Fanongonongo

◼ Tohi ke tuʻuaki ʻi Mē: Fakaʻaliʻali ha ngaahi tatau tāutaha ʻo e Taua Leʻo mo e ʻĀ Hake! fakatouʻosi. ʻI hono fai ʻa e ngaahi toe ʻaʻahi ki he kakai mahuʻingaʻiá, ʻa ia ʻe kau nai ki ai ʻa e ʻaʻahi ki he faʻahinga naʻa nau maʻu ʻa e Fakamanatú pe ko e ngaahi meʻa fakateokalati kehé ka ʻoku ʻikai te nau feohi longomoʻui mo e kautahá, tokangataha ki hono tufa ʻa e tohi Lotu ki he ʻOtua. ʻOku totonu ke fai ha feinga mālohi ke kamata ha ako Tohi Tapu ʻi ʻapi, tautefito kapau kuo ʻosi ako ʻe he niʻihi tāutaha ʻa e tohi ʻIlo mo e polosiua Fiemaʻu. Sune: Ako mei he Faiako Lahí. Kapau ʻoku pehē ʻe ha faʻahinga tāutaha ʻoku ʻikai haʻanau fānau, tuʻuaki ʻa e polosiua Fiemaʻu. ʻI hono ngāueʻaki ʻa e polosiuá, tokangataha ki hono kamata ha ngaahi ako Tohi Tapu ʻi ʻapi. Siulai mo ʻAokosi: ʻE lava ke ngāueʻaki ha polosiua peesi ʻe 32 feʻungamālie pē.

◼ ʻOku totonu ki he ʻovasia tauhí pe ko ha taha kuó ne vaheʻi ke ne ʻaotitaʻi ʻa e paʻanga ʻa e fakatahaʻangá ʻi Sune 1 pe ʻi he faingamālie vave taha ʻi he hili pē iá. ʻI he ʻosi hono fai ení, fai ha fanongonongo ki he fakatahaʻangá ʻi he hili hono lau ʻa e fakamatala paʻanga hono hokó.

Tuʻuaki ʻo e Ako mei he Faiako Lahí

◼ “ʻOkú ke fakakaukau ʻe hoko ʻa e māmaní ko ha feituʻu lelei ange kapau ʻe moʻuiʻaki ʻe he kakaí ʻa e lea ko ení? [Lau ʻa e Mātiu 7:​12a. Pea tuku ke ne tali.] ʻOku ʻi he tohí ni ʻa e ngaahi lēsoni lahi mei he faiako lahi taha kuo moʻui maí.” Fakahaaʻi ʻa e ngaahi fakatātā mo e fakamatala ʻo e fakatātā ʻi he vahe 17.

◼ “Ko e tokolahi taha ʻo e ngaahi mātuʻa he ʻaho ní ʻoku nau feinga ke fakahūhū ʻa e ngaahi tuʻunga fakaeʻulungāanga lelei ki heʻenau fānaú. ʻOkú ke ongoʻi ʻoku mahuʻinga eni? [Tuku ke ne tali. Pea lau leva ʻa e Palovepi 22:6.] Fakatokangaʻi ʻoku fakalototoʻaʻi ʻa e ngaahi mātuʻá ke nau kamata akoʻi ʻenau fānaú mei he taʻu siʻí. ʻOku faʻufaʻu ʻa e tohí ni ke tokoniʻi kinautolu ke fai ʻa e meʻa ko iá.” Fakahaaʻi ʻa e ngaahi fakatātā mo e fakamatala ʻo e fakatātā ʻi he vahe 15, 18, pe 32.

◼ “ʻOku faʻa ʻohovale ʻa e ngaahi mātuʻá ʻi he ngaahi fehuʻi ʻoku ʻeke ʻe heʻenau fānaú. Ko e niʻihi ʻo e ngaahi fehuʻi ko iá ʻoku lava ke faingataʻa hono talí, ʻikai ko ia? [Tuku ke ne tali. Pea lau leva ʻa e 2 Timote 3:​14, 15.] Ko e faʻē mo e kui-fefine ʻa Tīmoté naʻá na akoʻi ia mei heʻene kei valevalé ki he meʻa ʻoku leaʻaki ʻe he ngaahi Konga Tohi Tapú. ʻOku lava ke tokoniʻi ʻa e ngaahi mātuʻá ʻe he tohí ni ke nau fai ʻa e meʻa tatau ki heʻenau fānaú he ʻahó ni.” Fakahaaʻi ha fakatātā siʻi pē mo ha fakamatala ʻo e fakatātā ʻi he vahe 11 mo e 12 pe 34 ki he 36.

Ko ha Founga ke Tokoniʻi Ai Kinautolu

Ko e kau Kalisitiane moʻoní ʻoku nau kau ʻi he ngāue fakafaifekau ki he kakaí ko hono fakamafola ʻa e ongoongo leleí. (Fili. 2:​17) Koeʻuhi ke lavaʻi ia, ko ha ngaahi polosiua, ngaahi tuleki mo e ngaahi kupu tefito ʻi he ngaahi lea ʻe 20 kuo ʻi he ʻInitanetí ʻi he www.watchtower.org. Ko e tuʻuʻanga Uepi ko ení ʻoku ʻikai faʻufaʻu ia ke tufaki ai ʻa e ʻū tohi fakamuimuí ki he Kau Fakamoʻoni ʻa Sihová. Ko hono taumuʻá ke ʻai ke ala maʻu ki he kakaí ha fakamatala totonu fekauʻaki mo e meʻa ʻoku akoʻi ʻe he Kau Fakamoʻoni ʻa Sihová mei he Tohi Tapú.

Ki muí ni mai, kuo ʻi ai ha fakalahi mahuʻinga ki heʻetau tuʻuʻanga Uepi fakaʻofisialé. Ko e polosiua eni Ko e Hā ʻOku Fiemaʻu ʻe he ʻOtuá Meiate Kitautolú? ʻi he ngaahi lea laka hake he 220. Pehē foki, kamata ʻi he ongo ʻīsiu ʻo Sanuali 1 mo e Sanuali 8, 2004, Ko e Taua Leʻo mo e ʻĀ Hake! ʻi he lea kotoa pē naʻe kamata ke fakahaaʻi ai hotau tuʻasila Uepí ʻi he takafi ʻi muí.

ʻE lava fēfē ke ke ngāueʻaki ʻa e meʻangāue ko ení? Sai, te ke fetaulaki nai mo ha tokotaha ʻa ia ʻoku hā ngali mahuʻingaʻia ka ʻokú ne mahinoʻi pē ha lea kehe. Kapau ʻoku lava ke ne aʻu ki he ʻInitanetí, ʻe lava ke ke fakahaaʻi ange ʻa e tuʻasila Uepi ʻi he takafi ʻi mui ʻo e Taua Leʻo pe ko e ʻĀ Hake! ʻI he foungá ni te ne malava nai ai ke sivisiviʻi ʻa e polosiua Fiemaʻu ʻi heʻene lea tuʻufonuá kae ʻoua ke lava ʻo ke foki atu mo ha tohi ʻi heʻene leá. Pe te ke malava nai ke ʻave ʻa e toe ʻaʻahí ki he fakatahaʻanga pe kulupu ʻa ia ʻokú ne tokangaʻi ʻa ʻene leá.