Fanongonongo

◼ Tohi ke tuʻuaki ʻi Sanuali: Fāʻūtaha ʻi he Lotu ki he ʻOtua Moʻoni Pē Taha, pe ko ha tohi motuʻa peesi 192 kehe ʻe ʻi he sitoka nai ʻa e fakatahaʻangá. Ko e ngaahi fakatahaʻanga ʻoku ʻikai haʻanau ngaahi tohi peheé ʻe lava ke nau tuʻuaki ʻa e Te Ke Malava ʻo Moʻui Taʻengata he Palataisi ʻi he Māmaní. Fepueli: The Greatest Man Who Ever Lived. Maʻasi: ʻIlo ʻA Ia ʻOku Taki Atu ki he Moʻui Taʻengatá. ʻE fai ha feinga makehe ke kamata ha ngaahi ako Tohitapu ʻi ʻapi. ʻEpeleli: Ko e ngaahi tatau tāutaha ʻo e Taua Leʻo mo e Awake! ʻAi ke ala maʻu ʻa e polosiua Fiemaʻu ʻe he kakai mahuʻingaʻiá, pea feinga ke kamata ha ngaahi ako Tohitapu ʻi ʻapi.

◼ Ko e kau malanga ʻosi papitaiso kotoa pē te nau ʻi he Fakataha Ngāue ki he uike ʻo Sanuali 25 ʻe ʻoatu ki ai ʻa e kaati Advance Medical Directive/Release pea mo e Identity Card ki heʻenau fānaú.

◼ Kamata ʻi Maʻasi, ko e malanga foʻou maʻá e kakaí ki he kau ʻovasia fakafeituʻú ko e “ʻOku Moʻoni Fēfē ʻa e ʻOtuá Kiate Koe?”

◼ ʻOku totonu ki he ngaahi fakatahaʻangá ke nau fai ha ngaahi fokotuʻutuʻu ke kātoangaʻi ʻa e Fakamanatu ʻi he taʻu ní ʻi he Tuʻapulelulu, ʻEpeleli 1, hili ʻa e tō ʻa e laʻaá. Neongo ʻe kamata tōmuʻa ange ʻa e malangá, ko hono tufa ʻo e mā mo e uaine ʻo e Fakamanatú ʻoku totonu ke toki kamata pē ia ʻi he hili e tō ʻa e laʻaá. Vakai ki he ngaahi maʻuʻanga fakamatala ʻea fakalotofonuá ke fakapapauʻi ʻa e taimi tō ʻa e laʻaá ʻi ho feituʻú. Neongo ʻoku lelei ki he fakatahaʻanga taki taha ke fai pē ʻene kātoanga Fakamanatú, ʻoku ʻikai nai malava ke pehē maʻu pē. ʻI he ʻi ai ha ngaahi fakatahaʻanga ʻoku nau ngāueʻaki ʻa e Fale Fakatahaʻanga tatau pē, mahalo ko ha fakatahaʻanga ʻe taha pe lahi ange ʻe lava ke nau ngāueʻaki ha fale kehe ʻi he efiafi pē ko iá. Kapau ʻe malava, te mau fokotuʻu atu ko e siʻi tahá pē ko e miniti ʻe 40 ʻi he vahaʻa ʻo e ngaahi polokalamá ke fakaʻatā ai ha taimi ke feʻiloaki ai mo e kau ʻaʻahí, fakalototoʻaʻi ʻa e faʻahinga mahuʻingaʻia foʻoú, pea maʻu ʻa e ʻaonga kakato mei he kātoangá. ʻOku totonu ke toe fai ha tokanga ki he fefonongaʻakí mo e ngaahi palopalema ʻo e tauʻangá, kau ki ai mo hono ʻomai mo e ʻave ʻa e kau pāsesé. ʻOku totonu ki he kulupu ʻo e kau mātuʻá ke nau fili pe ko e hā ʻa e ngaahi fokotuʻutuʻu ʻe lelei taha fakalotofonuá.

◼ Ko e malanga makehe maʻá e kakaí ki he faʻahitaʻu Fakamanatu 1999 ʻe fai ia ʻi he Sāpate, ʻEpeleli 18. Ko e kaveinga ʻo e malangá ko e “Kaumeʻa Moʻoni mo e ʻOtuá mo e Kaungāʻapí.” ʻE toki tufa atu ʻa e ʻautilainé. Ko e ngaahi fakatahaʻanga ko ia ʻoku fai ki ai ʻa e ʻaʻahi ʻa e ʻovasia fakafeituʻú, pe ha ʻasemipilī fakafeituʻú, pe ko ha ʻasemipilī ʻaho makehe ʻi he fakaʻosinga ʻo e uike ko iá ʻe fai ʻa e malanga makehé ʻi he uike hono hoko maí. ʻOku ʻikai totonu ki ha fakatahaʻanga ke ne fai ʻa e malanga makehé ki muʻa ʻi ʻEpeleli 18, 1999.

