Ngaahi Fanongonongo

◼ Tohi ke ngāueʻaki he lolotonga ʻo Sēpitemá: Te Ke Malava ʻo Moʻui Taʻengata he Palataisi ʻi he Māmaní. ʻOkatopa: Ko e Awake! mo e Ko e Taua Leʻo. ʻE lava ke tuʻuaki nai ʻa e tukuhau ʻi he ngaahi toe ʻaʻahí. Nōvema: ʻOku Totonu Ke Ke Tui ki he Tolu-tahaʻi-ʻotua? Tisema: Te Ke Malava ʻo Moʻui Taʻengata he Palataisi ʻi he Māmaní. FAKATOKANGA: Ko e ngaahi fakatahaʻanga te nau fie maʻu ʻa e ngaahi tohi ki he feingatau ʻoku hā ʻi ʻolungá ʻoku totonu ke nau kole ʻi heʻenau Literature Request Form (S(d)-14) fakamāhina hono hoko maí. Kātaki ʻo kole muʻa ha ngaahi makasini ʻe fie maʻu makehe ke tuʻuaki ʻi ʻOkatopá.

◼ ʻOku totonu ke hanga ʻe he ʻovasia pulé pe ko ha taha te ne fili ʻe ia ʻo ʻaotitaʻi ʻa e ʻakauni ʻa e fakatahaʻangá ʻi Sēpitema 1 pe ʻi he faingamālie vave taha ʻi he hili iá. Pea fanongonongo ki he fakatahaʻangá ʻi he ʻosi hono fai iá.

◼ ʻE kamata ʻi ʻOkatopa 18, 1993, ʻo aʻu ki Sānuali 17, 1994, ʻe fai ai ʻa e Ako Tohi Fakaefakatahaʻangá ʻi he polosiua ʻOku Totonu Ke Ke Tui ki he Tolu-tahaʻi-ʻotua?

◼ Ko e kau malanga ʻoku nau palani ke tāimuʻa fakataimi ʻi ʻOkatopá ʻoku totonu ke ʻomai vave ki muʻa ʻenau ngaahi tohi kolé. ʻE lava ai ke fai ʻe he kau mātuʻá ha ngaahi fokotuʻutuʻu ʻe fie maʻu ki he ngaahi tohi mo e feituʻu ke fai ai ʻa e ngāue fakamalangá.

◼ ʻOku fakamanatu mai ki he kau mātuʻá ke nau muimui ki he akonaki ʻoku fakahā ʻi he peesi 21-23 ʻo e Ko e Taua Leʻo ʻo Sēpitema 1, 1991, ʻo fekauʻaki mo ha taha pē kuo tuʻusi pe kuó ne fakamavahe mei he fakatahaʻangá ʻiate ia pē ʻa ia ʻoku nau loto nai ke toe fakafoki mai.

◼ Kuo ʻosi teuteu ʻa e Watchtower Publications List foʻou pea kuo lī meili ki he fakatahaʻanga taki taha ʻa e tatau ʻe fā. ʻOku totonu ke tufaki ia ki he sēkelitalí pea mo e ngaahi tokoua ʻoku nau tokangaʻi ʻa e ngaahi tohí, ngaahi makasiní, mo e ʻakauní.

◼ ʻOku pulusi ʻe he Sōsaietí ʻi he taimí ni ʻa e voliume faka-Pilitania ʻo e The Watchtower ki he ngaahi taʻu 1970 ki he 1979 ko e ngaahi tohi ʻe ala maʻu maʻu pē. Ko kinautolu ʻoku saiʻia ke maʻu ʻa e ngaahi voliume ko iá ʻoku totonu ke nau kole ʻo fakafou ʻi he fakatahaʻangá. Kātaki ʻo manatuʻi muʻa ko e ngaahi voliumé ko e ngaahi tohi ke kole makehe.

