʻeangahala, ʻoku angahalaʻia ʻa e tokotaha kotoa pē ʻo kitautolu pea fakaʻau ai ki he maté. ʻI he taimi ʻoku tau puke ai pe leaʻaki ai ha meʻa fakatupu loto-mamahi ʻoku tau fakaʻamu ʻoku malava ke tau fakafoki ia, ko ʻetau hokosia ia ʻa e ngaahi nunuʻa ʻo hotau moʻua tukufakaholo—ko e taʻehaohaoa ʻa e tangatá. (Loma 7:21-25) ʻOku tuʻu pē ʻetau ʻamanakí ʻi hano toe maʻu mai ʻa e meʻa naʻe fakamoleki ʻe ʻĀtamá. Kae kehe, ʻoku ʻikai malava ke tau maʻu ʻi he ngāué ʻa e moʻui haohaoa fakaetangatá. Koeʻuhi ʻoku faiangahala ʻa e faʻahinga taʻehaohaoa kotoa ʻo e tangatá, ko kitautolu kotoa ʻoku tau maʻu ʻi he ngāué ʻa e mate, ʻo ʻikai ko e moʻui.—Loma 6:23.
10. Ko e hā naʻe fiemaʻu ke totongi fakafoki mai ʻaki ʻa e meʻa naʻe fakamoleki ʻe ʻĀtamá?
10 Ka, naʻe ʻi ai ha meʻa naʻe malava ke foaki ke fetongi mai ʻaki ʻa e moʻui naʻe tuku ange ʻe ʻĀtama ke molé? ʻOku fiemaʻu ki he tuʻunga ʻo e fakamaau totonu ʻa e ʻOtuá ʻa e tuʻunga mafamafatatau, ko e “moʻui ʻaki ʻa e moʻui.” (ʻEkisoto 21:23) Ko ia ko ha moʻui naʻe pau ke foaki ke totongi ʻaki ʻa e moʻui naʻe molé. Kuo ʻikai feʻunga ha faʻahinga moʻui pē. ʻOku pehē ʻe he Sāme 49:7, 8 ʻo fekauʻaki mo e faʻahinga taʻehaohaoa ʻo e tangatá: “Talaʻehai ʻoku lava ʻe ha taha ke huhuʻi ha taha, pe ke ʻange kia Elohimi hano tatala: (ʻIo ko e huhuʻi honau laumalie ʻoku fuʻu mamafa, pea kuo pau ke tuku ai pe ʻo taʻengata).” Ko ia ai, ʻoku ʻikai ha toe ʻamanaki ia? ʻIkai ʻaupito.
11. (a) Ko e hā ʻa e ʻuhinga ʻo e foʻi lea ko e “huhuʻi” ʻi he lea faka-Hepeluú? (e) Ko hai pē naʻe malava ke ne totongi huhuʻi ʻa e faʻahinga ʻo e tangatá, pea ko e hā hono ʻuhingá?
11 ʻI he lea faka-Hepeluú, ko e foʻi lea ko e “huhuʻi” ʻoku ʻuhinga ki he fakakātoa ʻo e meʻa naʻe totongi ke huhuʻi mai ʻaki ha tokotaha pōpula pea ʻoku toe ʻuhinga ko e tatau. Ko ha tangata pē naʻe ʻi ai ʻa e moʻui haohaoa fakaetangatá naʻe malava ke ne foaki atu ʻa e tatau ʻo e meʻa naʻe fakamoleki ʻe ʻĀtamá. ʻI he hili ʻa ʻĀtamá, ko e tangata haohaoa pē naʻe fāʻeleʻi mai ki he māmaní ko Sīsū Kalaisi. Ko ia ai, ʻoku ui ʻe he Tohitapú ʻa Sīsū ko e “Atama ki mui” pea fakapapauʻi mai kiate kitautolu ko e Kalaisi ko iá “naʻa ne foaki ia ʻe ia ko e fetongi huhuʻi ʻo e kakai kotoa pe.” (1 Kolinitō 15:45; 1 Tīmote 2:5, 6) Neongo naʻe tuku mai ʻe ʻĀtama ʻa e maté ki heʻene fānaú, ko e koloa tukufakaholo ʻa Sīsuú ia ko e moʻui taʻengata. ʻOku fakamatalaʻi ʻi he 1 Kolinitō 15:22 ʻo pehē: “Hange tofu pe ʻoku mate kotoa pe ʻia Atama, pehe foki ʻe fakamoʻui hake kotoa pe ʻia Kalaisi.” Ko ia, ʻoku feʻungamālie ʻa hono ui ʻo Sīsū ko e “Tamai Taʻengata.”—ʻAisea 9:6, 7.