Fakatonutonu ʻi he Ngaahi Houa ʻOku Fiemaʻu ki he Kau Tāimuʻá

¹ Ko kitautolu kotoa ʻoku tau houngaʻia ʻi hono maʻu ha kau tāimuʻa tuʻumaʻu mo e tāimuʻa tokoni ngāue mālohi ʻi he fakatahaʻangá. Naʻa mo e feituʻu ʻoku fakangatangata mo ngāueʻi fakaʻāuliliki ʻi ha tuʻunga tuʻumaʻu, kuo fokotuʻu ʻe he kau tāimuʻá ha faʻifaʻitakiʻanga lelei ʻaki ʻenau ngāue faivelenga ki he Puleʻangá. Kuo nau fakalototoʻaʻi kotoa ʻa e kau malangá ke hanganaki femoʻuekina ʻi he kumi ki ha faʻahinga ʻoku nau “hehema totonú.”​—Ng. 13:​48, NW.

² Kuo fakatokangaʻi ʻe he Sōsaietí ʻa e ngaahi faingataʻa lahi ʻoku fehangahangai mo e kau tāimuʻá, tautautefito fekauʻaki mo hono maʻu ha ngāue fakaemāmani konga-taimí ʻa ia ʻe fakaʻatā ai kinautolu ke tokangaʻi feʻungaʻaki ʻenau ngaahi fiemaʻu fakafoʻituituí koeʻuhí ke nau kei hokohoko atu pē ʻi he ngāue taimi-kakató. Ko e ngaahi tuʻunga fakaʻikonōmika lolotongá ʻi he ngaahi fonua lahi kuó ne toe ʻai ai ke faingataʻa ange ki he niʻihi ke kau ki he ngāue tāimuʻá, neongo ko ʻenau holi loto-moʻoní ia. ʻI he lolotonga ʻo e ngaahi māhina kuo toki ʻosí, ko e ngaahi meʻá ni mo e ngaahi tafaʻaki kehe kuo fai ha fakakaukau fakalelei ki ai.

³ Ko ia ai, ʻi he vakai atu ki he meʻa ʻi ʻolungá, kuo fakasiʻisiʻi ʻe he Sōsaietí ʻa e houa ʻoku fiemaʻu fakatouʻosi ki he kau tāimuʻa tuʻumaʻú mo e tāimuʻa tokoní. ʻI hono kamataʻaki ʻa e tohimāhina ki he taʻu 1999, ko e fiemaʻu ki he kau tāimuʻa tuʻumaʻú ʻe houa pē ʻe 70 ki he māhina taki taha, pe ko ha fakakātoa ko e houa ʻe 840 ki he taʻu. Ko e fiemaʻu fakamāhina ki he kau tāimuʻa tokoní ʻe houa pē ʻe 50. Ko e houa ʻoku fiemaʻu ki he kau tāimuʻa makehé mo e kau misinalé ʻoku tuʻumaʻu taʻeliliu pē ia, koeʻuhí he ʻoku fai ha tokonaki ia ʻe he Sōsaietí ke tokoniʻi kinautolu ke tokangaʻiʻaki ʻenau ngaahi fiemaʻu fakamatelie tefitó. Ko ia, ʻoku lava ke nau hangataha kakato ange ki heʻenau ngāue fakamalangá mo ngaohi-ākongá.

⁴ ʻOku ʻamanekina ko e fakatonutonu ko ʻeni ʻi he fiemaʻu ki he houá ʻe tokoniʻi lahi ange ai ʻa e kau tāimuʻá ke nau pikimaʻu ki he monū maʻongoʻonga ko ʻeni ʻo e ngāué. ʻOku totonu ke toe fakaava ai ʻa e hala ki he tokolahi ange ʻo e kau malangá ke ngāue tāimuʻa tuʻumaʻu mo tāimuʻa tokoni. Ko ha tāpuaki moʻoni ʻeni ʻoku totonu ki he tokotaha kotoa pē ʻi he fakatahaʻangá!