Ko ha Moʻua ʻOku Tau Moʻuaʻaki ki he Niʻihi Kehé

¹ Naʻe ongoʻi ʻe he ʻapositolo ko Paulá ha fatongia ke malanga ki he kakaí. Naʻá ne ʻiloʻi kuo ʻai ʻe Sihova ke malava ʻa e kakai kotoa pē ʻo maʻu moʻui fakafou ʻi he taʻataʻa mahuʻinga ʻo Hono ʻAló. (1 Tim. 2:​3-6) Ko ia ai, naʻe pehē ʻe Paula: “Ko e tangata moʻua au ki he Kalisi mo e Papeliane fakatouʻosi, ki he ʻatamai mo e taʻe ʻatamai.” Naʻá ne ngāue vēkeveke mo taʻeongosia ke totongi hono moʻuá ki hono kaungā faʻahinga ʻo e tangatá ʻaki hono vahevahe atu ʻa e ongoongo leleí kia kinautolu.—Loma 1:​14, 15.

² ʻI he hangē ko Paulá, ko e kau Kalisitiane ʻo e ʻaho ní ʻoku nau feinga ke vahevahe atu ʻa e ongoongo leleí ki honau ngaahi kaungāʻapí ʻi he faingamālie kotoa pē. Fakataha mo e “mamahi lahi” ʻoku tuʻunuku vave maí, ko ʻetau fekumi ki he faʻahinga loto-totonú ʻoku fakavavevave. ʻOfa ke ueʻi kitautolu ʻe he ʻofa moʻoni ki he kakaí ke tau tōtōivi ʻi he ngāue fakahaofi-moʻui ko ení.—Mt. 24:21; Isi. 33:8.

³ Totongi Hotau Moʻuá: Ko e founga tefito ke tau aʻu ai ki he kakaí ko e malanga fale ki he falé. ʻI he ngaahi feituʻu ʻa ia ʻoku tokolahi ai ʻa e ʻikai ʻi ʻapí, ko hono tauhi ha ngaahi lēkooti tonú mo toe foki ʻi he ngaahi taimi kehekehé te ne ʻai ai kitautolu ke tau malava ʻo fetuʻutaki ki he kakai tokolahi ange. (1 Kol. 10:33) ʻE lava ke tau toe aʻu ki he faʻahinga tāutahá ʻaki ʻetau faifakamoʻoni ʻi he feituʻu fakapisinisí, ʻi he ngaahi halá, ʻi he ngaahi paʻaké, ʻi he ngaahi tauʻanga meʻalelé pea fakafou ʻi he telefoní. ʻE lava ke tau ʻeke hifo kia kitautolu, ‘ʻOku ou fai ʻeku lelei tahá ke fakahoko ai ʻa e ngaahi founga kotoa ʻo e malangá koeʻuhi ke vahevahe atu ai ʻa e pōpoaki ʻo e moʻuí?’—Mt. 10:11.

⁴ Naʻe ongoʻi ʻe ha tāimuʻa ʻe taha ha fatongia vēkeveke ke aʻu ai ki he kakai kotoa ʻi hono feituʻú. ʻI ha fale ʻe taha, naʻe mapuni maʻu pē ai ʻa e puipuí pea naʻe ʻikai faifai ange kuo ʻi ai ha taha ʻi ʻapi. Kae kehe, ʻi he ʻaho ʻe taha ʻi he taimi naʻe ʻikai ke ʻi he ngāue fakafaifekaú ai ʻa e tāimuʻá, naʻá ne fakatokangaʻi ai ha kā ʻi muʻa ʻi he ʻapi ko eni ʻoku ʻikai ke ne maʻu ai ʻi he taimi kotoa pē ha tahá. ʻI he ʻikai te ne fiemaʻu ke mole ʻa e faingamālié, naʻá ne fakatatangi ʻa e fafangú. Naʻe tali ia ʻe ha tangata, pea ko e ʻuluaki fetalanoaʻakí naʻe taki atu ia ki ha ngaahi toe ʻaʻahi lahi ʻa e tuofefine ko ení mo hono husepānití. Naʻe faai atu pē ʻo tali ʻe he tangatá ha ako Tohi Tapu, pea ʻokú ne hoko he taimí ni ko ha tokoua ʻosi papitaiso. ʻOkú ne houngaʻia ʻi he ongoʻi ʻe he tuofefine ko ení naʻá ne moʻuaʻaki ʻa e fatongia ke malanga ki he niʻihi kehé.

⁵ ʻI he vave ʻaupito ke ʻosi ʻa e taimí, ko e taimi eni ke totongi ai hotau moʻuá ki hotau kaungā faʻahinga ʻo e tangatá ʻaki ʻetau feinga mālohi longomoʻui ke kau ʻi he ngāue fakamalangá.—2 Kol. 6:​1, 2.