FOUNGA NAʻE TOTONGI AI ʻA E HUHUʻÍ
12. Ko fē ʻa e taimi naʻe hoko ai ʻa Sīsū ko e Mīsaiá, pea ko e hā leva ʻa e ʻalunga moʻui naʻá ne tuli ki aí?
12 ʻI he faʻahitaʻu fakatōlau ʻo e 29 T.S., naʻe ʻalu ai ʻa Sīsū ke papitaiso ia ʻe hono kāinga ko Sioné pea ke foaki atu ai ia ke fai ʻa e finangalo ʻo e ʻOtuá. ʻI he taimi ko iá naʻe pani ai ʻe Sihova ʻa Sīsū ʻaki ʻa e laumālie māʻoniʻoní. Naʻe hoko leva ai ʻa Sīsū ko e Mīsaia, pe Kalaisi, ko e tokotaha naʻe pani ʻe he ʻOtuá. (Mātiu 3:16, 17) Ko ia naʻe toki kamata ai ʻe Sīsū ʻa ʻene ngāue fakafaifekau taʻu ʻe tolu mo e kongá. Naʻá ne fononga takai ʻi hono fonuá, ʻo malanga ʻo fekauʻaki mo e Puleʻanga ʻo e ʻOtuá mo tānaki ʻa e kau muimui anga-tonú. Kae kehe, hangē ko ia naʻe tala ki muʻá, naʻe vave ʻa e tupulaki ʻa e fakafepaki kiate iá.—Sāme 118:22; Ngāue 4:8-11.
13. Ko e hā ʻa e ngaahi meʻa naʻe hoko ʻo taki atu ai ki he pekia ʻa Sīsū ko ha tokotaha tauhi anga-haohaoá?
13 Naʻe fakaeʻa loto-toʻa ʻe Sīsū ʻa e mālualoi ʻa e kau taki lotú, pea naʻa nau feinga ke ʻai ia ke ne pekia. Naʻe faifai atu pē ʻo nau kamata ha foʻi faʻufaʻu fakafufū kovi ʻaupito ʻa ia naʻe kau ki ai ʻa e lavaki, puke fakapōpula taʻetotonu, ko hano fakamāuʻi taʻefakalao, mo ha tukuakiʻi loi ki he feinga ke fakatupu angatuʻu. Naʻe taaʻi ʻa Sīsū, ʻanuhi, lumaʻi, pea haha ʻaki ha uipi naʻe ngaohi ke ne hae hono kakanó. Naʻe tautea leva ia ʻe he kōvana Loma ko Ponito Pailató ke ne pekia ʻi ha ʻakau fakamamahi. Naʻe tutuki ia ki ha fuʻu pou ʻakau pea tautau hangatonu ai. Naʻe langa fakaʻulia ʻa ʻene mānava taki taha, pea naʻe laui houa peá ne toki pekia. ʻI he kotoa ʻo e ʻahiʻahi fakamamahi ko iá, naʻe tauhi maʻu ʻe Sīsū ʻa ʻene anga-haohaoa kakato ki he ʻOtuá.
14. Ko e hā naʻe fakaʻatā ai ʻe he ʻOtuá ʻa hono ʻAló ke faingataʻaʻia pea pekiá?
14 Ko ia, naʻe hoko ʻi Nīsani 14, 33 T.S., ʻa hono foaki ʻe Sīsū ʻa ʻene moʻuí “ke huhuʻi ʻaki ha tokolahi, heʻene fetongi kinautolu.” (Maʻake 10:45; 1 Tīmote 2:5, 6) Naʻe malava ʻa Sihova ke ne ʻafio hifo mei hēvani ki he faingataʻaʻia mo e pekia ʻa hono ʻAlo ʻofaʻangá. Ko e hā naʻe fakaʻatā ai ʻe he ʻOtuá ke hoko ha meʻa fakalilifu pehē? Naʻá ne fai pehē koeʻuhi naʻá ne ʻofa ki he faʻahinga ʻo e tangatá. Naʻe pehē ʻe Sīsū: “Naʻe ʻofa pehe ʻa e ʻOtua ki māmāni, ko ia naʻa ne foaki hono ʻAlo tofu-pe-taha-ne-fakatupu, koeʻuhi ko ia kotoa pe ʻoku tui pikitai kiate ia ke ʻoua naʻa ʻauha, kae maʻu ʻa e moʻui taʻengata.” (Sione 3:16) ʻOku toe akoʻi mai kiate kitautolu ʻe he pekia ʻa Sīsuú ko Sihová ko ha ʻOtua ʻo e fakamaau totonu haohaoa. (Teutalōnome 32:4) ʻOku fifili nai ʻa e niʻihi pe ko e hā naʻe ʻikai ke tuku ange ai ʻe he ʻOtuá ʻa ʻene ngaahi tefitoʻi moʻoni ʻo e fakamaau totonú ʻa ia naʻe fiemaʻu ai ʻa e moʻui maʻá e moʻuí pea tukunoaʻi ʻa e totongi ia ʻo e ʻalunga angahalaʻia ʻa ʻĀtamá. Ko hono ʻuhingá he ʻoku nofo maʻu pē ʻa Sihova ki heʻene ngaahi laó mo pouaki kinautolu, neongo ʻe hoko ai ha mole lahi kiate ia.
