ʻOkú Ke Houngaʻia ʻi he Faʻa Kātaki ʻa Sihová?

¹ Kapau naʻe ʻikai ke faʻa kātaki ʻa Sihova ʻi he ngaahi taʻu ʻe 10, 20 pe toe lahi ange ʻi he kuohilí, ʻi hono fakaʻatā ha fakamoʻoni lahi ange ke faí, ne ke mei ako ʻa e moʻoní? He houngaʻia ē ka ko kitautolu ʻi heʻene fakaʻatā ʻa e kakai tokolahi ange “ke aʻusia ʻa e fakatomala.” Neongo ia, ko e ʻaho lahi ʻo e fakamaau ʻa Sihová “ʻe hoko mai . . . ʻo hange ha kaihaʻa.” (2 Pita 3:​9, 10) Ko ia ai, ko e faʻa kātaki ʻa e ʻOtuá ʻoku ʻikai totonu ke fakaʻuhingahalaʻi ʻo pehē ko ha toloi ia ʻa hono ʻomai ʻa e ngataʻangá ki he fokotuʻutuʻu ko ʻeni ʻo e ngaahi meʻá.​—Hap. 2:3.

² Ongoʻi Fakaʻofaʻia ʻi he Kakaí: Ko e kātaki-fuoloa ʻa Sihová ʻoku lahi mamaʻo ange ia ʻi heʻetau mahinó. Kuo pau ke ʻoua ʻe mole ʻetau vakai ki hono taumuʻá. (Siona 4:​1-4, 11) ʻOku ʻafio mai ʻa Sihova ki he tuʻunga fakaʻofa ʻo e faʻahinga ʻo e tangatá pea ʻokú ne manavaʻofa kiate kinautolu. ʻOku ongoʻi pehē pē ʻa Sīsū. ʻI he fakaʻofaʻia ʻi he fuʻu tokolahi ko ia naʻá ne malanga ki aí, naʻá ne fiemaʻu ai ʻa e ngāue fakaʻevangelioó ke fakalahi atu koeʻuhi ke maʻu ʻe ha tokolahi ange ʻa e faingamālie ʻo e moʻui taʻengatá.​—Mt. 9:​35-38.

³ ʻI he taimi ʻoku hoko ai ʻa e ngaahi meʻa fakamamahí mo e ngaahi fakatamakí, ʻikai ʻoku tau kaungāmamahi mo e kakai ko ia ʻoku ʻikai te nau ʻilo ʻa e moʻoní? Ko e kakai ʻi he ʻaho ní ʻoku nau hangē “ha fanga sipi taʻe hanau tauhi” ʻi heʻenau feinga ke fekuki mo mahinoʻi ʻa e ngaahi fuʻu maveuveu ʻi he māmaní. (Mk. 6:34) ʻI he faivelenga ʻi hono malangaʻi ʻa e ongoongo leleí, ʻoku tau fakafiemālieʻi ai ʻa e faʻahinga ʻoku hehema totonu honau lotó pea fakahaaʻi ai ʻetau houngaʻia ki he faʻa kātaki ʻa Sihová.​—Ng. 13:48, NW.

⁴ ʻOku Fakavavevave ʻa ʻEtau Ngāué: ʻI he taʻu kuo ʻosí naʻe papitaiso ai ʻa e toko 323,439 pea laka hake ʻi he toko 14,000,000 naʻa nau maʻu ʻa e Fakamanatú. Ko ha malava lahi ē ki he tokolahi ange ke nau hao atu ʻi he fakaʻauha ʻo e fokotuʻutuʻu fulikivanu ko ʻení! Ko e tokolahi ʻo e “fuʻu kakai lahi” te nau ʻi aí, ʻoku ʻikai ke tau ʻilo ki ai. (Fkh. 7:9) Ko e fuoloa pea toki ʻosi ʻa ʻetau ngāue ke malangá, ʻoku ʻikai ke tau ʻilo ki ai. Ka ʻoku ʻafioʻi ia ʻe Sihova. ʻE malangaʻi ʻa e ongoongo leleí ki heʻene fiemālié, “pea toki hoko ʻa e ngataʻanga.”​—Mt. 24:14.

⁵ ʻOku toesiʻi ʻa e taimi ʻoku toé, pea ko e ʻaho ʻo e ʻOtuá ʻoku tuʻunuku mai. (1 Kol. 7:29a; Hep. 10:37) ʻOku ʻikai ha veiveiua, “ʻoku ofi ʻeni hotau fakamoʻui ʻi he taimi naʻa tau fua tui ai.” (Loma 13:11) ʻAi ke ʻoua te tau maʻuhala fekauʻaki mo e taumuʻa ʻo e faʻa kātaki fakaʻotuá. ʻI hono kehé, ʻai ke tau malanga fakavavevave koeʻuhí he ʻoku ʻi ai ʻa e tokolahi ange ʻoku nau fakaʻamu ki he māʻoniʻoní ke nau hokosia nai ai ʻa e meesi lahi ʻa Sihová.