Konga 1​1—Fai ʻa e Ngaahi Ako Tohi Tapu Fakalakalaká

Tokoniʻi ʻa e Kau Akó ke Fai ha Ngaahi Toe ʻAʻahi

¹ ʻI he taimi ʻoku kamata ai ha tokotaha ako Tohi Tapu ke kau ki he ngāue fakamalangá, te ne fetaulaki ai mo e kakai ʻoku nau fakahaaʻi ʻa e mahuʻingaʻia ʻi he ongoongo leleí. ʻE lava fēfē ke tau tokoniʻi ʻa e tokotaha malanga foʻoú ke ne fai ha ngaahi toe ʻaʻahi ola lelei pea ke fakatupulekina ʻa e mahuʻingaʻia ʻokú ne maʻú?

² Ko e teuteu ki ha toe ʻaʻahí ʻoku kamata ia ʻi he fuofua ʻaʻahí. Fakalototoʻaʻi ʻa e tokotaha akó ke ne maʻu ʻa e mahuʻingaʻia moʻoni ʻi he faʻahinga ko ia ʻokú ne malanga ki aí. (Fili. 2:4) Akoʻi fakalakalaka ia ke ne fakaafeʻi ʻa e kakai ʻi he ngaahi ʻapí ke nau fakahaaʻi ʻenau fakakaukaú, ke fanongo ki heʻenau ngaahi fakamatalá pea ke fakatokangaʻi ʻa e ngaahi meʻa ʻokú ne fakahohaʻasi kinautolú. ʻI he taimi ʻoku fakahaaʻi ai ʻe ha taha ʻa e mahuʻingaʻiá, ʻai ʻa e tokotaha malangá ke ne hikiʻi hifo ʻa e fakamatala kaungatonu fekauʻaki mo e ʻaʻahí. Ngāueʻaki ʻa e fakamatala ko iá ke tokoniʻiʻaki ia ke ne fokotuʻutuʻu ha ngaahi fetalanoaʻaki lahi ange.

³ Ko e Teuteu ke Toe Fokí: Fakamanatu ʻa e fuofua ʻaʻahí, pea fakahaaʻi ki he tokotaha akó ʻa e founga ke fili ai ha tafaʻaki ʻo e pōpoaki ʻo e Puleʻangá ʻa ia ʻe fakamānako ki he tokotaha-ʻapí. (1 Kol. 9:​19-23) Teuteu fakataha ha tuʻuaki nounou ʻa ia ʻoku fakahaaʻi ai ha konga tohi Fakatohitapu ʻe taha fakataha mo ha palakalafi ʻi ha tohi ako. Tānaki atu ki ai, teuteu ha fehuʻi ʻa ia ʻe lava ke langaʻi hake ʻi he fakaʻosinga ʻo e fetalanoaʻakí ke fokotuʻu ai ha makatuʻunga ki he toe ʻaʻahi hokó. Fakahaaʻi ki he tokotaha malanga foʻoú ʻa e founga ke fakatupulekina ai ʻa e ʻilo ʻa e tokotahá ki he Folofola ʻa e ʻOtuá ʻi he ʻaʻahi hokohoko taki taha.

⁴ ʻOku toe tokoni foki ke akoʻi ki he tokotaha akó ha talateu faingofua. Hili ʻa e fakafeʻiloaki ki he tokotaha-ʻapí, te ne leaʻaki nai: “Naʻá ku fiefia ʻi heʻeta fetalanoaʻaki ki muʻá, pea kuó u toe foki mai ke vahevahe atu ha fakamatala Fakatohitapu lahi ange ʻi he [lave ki he kaveingá].” ʻE toe fiemaʻu nai ke ke fakahaaʻi ki he tokotaha malanga foʻoú ʻa e founga ke taliʻaki kapau ʻe fakaava ʻe ha tokotaha kehe ʻa e matapaá.

⁵ Toe Foki Tōtōivi: Fakalototoʻaʻi ʻa e tokotaha akó ke ne fokotuʻu ha faʻifaʻitakiʻanga lelei ʻi he toe foki vave ki he faʻahinga kotoa ʻoku nau fakahaaʻi ha mahuʻingaʻiá. Ko hono maʻu ha kakai ʻi ʻapí ʻe fiemaʻu nai ki ai ʻa e kīvoi ʻi he toe fokí. Akoʻi ki he tokotaha akó ʻa e founga ke fai ai ha ngaahi fokotuʻutuʻu ke toe ʻaʻahí, pea tokoniʻi ia ke ne mahinoʻi ʻa e fiemaʻu ke fai ha toe fokí ʻo hangē ko ia kuó ne palōmesí. (Mt. 5:37) Akoʻi ʻa e tokotaha malanga foʻoú ke anga-ʻofa, fakaʻatuʻi mo anga-fakaʻapaʻapa ʻi heʻene fekumi ki he faʻahinga hangē ha sipí pea ke fakatupulekina ʻenau mahuʻingaʻiá.—Tai. 3:2.