Ko Hono Ako ʻa e Polosiua ko e Hanganaki Leʻo!
ʻE ako ʻe he ngaahi fakatahaʻanga takatakai ʻi māmaní ʻa e polosiua ko e Hanganaki Leʻo! lolotonga ʻa e ngaahi uike ʻo Mē 23 ki Sune 20, 2005, ʻi he Ako Tohi ʻa e Fakatahaʻangá. Kātaki ʻo ngāueʻaki ʻa e ngaahi fehuʻi hokó ʻi he teuteú mo e lolotonga hono fakahoko ʻa e fakataha ko ení. Lolotonga ʻa e akó, lau ʻa e fakamatala kuo pulusí, pea lau ʻa e ngaahi konga Tohi Tapu ʻoku haá ʻo fakatatau ki he taimí.
Uike ʻo Mē 23
◼ Peesi 3-4: Ko fē ʻi he ngaahi tuʻunga ʻoku fakahokohoko hení ʻoku tautefito ʻene uesia hoʻo moʻuí? Ko e hā ʻokú ne fakahaaʻi kiate koe ko e ngaahi tuʻunga ko ení ʻoku ʻikai ko ha ngaahi meʻa pē ia ʻoku tātātaha ʻene hoko fakalotofonua ʻo ʻikai hano mahuʻinga?
◼ Peesi 5: Ko e hā ʻokú ne fakatuipauʻi koe ʻoku tokanga moʻoni mai ʻa e ʻOtuá? Ko e hā nai te ne fakahaaʻi ʻa e lahi ʻo ʻetau tokanga fekauʻaki mo e ʻOtuá pea mo e meʻa ʻokú ne lolotonga faí?
◼ Peesi 6-8: Ko e hā ʻa e meʻa ʻoku leaʻaki ʻe he Mātiu 24:1-8, 14 ʻo fekauʻaki mo e ʻuhinga ʻo e ngaahi tuʻunga ʻo e māmani lolotongá? Hangē ko ia ʻoku fakahaaʻi ʻe he 2 Timote 3:1-5, ʻoku tau lolotonga moʻui ʻi he vahaʻa taimi fē? Ko e ngaahi ʻaho fakaʻosi ʻeni ʻo e hā? Ko e hā ʻokú ne fakatuipauʻi koe ko e Tohi Tapú ko e Folofola moʻoni ia ʻa e ʻOtuá? Ko e hā ʻa e Puleʻanga ʻoku tau malanga fekauʻaki mo iá?
◼ Peesi 9-10: Ko e hā ʻoku totonu ai ke tau fakakaukau fakalelei ki heʻetau ngaahi fili fakaʻahó pea mo e ngaahi meʻa ʻoku tau fakamuʻomuʻa ʻi he moʻuí? (Loma 2:6; Kal. 6:7) ʻI hoʻo fakamanatu ʻa e ngaahi fehuʻi ʻi he peesi 10, ko e hā ʻa e ngaahi konga Tohi Tapu ʻoku haʻu ki hoʻo fakakaukaú ʻoku totonu ke ne tākiekina ʻa e meʻa ʻokú ke faí?
Uike ʻo Mē 30
◼ Peesi 11: Ko e hā ʻoku totonu ai ke tau fakakaukau fakafoʻituitui ki he ngaahi fehuʻi ʻoku ʻohake ʻi he peesi ko ení? (1 Kol. 10:12; Ef. 6:10-18) ʻOku anga-fēfē hono fakahaaʻi heʻetau tali ki he ngaahi fehuʻi ko ení pe ʻoku tau tali fakamātoato ʻa e faleʻi ʻa Sīsū ʻi he Mātiu 24:44?
◼ Peesi 12-14: Ko e hā ʻa e “taimi oʻene fakamāu” ʻoku lave ki ai ʻi he Fakahā 14:6, 7? Ko e hā ʻoku ʻuhinga ki ai ʻa e ‘manavahē ki he ʻOtuá, pea tuku kololia kiate iá’? Ko e hā ʻa Pāpilone ko e Lahi, pea ko e hā ʻe hoko ki aí? Ko e hā ʻa e ngāue fekauʻaki mo Pāpilone ko e Lahí ʻoku fiemaʻu ke tau fai he taimi ní? Ko e hā ʻa e meʻa kehe ʻoku kau ʻi he houa ʻo e fakamaau naʻe tomuʻa talá? Ko e hā ʻene uesia kitautolu ʻe he ʻikai ko ia ke tau ʻiloʻi “hono ʻaho, ʻumaʻā hono houa” ʻo hono fakahoko ko ia ʻa e fakamaau naʻe tomuʻa tala ʻe he ʻOtuá? (Mt. 25:13)
◼ Peesi 15: Ko e ha ʻa e ʻīsiu ʻo e tuʻunga-haú, pea ʻoku anga-fēfē ʻa e kaunga fakatāutaha kia kitautolu ʻa e meʻá ni?
