Malangaʻi ʻo e Puleʻangá​—Ko ha Monū Maʻongoʻonga

¹ ʻI he ʻaho ki he ʻaho, ʻoku maʻu ʻaonga ai ʻa e laui piliona ʻo e kau nofo ʻi he foʻi māmaní mei he ngaahi tokonaki nima-homo ʻa Sihova maʻá e moʻuí. (Mt. 5:​45) Kae kehe, ʻoku tokosiʻi ʻaupito ʻa e faʻahinga ʻoku nau maʻu ʻa e monū laulōtaha ko ia ʻo hono fakahāhā ʻa e houngaʻia ki honau Tokotaha-Fakatupú ʻaki hono malangaʻi ʻa e ongoongo lelei ʻo e Puleʻanga ʻo e ʻOtuá. (Mt. 24:14) ʻOku lahi fēfē ʻa hoʻo fakamahuʻingaʻi ʻa e monū maʻongoʻonga ko ʻení?

² Ko e malangaʻi ʻo e Puleʻangá ʻokú ne fakalāngilangiʻi ʻa e ʻOtuá mo ʻomai ai ʻa e ʻamanaki pea mo e nonga ki he kakai ʻa ia ʻoku nau loto-mamahi ʻi he taimi taʻemanonga ʻo e ʻaho ní. (Hep. 13:15) Ki he faʻahinga ko ia ʻoku nau tali ki he pōpoakí, ʻokú ne ʻomi ai ʻa e ʻamanaki ʻo e moʻui taʻengatá. (Sione 17:3) Ko e hā ha ngāue fakamāmani pe ha taukei ngāue ʻokú ne ʻomi ha ngaahi ʻaonga pehē? Ko e ʻapositolo ko Paulá naʻá ne fakahāhā ʻa ʻene houngaʻia ʻi he ngāue fakafaifekaú ʻi he founga ko ia naʻá ne fakahoko ai iá. Naʻá ne vakai ki ai ko ha koloa ia.​—Ng. 20:​20, 21, 24; 2 Kol. 4:​1, 7.

³ Koloaʻaki Hotau Monū Maʻongoʻongá: Ko e founga ʻe taha ʻoku tau fakahāhā ai ʻa e houngaʻia ʻi he monū ke malangá ko hono fai ha tokanga ki he anga ʻo ʻetau ngāué. ʻOku tau fakamoleki ha taimi ke teuteuʻi ai ha tuʻuaki ʻa ia ʻe aʻu ki he loto ʻo ʻetau kau fanongó? ʻE lava nai ke tau fakaleleiʻi ʻa ʻetau pōtoʻí ʻi hono ngāueʻaki ʻa e Tohi Tapú pea ʻi he fakaʻuhinga mo e kakaí? ʻOku tau ngāueʻi fakaʻāuliliki ʻa hotau feituʻu ngāue kuo vaheʻi maí? ʻE lava ke tau kamataʻi pea fakahoko ha ako Tohi Tapu? Hangē pē ko e kau Kalisitiane faitōnunga fakatouʻosi ʻi he kuohilí pea mo e lolotongá ni, ʻoku ueʻi kitautolu ʻe ha vakai totonu ki he ngāue ko ʻení, pea ʻoku tau lotoʻaki ʻa hotau monuú.​—Mt. 25:​14-​23.

⁴ ʻI he taimi ʻoku tau fekuki ai mo e ngaahi nunuʻa ʻo e hoholo ke motuʻá, mahamahakí, pe ko ha ngaahi tuʻunga faingataʻa kehe, ʻoku fakafiemālie ke ʻiloʻi ko ʻetau ngaahi feinga faivelenga ke kau ʻi he ngāue fakafaifekaú ko e moʻoni ʻoku fakamahuʻingaʻi lahi ia. ʻOku fakapapauʻi mai ʻe he Folofola ʻa e ʻOtuá kiate kitautolu ʻoku hanga ʻe Sihova ʻo fakamahuʻingaʻi ʻa e ngaahi feinga pehē ʻi he tauhi kiate iá, pehē foki ki he ngaahi feinga ʻa ia ʻe ʻikai hā ngali fakaueʻiloto nai ʻi he vakai ʻa e niʻihi kehé.​—Luke 21:​1-4.

⁵ Ko e malangaʻi ʻo e Puleʻangá ko ha matavai ia ʻo e fiemālie lahi. Naʻe pehē ʻe ha tuofefine taʻu 92: “He monū moʻoni ē ke sio ai ki he ngāue fakatapui laka hake he taʻu ʻe 80 ki he ʻOtuá​—pea mo e ʻikai ha ngaahi fakaʻiseʻisa! Kapau naʻá ku lava ke toe moʻui ʻi heʻeku moʻui ki muʻá, ko e moʻoni, ne u mei moʻui ai pē ʻi he ʻalunga tatau, koeʻuhí ʻoku ‘lelei lahi hake ʻa e ʻaloʻofa ʻa e ʻOtuá ʻi he moʻuí.’” (Sāme 63:3) ʻOfa ke tau koloaʻaki mo kitautolu foki ʻa e monū maʻongoʻonga ko ʻeni mei he ʻOtuá​—ʻa e ngāue malangaʻi ʻo e Puleʻangá.

