Naʻe Fili ʻe he ʻOtuá ʻa Tēvita

ʻOKÚ KE sio ki he meʻa naʻe hokó? Kuo fakahaofi ʻe he tamasiʻí ʻa e kiʻi lamí ni mei he peá. Naʻe haʻu ʻa e peá ʻo ʻave ʻa e kiʻi lamí ke ne kai. Ka naʻe tulimui ai ʻa e tamasiʻí, peá ne fakahaofi ʻa e lamí mei he ngutu ʻo e peá. Pea ʻi he tuʻu hake ʻa e peá naʻe puke ia ʻe he tamasiʻí peá ne taaʻi ʻo mate! ʻI he taimi ʻe taha naʻá ne fakahaofi ha sipi mei ha laione. ʻIkai ko e tamasiʻi loto-toʻa ia? ʻOkú ke ʻilo pe ko hai ia?

Ko e tamasiʻi talavou ia ko Tēvitá. Naʻe nofo ʻi he kolo ko Pētelihema. Ko ʻene kui tangatá ko ʻŌpeti, ko e tama ʻa Lute mo Pōasi. ʻOkú ke manatuʻi kinaua? Pea ko e tamai ʻa Tēvitá ko Sese. Naʻe tauhi ʻe Tēvita ʻa e fanga sipi ʻa ʻene tamaí. Naʻe fāʻeleʻi ʻa Tēvita hili ʻa e taʻu ʻe 10 mei hono fili ʻe Sihova ʻa Saula ke hoko ko e tuʻí.

Naʻe aʻu ki he taimi naʻe pehē ai ʻe Sihova kia Sāmiuela: ‘Toʻo ha lolo makehe ʻo ʻalu ki he fale ʻo Sesé ʻi Pētelihema. Kuó u fili ha taha ʻo hono ngaahi fohá ke hoko ko e tuʻi.’ ʻI he vakai atu ʻa Sāmiuela ki he foha lahi ʻo Sese ko ʻĒliapi, naʻá ne pehē ʻiate ia pē: ‘ʻOku pau ko e tokotaha ʻeni kuo fili ʻe Sihová.’ Ka naʻe tala ʻe Sihova kiate ia: ‘ʻOua te ke sio ki hono lahi mo ʻene talavou. Kuo ʻikai te u fili ia ke hoko ko e tuʻi.’

Ko ia naʻe ui ʻe Sese hono foha ko ʻApinatape ʻo ʻomai ia kia Sāmiuela. Ka naʻe pehē ʻe Samiuela: ‘ʻIkai, kuo ʻikai ke fili ia ʻe Sihova.’ Ko hono hokó, naʻe ʻomi ʻe Sese hono foha ko Sama. Naʻe pehē ʻe Sāmiuela: ‘ʻIkai, kuo ʻikai ke fili ia ʻe Sihova.’ Naʻe ʻomai ʻe Sese hono ngaahi foha ʻe toko fitu kia Sāmiuela, ka naʻe ʻikai fili ʻe Sihova ia ha taha meiate kinautolu. Naʻe ʻeke ʻe Sāmiuela: ‘Ko hoʻo tamaiki tangatá kotoa pē ʻeni?’

Naʻe tali ange ʻe Sese: ‘ʻOku toe pē ʻa e siʻisiʻi tahá. Ka ʻokú ne tauhi ʻa e fanga sipí.’ ʻI hono ʻomai ʻo Tēvitá, naʻe sio ʻa Sāmiuela ko e tamasiʻi hā matamatalelei ia. Naʻe pehē ʻe Sihova: ‘Ko e toko tahá ʻeni. Lilingi ʻa e loló ʻi hono ʻulú.’ Pea ko e meʻa ia naʻe fai ʻe Sāmiuelá. Naʻe kei toe ha taimi pea toki hoko ʻa Tēvita ko e tuʻi ʻo ʻIsileli.