◼ Peesi 16-19: Ko e hā ʻa e “ngaahi langi foʻou” mo e “fonua foʻou”? (2 Pita 3:13) Ko hai ʻokú ne talaʻofa mai e ngaahi meʻa ko ení? Ko e hā ʻa e ngaahi liliu ʻe ʻomai ʻe he ngaahi langi foʻoú mo e fonua foʻoú? Te tau maʻu ʻaonga fakafoʻituitui mei ai?
Uike ʻo Sune 6
◼ Peesi 20-1: Ko e hā ʻa e fakatokanga fekauʻaki mo e holá naʻe ʻoange ʻe Sīsū ki hono kau muimui ʻi he ʻuluaki senitulí? (Luke 21:20, 21) Naʻe malava ʻa e hola ko iá ʻanefē? Ko e hā naʻe fiemaʻu fakavavevave ai ke hola ʻo ʻikai toe toloí? (Mātiu 24:16-18, 21) Ko e hā ʻoku tokolahi ai ʻa e kakai ʻoku nau tukunoaʻi ʻa e ngaahi fakatokangá? Naʻe anga-fēfē ʻa e maʻu ʻaonga ʻa e laui afe ʻo e kakai ʻi Siaina pea mo e ʻOtu Motu Filipainí mei he tokanga ki he ngaahi fakatokanga falalaʻangá? Ko e hā ʻoku toe fiemaʻu fakavavevave ange ai ke tokanga ki he fakatokanga ʻa e Tohi Tapú ʻo fekauʻaki mo e ngataʻanga ʻo e fokotuʻutuʻu lolotonga ʻo e ngaahi meʻá? ʻI he vakai ki he fuʻu fakavavevave ko ení, ʻoku tau maʻu ai ʻa e fatongia ko e hā? (Pal. 24:11, 12)
◼ Peesi 22-3: ʻI ʻAositelēlia ʻi he 1974 pea ʻi Kolomupia ʻi he 1985, ko e hā naʻe tukunoaʻi taʻetokanga ai ʻe he tokolahi ʻa e ngaahi fakatokanga ʻo e fakatamakí, pea ko e hā ʻa e ikuʻangá? ʻOkú ke fakakaukau naʻe mei fēfē haʻo tali ki he ngaahi fakatokanga ko ení, pea ko e hā hono ʻuhingá? Ko e hā nai ʻokú ne fakahaaʻi pe naʻa tau mei tokanga ki he fakatokanga ʻi he ʻaho ʻo Noá? Ko e hā naʻe fiemaʻu ai ʻe he kakaí ke nau nofo ʻi loto mo ofi ki Sōtoma ʻo e kuonga muʻá? ʻE lava fēfē ke tau maʻu ʻaonga ʻi heʻetau fakakaukau fakamātoato fekauʻaki mo e meʻa naʻe hoko ʻi Sōtomá?
Uike ʻo Sune 13
◼ Peesi 24-7: Ngāueʻaki ʻa e “Ngaahi Fehuʻi ʻo e Akó” ʻi he peesi 27.
Uike ʻo Sune 20
◼ Peesi 28-31: Ngāueʻaki ʻa e “Ngaahi Fehuʻi ʻo e Akó” ʻi he peesi 31.
Ko ʻetau lāulea ko ia ki he polosiuá te ne tokoniʻi kitautolu ke tau “hanganaki leʻo” pea ke fakamoʻoniʻi ʻoku tau mateuteu. ʻOfa ke tapua atu maʻu pē ʻi heʻetau ngāue fakafaifekau ki he kakaí ʻa e fakavavevave ʻo e fanongonongo fakaeʻāngeló: “Mou manavahē ki he ʻOtua, pea tuku kololia kiate ia; he kuo hokosia ʻa e taimi oʻene fakamāu.”—Mt. 24:42, 44, NW; Fkh. 14:7.