Konga 12​—Fai ʻa e Ngaahi Ako Tohi Tapu Fakalakalaká

Tokoniʻi ʻa e Kau Akó ke Kamata mo Fakahoko ha Ako Tohi Tapu

¹ ʻI he taimi ʻoku kamata kau ai ʻetau kau ako Tohi Tapú ʻi he malaʻe fakafaifekaú, te nau hoko nai ʻo ilifia ʻi he fakakaukau ko ia ki hono kamataʻi mo hono fakahoko haʻanau ngaahi ako Tohi Tapu pē ʻa kinautolú. ʻE lava fēfē ke tau tokoniʻi kinautolu ke fakatupulekina ha fakakaukau pau ki he konga tefito ko ʻeni ʻo ʻetau ngāue fakafaifekaú?​—Mt. 24:14; 28:​19, 20.

² ʻI he taimi ko ia ʻoku taau ai ha ako Tohi Tapu ke hoko ko ha tokotaha malanga teʻeki papitaisó, ʻoku hā ngali kuó ne ʻosi maʻu ʻa e ʻaonga kakato ʻi he Ako Fakafaifekau Fakateokalatí. Ko e akonekina naʻá ne maʻu ʻi he teuteu mo hono fakahoko ʻa e ngaahi ngāue kuo vaheʻi ki he tokotaha akó te ne tokoniʻi ai ia ke fakatupulekina ʻa e ngaahi pōtoʻi fakafaiako ʻa ia ʻoku fiemaʻu ʻe ha “tangata ngaue ʻoku ʻikai mā, ko hoʻo tofa totonu ʻa e folofola ʻo e moʻoni.”​—2 Tim. 2:​15.

³ Faiakoʻaki Hoʻo Faʻifaʻitakiʻangá: Naʻe akoʻi ʻe Sīsū ʻa ʻene kau ākongá ʻaki hono ʻoange ha fakahinohino mahino pea mo hono fokotuʻu ha faʻifaʻitakiʻanga lelei. Naʻá ne pehē: “Ka ka ʻilonga ha taha kuo haohaoa ʻene ako te ne hangē ko ʻene faiako.” (Luke 6:​40) Ko hoʻo faʻifaʻitaki kia Sīsū ʻaki ʻa hono fokotuʻu ha faʻifaʻitakiʻanga totonu ʻi hoʻo ngāue fakafaifekaú tonu ʻoku mātuʻaki mahuʻinga ia. ʻI he siofi ko ia ʻe hoʻo tokotaha akó ʻa hoʻo takimuʻa ʻi he ngāue fakafaifekaú, te ne mahinoʻi ai ko e taumuʻa ʻo hono fai ʻo e ngaahi toe ʻaʻahí ke kamata ha ngaahi ako Tohi Tapu.

⁴ Fakamatalaʻi ki he tokotaha akó ko e taimi ʻoku tau tuʻuaki ai ha akó, ʻoku ʻikai ke fuʻu fiemaʻu pau ia ke fakamatalaʻi ʻa e fokotuʻutuʻu akó ʻo fakaikiiki. ʻOku faʻa lelei taha pē ke fakahāhā ʻa e akó ʻaki hono ngāueʻaki ʻa e palakalafi ʻe taha pe ua nai mei ha tohi ako. Ko e ngaahi fokotuʻu ʻaonga ki hono ngāueʻaki ení ʻe lava ʻo maʻu ia ʻi he peesi 8 ʻo e ʻīsiu ko ʻení mo e peesi 6 ʻo ʻEtau Ngāue Fakafaifekau ʻo Sanuali 2002.

⁵ ʻI he taimi feʻungamālié, fakaafeʻi ʻa e tokotaha akó ke ō fakataha mo koe pe ko ha tokotaha malanga taukei kehe ki he ngaahi ako Tohi Tapu kehé. Te ne kau nai ʻi hono fakamatalaʻi ha palakalafi pe ha konga Tohi Tapu tefito. Ko ia ai, ʻi he sió, ʻe ako ai ʻe he tokotaha akó ʻa e meʻa lahi ʻo fekauʻaki mo hono fai ʻa e ngaahi ako Tohi Tapu fakalakalaká. (Pal. 27:17; 2 Tim. 2:2) ʻOange kiate ia ha fakaongoongolelei, pea lāulea ki he founga te ne lava ʻo fakalakalaka aí.

⁶ Ko hono akoʻi ʻa e kau malanga foʻoú ke hoko ko e kau faiako ʻo e Folofola ʻa e ʻOtuá ʻe teuʻi ai kinautolu ki he “ngāue lelei” ʻo hono kamataʻi mo hono fai ʻa e ngaahi ako Tohi Tapu pē ʻa kinautolú. (2 Tim. 3:​17) He fakafiemālie lahi ē ke ngāue uma ki he uma fakataha mo kinautolu ʻi hono fakaaʻu atu ʻa e fakaafe anga-ʻofa: “Pea ko ia ʻoku ne loto ki ai, ke ne toʻo taʻetotongi ʻa e Vaiola”!​—Fkh. 22:17.