15. Koeʻuhi naʻe mei hoko ko ha fakamaau taʻetotonu ia hano tuku ai pē ʻa Sīsū ke ne ʻi ai ʻo tuʻuloa, ko e hā naʻe fai ʻe Sihová?
15 Naʻe toe fiemaʻu ʻe he fakamaau totonu ʻa Sihová ke maʻu ha ikuʻanga fakafiefia ʻi he pekia ʻa Sīsuú. ʻI he ʻosi angé, ʻe hoko ko e fakamaau totonu hano tuku ai pē ʻa e tokotaha anga-tonu ko Sīsuú ke mohe ʻi he maté ʻo taʻengata? Ko hono moʻoní ʻoku ʻikai! Naʻe kikiteʻi ʻi he Ngaahi Konga Tohitapu Faka-Hepeluú ʻe ʻikai ke tuku ai pē ʻa e tokotaha mateaki ʻa e ʻOtuá ʻi he faʻitoká. (Sāme 16:10; Ngāue 13:35) Naʻá ne mohe ʻi he maté ʻi he ngaahi konga ʻo e ʻaho ʻe tolu, pea naʻe fokotuʻu hake leva ia ʻe Sihova ko e ʻOtuá ke ne moʻui ko ha tokotaha laumālie māfimafi.—1 Pita 3:18.
16. Ko e hā naʻe fai ʻe Sīsū ʻi heʻene foki hake ki hēvaní?
16 ʻI heʻene pekiá, naʻe tuku fakaʻaufuli atu ai ʻe Sīsū ʻa ʻene moʻui fakaetangatá. ʻI hono fokotuʻu hake ke moʻui ʻi hēvaní, naʻá ne hoko ai ko ha tokotaha laumālie foaki-moʻui. ʻIkai ngata aí, ʻi he taimi naʻe hāʻele hake ai ʻa Sīsū ki he feituʻu toputapu taha ʻi he ʻuniveesí, naʻá ne toe feohi ai mo siʻene Tamaí pea foaki ai kiate Ia ʻa e mahuʻinga ʻo ʻene moʻui fakaetangata haohaoá. (Hepelū 9:23-28) Ko e mahuʻinga ʻo e moʻui maʻongoʻonga ko iá naʻe malava ke ngāueʻaki ia maʻá e faʻahinga talangofua ʻo e tangatá. Ko e hā hono ʻuhinga ʻo e meʻa ko iá kiate koe?
HUHUʻI ʻA KALAISÍ PEA MO KOE
17. ʻOku malava fēfē ke tau maʻu ʻa e fakamolemole ʻo makatuʻunga ʻi he feilaulau huhuʻi ʻa Kalaisí?
17 Fakakaukau ange ki he founga ʻe tolu ʻoku ʻaonga ai ʻa e feilaulau huhuʻi ʻa Kalaisí kiate koe naʻa mo e taimí ni. ʻUluakí, ʻokú ne ʻomai ʻa e fakamolemole ʻo e ngaahi angahalá. Fakafou ʻi he tui ki he taʻataʻa ʻo Sīsū ne lilingí, ʻoku tau maʻu ai “ʻa e huhuʻi,” ʻio, “ko e fakamolemole o ʻetau ngaahi angahala.” (ʻEfesō 1:7) Ko ia kapau kuo tau fai ha angahala mamafa, ʻoku malava ke tau kole fakamolemole ki he ʻOtuá ʻi he huafa ʻo Sīsuú. Kapau ʻoku tau fakatomala moʻoni, ʻe ngāueʻaki ʻe Sihova kiate kitautolu ʻa e mahuʻinga ʻo e feilaulau huhuʻi ʻa hono ʻAló. ʻOku fakamolemoleʻi kitautolu ʻe he ʻOtuá, ʻo ʻomai kiate kitautolu ʻa e tāpuaki ko ha konisēnisi lelei, kae ʻikai ko hono fakamālohiʻi mai pē ʻa e tautea ko e maté ʻa ia ʻoku tau tofanga ai ko e tupu mei he faiangahalá.—Ngāue 3:19; 1 Pita 3:21.
18. ʻI he founga fē ʻoku ʻomai ai ʻe he feilaulau ʻa Sīsuú ha ʻamanaki kiate kitautolu?
