“Ngāueleleiʻaki ʻa e Polosiua Fiemaʻu ke Kamata ha Ngaahi Ako Tohitapu”
Kuó ke ʻahiʻahiʻi ʻa e tuʻuaki hoko haké?
◼ “Te u saiʻia ke fakahāhā atu kiate koe ha polokalama ako Tohitapu ʻi ʻapi ʻoku mātuʻaki faingofua kae vave, ʻo ngāueʻaki ʻa e polosiua ko ení, Ko e Hā ʻOku Fiemaʻu ʻe he ʻOtuá Meiate Kitautolú? Kuo ʻiloʻi ʻe he tokolahi ʻi he tuʻunga siʻisiʻi ko e miniti ʻe 15 ʻi he uike ʻo feʻunga mo e uike ʻe 16, ʻe lava ke nau maʻu ai ʻa e ngaahi tali Fakatohitapu fakafiemālie ki he ngaahi fehuʻi faka-Tohitapu mahuʻinga ko ení.” Fakahaaʻi nounou ʻa e fakahokohoko ʻo e meʻa ʻi lotó. ʻI he huke ki he Lēsoni 1, lea: “Kapau ʻe lava ke ke tuku mai kia kimaua ha miniti ʻe nima nai, te ma saiʻia ke fakahaaʻi atu kiate koe ʻa e founga ʻo hono fai ení. Ko e Lēsoni 1 ʻoku fakakaveinga ia ko e ‘Founga ʻOku Lava Ke Ke ʻIlo Ai ʻa e Meʻa ʻOku Fiemaʻu ʻe he ʻOtuá.’” Ko hono hokó lau ʻa e foʻi fehuʻi ʻe tolú, pea fakamatalaʻi ʻa e ngaahi fika ʻoku haʻí. Lau ʻa e palakalafi 1, pea fakahaaʻi ki he tokotaha-ʻapí ʻa e founga ke kumi ai ʻa e talí. ʻE lava ke kole ki he tokotaha-ʻapí ke ne lau ʻa e palakalafi 2. Lea leva: “Makatuʻunga ʻi he fakamatala ko ení, ʻe fēfē haʻo tali ʻa e fehuʻi ko ení? [Toe lau ʻa e fehuʻí, pea fakaʻatā ʻa e tokotaha-ʻapí ke ne fai ha tali.] Te ke fakatokangaʻi ʻoku ʻi ai ʻa e ngaahi konga Tohitapu ʻoku ʻalu fakataha mo e palakalafi taki taha. ʻOku fakahanga ʻe he ngaahi meʻá ni ʻetau tokangá ki he tali ʻa e Tohitapú ki he ngaahi fehuʻi ko ení. Ko e fakatātaá, tau lau ʻa e 2 Timote 3:16, 17 pea sio angé pe ʻokú ne poupouʻi ʻa e tali naʻá ke ʻomai fekauʻaki mo e tokotaha-faʻu ʻo e Tohitapú.” Hili hono lau ʻa e palakalafi 3, ʻi he lāulea ki he fehuʻí, pea ʻi hono lau ʻa e Sione 17:3, tohoakiʻi ʻa e tokanga ʻa e tokotaha-ʻapí ki he ʻilo kuó ne maʻu ʻi hono fakamanatu ʻo e Lēsoni 1. ʻI he tuʻunga ko ení ʻe lava ke ke huke ki he Lēsoni 2 pea lau ʻa e fehuʻi fakaʻosí, “Ko e hā ʻa e founga ʻe ua ʻoku malava ke tau ako ai ʻo kau ki he ʻOtuá?” ʻEke leva: “Ko fē ʻa e taimi te ke maʻu ai ha miniti nai ʻe 15 koeʻuhi ke lava ʻo tau fai ai ʻa e Lēsoni 2 mo kumi ʻa e talí?”