Ke Hoko ʻo ʻAonga ki he Niʻihi Kehe ʻa Hono Ngāueʻaki ʻa e Ngaahi Makasiní

¹ Ko ha fiefia lahi ē ka ko kitautolu ʻi hono maʻu ʻa e tatau fakamuimui ʻo e Ko e Taua Leʻo mo e Awake! ʻOku tau loto-hounga ʻi he faingamālie ke lau ʻa e ongo makasiní ʻi he vave taha ʻe malavá koeʻuhi ke tau maʻu ha ʻaonga mei he ngaahi fakamatala ʻoku hā aí. ʻI he ʻikai ke ngata pē ʻi he sio ki ha kupu te ne tokoniʻi fakafoʻituitui kitautolú, ko e fakakaukau lelei ia ke sio ki ha ngaahi poini ʻe malava ke ngāueʻaki ʻi hono tuʻuaki ʻa e ngaahi makasiní ki ha niʻihi kehé. Te tau loto nai ke fakaʻilongaʻi ha ngaahi konga ʻa ia ʻe fakamānako tautefito kiate kinautolu ʻi he ngaahi feituʻu ʻoku ngāue ai ʻa e fakatahaʻanga ʻoku tau kau ki aí pe hiki ha ngaahi nouti ʻi heʻetau ngaahi tataú ke fakamanatu kiate kitautolu ha ngaahi poini fakatupunga talanoa pea mo e founga ʻo hono tuʻuaki fakalotofonua atu ʻo e ngaahi makasiní.

² ʻOku tolonga ʻa e mahuʻinga ʻo ʻetau ngaahi makasiní. Neongo ʻoku tau faʻa tokanga tefito ki hono tuʻuaki ʻa e makasini fakamuimui tahá, ʻoku ʻikai fie maʻu ke liʻaki ʻa e ngaahi tatau motuʻa angé, he koeʻuhi ʻoku ʻikai ke tupu ʻo motuʻa hono ngaahi fakamatalá. Faʻo ha ngaahi tatau motuʻa ʻi hoʻo kato malangá koeʻuhi ke ala maʻu ʻo ngāueʻaki ʻi he ngāue fakamalangá. ʻE mātuʻaki fuʻu ʻaonga ʻeni tautefito ʻo ka ke ʻilo ʻa e meʻa ʻoku mahuʻingaʻia ai ʻa e toko taha ʻapí. ʻI hono tuku atu ha makasini motuʻa ange, ʻoku lelei ke ke lea nounou ki he toko taha ʻapí ʻo kau ki heʻene faingamālie ke fai ha tokoni ki he ngāue ʻi māmani lahí.

Ako ʻa e Ongo Tohi ko e Moʻui Taʻengata mo e Fāʻūtaha ʻi he Lotu

¹ ʻE malava ke ngāueʻaki ʻa e ngaahi tuleki, ngaahi polosiua, ngaahi makasini, mo e ngaahi tohi ke kamata ʻa e ngaahi ako Tohi Tapu ʻi he ngaahi ʻapí mo e kakai ʻoku mahuʻingaʻiá. Koeʻuhi ko e lahi hono tufaki pea mo hono manakoá, kuo ngāueʻaki ʻa e tohi ko e The Greatest Man Who Ever Lived ke kamata ʻa e ngaahi ako. ʻOku moʻoni, ʻoku totonu ke fakalototoʻaʻi ʻa e toko taha kotoa pē ke ne lau mo ako ia.

² Kae kehe, ʻoku ʻi ai ʻa e ongo tohi ʻe ua ʻoku totonu ke ako ai mo kinautolu kei foʻoú ke tokoniʻi kinautolu ke maʻu ʻa e mahino ki he ngaahi tokāteline tefito ʻa e Tohi Tapú pea pehē ki he ngaahi tuʻunga ʻo e moʻui faka-Kalisitiané. Ko e: Te Ke Malava ʻo Moʻui Taʻengata he Palataisi ʻi he Māmaní mo e Fāʻūtaha ʻi he Lotu ki he ʻOtua Moʻoni Pē Taha. ʻOku fokotuʻu atu heni kiate kinautolu ʻoku nau fai ʻa e ngaahi ako Tohi Tapú ʻi he ngaahi tohi kehé ke liliu ki he taha ʻo e ongo tohi ko ʻení ʻi he vave taha ʻe malavá. Kapau ʻoku fai ha ako ʻi he tohi ko e The Greatest Man, fakalototoʻaʻi ʻa e toko taha akó ke hokohoko atu ʻene lau ʻiate ia pē ʻa e tohí. ʻOku totonu ke hokohoko atu ʻa e ako Tohi Tapú kae ʻoua kuo ʻosi ʻa e ongo tohi ko e Moʻui Taʻengata mo e Fāʻūtaha ʻi he Lotu, neongo kuo papitaiso nai ʻa e toko taha ko iá ki muʻa ʻoku teʻeki ʻosi hono ako ʻa e tohi hono uá. ʻE ʻai ʻe he founga ko ʻení ke toe loloto ange ai mo tuʻumaʻu ʻa e tuʻunga fakalaumālie ʻo e toko taha ako Tohi Tapú.