18 Ko hono uá, ʻoku tokonaki mai ʻe he feilaulau huhuʻi ʻa Kalaisí ʻa e makatuʻunga ʻo ʻetau ʻamanaki ki he kahaʻú. ʻI he vīsone, naʻe sio ai ʻa e ʻaposetolo ko Sioné ki ha “fuʻu kakai lahi, ʻa ia ʻe ʻikai lava ʻe ha taha hono lau” te nau hao atu ʻi he ngataʻanga fakalilifu ʻo e ngaahi meʻa ʻo e fokotuʻutuʻu ko ʻení ʻoku tuʻunuku maí. Ko e hā te nau hao ai kinautolu ʻi he taimi ʻe fakaʻauha ai ʻe Sihova ʻa e fuʻu tokolahi kehe ko ē? Naʻe tala ʻe ha ʻāngelo kia Sione ko e fuʻu kakai lahí naʻa nau “fō honau kofu, ʻo fakahinehina ʻi he taʻataʻa ʻo e Lami,” ko Sīsū Kalaisi. (Fakahā 7:9, 14) Kapau pē te tau ngāueʻi ʻa e tui ki he taʻataʻa ʻo Sīsū Kalaisi naʻe lilingí pea moʻui ʻo fehoanaki mo e ngaahi fiemaʻu fakaʻotuá, te tau maʻa ai ʻi he ʻafio mai ʻa e ʻOtuá pea te tau maʻu ai ʻa e ʻamanaki ko e moʻui taʻengatá.
19. ʻOku anga-fēfē hono fakamoʻoniʻi ʻe he feilaulau ʻa Kalaisí ʻokú ne ʻofa mai mo ʻene Tamaí kiate koe?
19 Ko hono tolú, ko e feilaulau huhuʻí ko e taupotu taha ia ʻo e fakamoʻoni ʻo e ʻofa ʻa Sihová. Naʻe fakasino mai ʻi he pekia ʻa Kalaisí ʻa e ongo fakahāhā lahi taha ʻo e ʻofá ʻi he hisitōlia ʻo e ʻuniveesí: (1) Ko e ʻofa ʻa e ʻOtuá ʻi heʻene fekau hifo ʻa hono ʻAló ke pekia maʻatautolú; (2) ko e ʻofa ʻa Sīsū ʻo foaki loto-lelei ia ko ha huhuʻi. (Sione 15:13; Loma 5:8) Kapau ʻoku tau ngāueʻi moʻoni ʻa e tuí, ʻoku ʻaonga leva ʻa e ʻofa ko ʻení ki he tokotaha taki taha pea mo kitautolu kotoa. Naʻe pehē ʻe he ʻaposetolo ko Paulá: “[Ko e] ʻAlo ʻo e ʻOtua . . . naʻa ne ʻofeina au, mo ne foaki ia ʻe ia ke pekia koeʻuhi ko au.”—Kalētia 2:20; Hepelū 2:9; 1 Sione 4:9, 10.
20. Ko e hā ʻoku totonu ai ke tau ngāueʻi ʻa e tui ki he feilaulau huhuʻi ʻa Sīsuú?
20 Ko ia ai, tau fakahāhā ʻetau houngaʻia ki he ʻofa naʻe fakahāhaaʻi ʻe he ʻOtuá mo Kalaisí ʻaki hono ngāueʻi ʻa e tui ki he feilaulau huhuʻi ʻa Sīsuú. Ko e fai peheé ʻoku taki atu ia ki he moʻui taʻengatá. (Sione 3:36) Ka, ʻoku ʻikai ko e ʻuhinga mahuʻinga lahi taha ia ʻo e moʻui mo e pekia ʻa Sīsū ʻi he māmaní ke fakamoʻui kitautolu. ʻIkai, ko ʻene tokanga tefitó naʻe fekauʻaki ia mo ha fakakikihi lahi ange, ʻoku fakalūkufua ia. Hangē ko ia te tau vakai ki ai ʻi he vahe hono hoko maí, ko kitautolu kātoa ʻoku tau kaunga ki he fakakikihi ko iá koeʻuhi ʻokú ne fakahaaʻi ʻa e ʻuhinga kuo fakaʻatā ai ʻe he ʻOtuá ʻa e anga-fulikivanú mo e faingataʻá ke kei tolonga ʻo fuoloa ʻi he māmani ko ʻení.
SIVIʻI HOʻO ʻILÓ
Ko e hā naʻe pau ai ke pekia ʻa Sīsū ke fakahaofi ʻa e faʻahinga ʻo e tangatá?
Naʻe anga-fēfē ʻa hono totongi ʻa e huhuʻí?
ʻI he ngaahi founga fē ʻokú ke maʻu ai ʻa e ʻaonga mei he huhuʻí?
[Fakatātā peesi-kakato ʻi he peesi 67]