ʻOku Fakapaleʻi ʻa e Kātakí

¹ “ʻI hoʻomou kītaki te mou maʻu mai homou laumālie.” (Luke 21:19) Ko e ngaahi lea ko iá, ʻa ia ʻoku faʻuʻaki ʻa e konga ʻo e kikite ʻa Sīsū fekauʻaki mo e “fakaʻosi ʻo e kuonga,” ʻoku fakahaaʻi mahino ai kuo pau ke tau mateuteu ke fehangahangai mo e ngaahi ʻahiʻahi lahi ʻi heʻetau tauhi maʻu ʻetau anga-tonú. Ka ʻi he mālohi ʻo Sihová, ʻe lava ʻe kitautolu taki taha ʻo ‘kataki ke aʻu ki he ngataʻangá’ pea “moui.”—Mt. 24:​3, 13; Fili. 4:13.

² Ko e fakatangá, ngaahi palopalema fakaemoʻui leleí, ngaahi faingataʻa fakapaʻangá mo e faingataʻaʻia fakaeongó ʻe lava ke ne ʻai ke faingataʻa ʻaupito ai ʻa e ʻaho taki taha. Kae kehe, kuo pau ke ʻoua ʻaupito naʻa ngalo ʻiate kitautolu, ʻoku feinga ʻa Sētane ke maumauʻi ʻetau anga-tonu kia Sihová. Ko e ʻaho taki taha ʻoku tau mateaki tuʻumaʻu ai ki heʻetau Tamaí ko e toe ʻaho ia kuo tau kau ai ʻi hono ʻoatu ha tali ki he pole ʻa e Tokotaha-Manukí. He fakafiemālie ē ke ʻilo ko hotau ngaahi “loʻimata” ʻi he fehangahangai mo e ʻahiʻahí ʻoku ʻikai ke fakangaloʻi! ʻOku nau mahuʻinga kia Sihova, pea ko ʻetau anga-tonú ʻoku fakafiefiaʻi ai ʻa hono lotó!—Sāme 56:8; Pal. 27:11.

³ Siviʻi ʻe he Ngaahi ʻAhiʻahi: ʻOku lava ke fakahaaʻi ʻe he faingataʻá ha vaivaiʻanga ʻo e tuí pe ko ha mele fakafoʻituitui, hangē ko e pōlepolé pe taʻekātakí. ʻI he ʻikai ke tau kumi ke hola pe fakangata ʻa e ngaahi ʻahiʻahí ʻaki ha ngaahi founga taʻefakatohitapú, kuo pau ke tau tokanga ki he faleʻi ʻa e Folofola ʻa e ʻOtuá ke “tuku ke fai ʻe kataki ʻene ngaue ke haohaoa.” Ko e hā hono ʻuhingá? Koeʻuhí he ko hono kātakiʻi faitōnunga ʻa e ngaahi ʻahiʻahí ʻoku tokoniʻi ai kitautolu ke hoko ʻo “haohaoa, mo tuʻu kakato.” (Sem. 1:​2-4) ʻOku lava ʻe he kātakí ke ne tokoniʻi kitautolu ke fakatupulekina ha ngaahi ʻulungāanga mahuʻinga, hangē ko e anga-fakaʻatuʻí, kaungāongoʻí mo e faimēsí.—Loma 12:15.

⁴ ʻAhiʻahiʻi ʻa e Tuí: ʻI he taimi ʻoku tau kātakiʻi ai ha ngaahi ʻahiʻahi, ʻoku ʻahiʻahiʻi ai ʻetau tuí ʻa ē ʻoku mahuʻinga lahi ʻi he ʻafio mai ʻa e ʻOtuá. (1 Pita 1:​6, 7) ʻOku teuʻi ʻe he tui peheé kitautolu ke hanganaki tuʻumaʻu he lolotonga ha ngaahi ʻahiʻahi he kahaʻú. ʻIkai ngata aí, ʻe lava ai ke tau ʻiloʻi ʻa e hōifua ʻa e ʻOtuá, pea ʻoku fakaivimālohiʻi ai heni ʻetau ʻamanakí, ʻo ʻai ia ke moʻoni ange kiate kitautolu.—Loma 5:​3-5.

⁵ Ko e pale tefito ʻo e kātakí ʻoku fakamatalaʻi ia ʻi he Semisi 1:​12, ʻa ia ʻoku pehē: “Monuʻiaā ka ko e tangata ʻoku ne kataki ha ʻahiʻahi: he ʻo ka ʻosi hono sivi, te ne maʻu ai ʻa e kalauni ʻo e moʻui.” Ko ia ai, ʻofa ke tau hanganaki tuʻumaʻu ʻi heʻetau līʻoa kia Sihová, ʻo falala pau te ne fakapaleʻi lahi ʻa “kinautolu ʻoku ʻofa kiate ia.”

