Ko ha Lēsoni mei ha Kaivai

KO E folau tokotaha ʻi he vahá ʻoku lava ke fakaongosia. Ko e nunuʻa fakaongonoa ʻo e helaʻiá ʻoku faingofua ai ʻa ʻene fakamoʻuaʻi ʻa e kaivaí ʻi ha tuʻunga fakatuʻutāmaki, ʻo hoko ai ha ngaahi hala mo ha fili fehālaaki. ʻI he ʻuhinga ko ʻení, ʻokú ne fakahoungaʻi ai ʻa e mahuʻinga ʻo ha taula. ʻOku fakaʻatā ʻe he meʻá ni ha kaivai ongosia ke mālōlō pea ake hake ʻo ʻikai ha fakatuʻutāmaki ʻi haʻane tēkina atu. ʻI he taimi tatau, ʻoku fakamālohiʻi ʻe he taulá ʻa e taumuʻa ʻo e vaká ke hanga ki he havilí mo e ngaahi peaú pea tauhi ʻa e vaká ʻi hono tuʻunga tuʻumaʻu tahá.

Hangē pē ko e fehangahangai ʻa e kau kaivaí mo e ngaahi fakatuʻutāmaki lahi ʻi tahí, ko e kau Kalisitiané ʻoku nau fekuki mo e ngaahi tenge tuʻumaʻu ʻo e māmani ko ení pea ongoʻi ai ʻa e fiemaʻu ke mālōloó. Ko e moʻoni, naʻe tuʻo taha hono fakahinohino ʻe Sīsū ki heʻene kau ʻapositoló: “Mou ōmi ki ha potu lala fakaekimoutolu pe, ʻo mālōlō siʻi.” (Maake 6:31) ʻI he ʻahó ni, ʻoku vaheʻi nai ʻe he niʻihi ha ngaahi uike siʻi ke folau pe fononga ʻi ha fakaʻosinga ʻe taha ʻo e uiké ke mālōlō fakataha ai mo honau fāmilí. Ko e ngaahi momeniti pehení ʻoku lava ke hoko ʻo fakaivifoʻou mo fakaongoʻimālohi. Neongo ia, ʻe anga-fēfē ke tau fakapapauʻi ʻoku tau malu fakalaumālie ʻi he ngaahi taimi peheé? Ko e hā ʻe ngāue ko ʻetau taula fakalaumālié ia ke tokoniʻi kitautolu ke talitekeʻiʻaki ʻa e tēkiná pea tauhi maʻu ʻa e tuʻumaʻú?

Kuo fai ʻe Sihova ʻo hulu fau ha tokonaki ke tau ala maʻu. ʻOku ʻikai ko ha toe meʻa kehe ia mei heʻene Folofola Māʻoniʻoni, ko e Tohitapú. Ko hono lau fakaʻaho iá, te tau nofo ofi ai kia Sihova pea ʻikai tēkina atu meiate ia. Ko ʻene faleʻí te ne fakatuʻumaʻuʻi ai kitautolu pea fakaivia kitautolu ke matuʻuaki ʻa e ngaahi ʻahiʻahi ʻa Sētane mo ʻene māmaní. Ko ʻetau tauhi maʻu ha polokalama tuʻumaʻu ʻo e lau Tohitapú, naʻa mo e ʻi heʻetau taimi mālōloó, ʻoku lava ke ngāue ia ke ne taulaʻi fakalaumālie kitautolu.—Siosiua 1:​7, 8; Kolose 2:7.

ʻOku fakamanatu mai ʻe he tokotaha-tohi-sāmé kiate kitautolu ʻoku “monuia [“fiefia,” NW] ae tagata” ko ʻene “fiefia oku i he fono a Jihova; bea ko ene fono oku ne fakalaulauloto ai i he aho moe bo.” (Sāme 1:​1, 2, PM) Ko hono lau fakaʻaho ʻa e Folofola ʻa e ʻOtuá te ne ʻomai kiate kitautolu ʻa e ola “fiefia” ʻo e hoko ʻo fakaivifoʻou mo fakaongoʻimālohi moʻoni, ʻo mateuteu ke hokohoko atu ʻi hotau ʻalunga faka-Kalisitiané.

Te Ke Tali Lelei ha ʻAʻahi?

Naʻa mo e māmani faingataʻá ni, ʻe lava ke ke maʻu ʻa e fiefiá fakafou he ʻilo totonu mei he Tohitapú ʻo kau ki he ʻOtuá, ko hono Puleʻangá, mo ʻene taumuʻa fakaofo ki he faʻahinga ʻo e tangatá. Kapau te ke tali fiefia ha toe fakamatala pe te ke loto ke ʻaʻahi atu ha tokotaha ke fai ha ako Tohitapu taʻetotongi mo koe ʻi ho ʻapí, kātaki tohi ki he International Bible Students Association, Box 673, Apia, Samoa, pe ko ha tuʻasila feʻungamālie ʻa ia ʻoku hā ʻi he peesi 2.