Konga 2​—Fai ʻa e Ngaahi Ako Tohi Tapu Fakalakalaká

Teuteu ke Fai ʻa e Akó

¹ Ko e faiako ola lelei ʻi ha ako Tohi Tapu ʻoku lahi ange ʻa e meʻa ʻoku kau ki aí ʻi he lāulea pē ki he fakamatalá pea sio ki he ngaahi konga Tohi Tapu ʻoku lave ki aí. ʻOku fiemaʻu ke tau ʻoatu ʻa e fakamatalá ʻi ha founga ʻe ueʻi ai ʻa e loto ʻo e tokotaha akó. ʻOku fiemaʻu heni ʻa e teuteu fakaʻāuliliki fakataha mo e fakakaukau atu ki he tokotaha akó.—Pal. 15:28.

² Founga ke Teuteu Aí: Kamata ʻaki ʻa e lotu kia Sihova fekauʻaki mo e tokotahá mo ʻene ngaahi fiemaʻú. Kole kia Sihova ki ha tokoni ke aʻu ai ki he loto ʻo e tokotaha akó. (Kol. 1:​9, 10) Ke mahinoʻi lelei ʻa e kaveingá, vaheʻi ha kiʻi taimi ke fakakaukau ai ki he ʻuluʻi-kaveinga ʻo e vahé pe lēsoní, ko e ngaahi kaveinga tokoní pea mo ha faʻahinga tokoni pē ki he mamatá. ʻEke hifo kiate koe, ‘Ko e hā ʻa e taumuʻa tefito ʻo e fakamatalá?’ ʻE tokoni ʻeni kiate koe ke tokangataha ai ki he ngaahi poini tefitó ʻi hoʻo fai ʻa e akó.

³ Vakaiʻi fakalelei ʻa e fakamatalá mei he palakalafi ki he palakalafi. ʻAi ke ʻiloʻi ʻa e ngaahi tali ki he ngaahi fehuʻi kuo pulusí, ʻo fakaʻilongaʻi pē ʻa e ngaahi foʻi lea mo e kupuʻi lea tefitó. ʻAnalaiso ʻa e anga ʻo e kaunga ʻo e ngaahi konga Tohi Tapu ʻoku lave ki aí ki he poini tefito ʻo e palakalafí, pea fili pe ko e ngaahi konga fē ʻe lau he lolotonga ʻa e akó. Te ke ʻilo nai ai ʻoku ʻaonga ke hiki ha ngaahi nouti nounou ʻi he tafaʻaki ʻo e tohí. ʻOku totonu ke mahinoʻi lelei ʻe he tokotaha akó ko e meʻa ʻokú ne akó ʻoku mei he Folofola ʻa e ʻOtuá.—1 Tes. 2:13.

⁴ Feʻunuʻaki ʻa e Lēsoní ke Feʻungamālie: Hokó, fakakaukau ki he lēsoní ke feʻungamālie mo e ngaahi fiemaʻu ʻa e tokotaha ako ko iá. Feinga ke toka fakakaukauʻi ʻa ʻene ngaahi fehuʻí pea mo e ngaahi poini ʻe faingataʻa nai ke ne mahinoʻi pe talí. ʻEke hifo kiate koe: ‘Ko e hā ʻoku fiemaʻu ke ne mahinoʻi pe ngāue ki aí koeʻuhí ka ne fai ha fakalakalaka fakalaumālié? ʻE lava fēfē ke u aʻu ki hono lotó?’ Feʻunuʻaki leva hoʻo faiakó ke fakatatau ki ai. ʻI he taimi ʻe niʻihi, te ke sio nai ai ki ha fiemaʻu ke teuteu ha fakatātā, ko ha fakamatala, pe ko ha holongā fehuʻi ke tokoniʻi ʻa e tokotaha akó ke ne maʻu ʻa e ʻuhinga ʻo ha poini pe konga Tohi Tapu pau. (Nehe. 8:8) Kae fakaʻehiʻehi mei hano tānaki atu ha fakamatala ʻoku ʻikai ke fuʻu tokoni ia ke māʻalaʻala ai ʻa e kaveingá. Ko ha fakamanatu nounou ʻi he ngataʻanga ʻo e akó ʻe tokoni kiate ia ke ne manatuʻi ʻa e ngaahi poini tefitó.

⁵ Ko ha fiefia ē ʻoku tau maʻú ʻi he taimi ʻoku fakatupu mai ai ʻe he faʻahinga foʻoú ha ngaahi fua māʻoniʻoni ke fakahīkihikiʻi ai ʻa Sihova! (Fili. 1:11) Ke tokoniʻi kinautolu ke aʻusia ʻa e taumuʻa ko iá, teuteu lelei ʻi he taimi taki taha ʻokú ke fai ai ha ako Tohi Tapu.