Ko Hono Kamata ha Ngaahi Ako Tohi Tapu ʻi he Matapaá mo e Fakafou he Telefoní

1, 2. ʻE lava fēfē ke tau feʻunuʻaki ʻetau polokalama ako Tohi Tapú ke tokoni ki he kakai femoʻuekiná?

¹ Ko e kakaí ʻi he ʻahó ni ʻoku nau femoʻuekina. Neongo ia, ko e tokolahi ʻoku nau mahuʻingaʻia ʻi he ngaahi meʻa fakalaumālié. ʻE lava fēfē ke tau tokoniʻi kinautolu ke fakalato ʻenau fiemaʻu fakalaumālié? (Mt. 5:3) ʻOku malava ʻa e kau malanga tokolahi ke ako ʻa e Tohi Tapú mo e kakaí ʻi honau matapaá pe fakafou he telefoní. ʻE lava ke ke fakalahi ʻa hoʻo ngāue fakafaifekaú ʻi he foungá ni?

² Ke kamata ha ngaahi ako Tohi Tapu, ʻoku fiemaʻu ke tau mateuteu ke fakahāhā ha ako Tohi Tapu ʻi ha faʻahinga taimi pē ʻoku ʻi ai ai ha faingamālié. ʻO anga-fēfē pea ʻi he feituʻu fē ʻe lava ke fai ai ení?

3. Ko e hā hono ʻuhinga ke fakahāhā ai ha ako Tohi Tapu ʻi he muʻaki ʻaʻahí, pea ʻe lava fēfē ke fai ení?

³ ʻI he Matapaá: ʻI he taimi ʻokú ke fetaulaki ai mo ha tokotaha ʻoku loto-lelei ke fetalanoaʻaki fekauʻaki mo e Tohi Tapú, fakaava hake ai pē ki ha palakalafi kuó ke ʻosi teuteu tokamuʻa, ʻo hangē ko ia ko e ʻuluaki palakalafi ʻo e lēsoni 1 ʻi he polosiua Fiemaʻu pea kamata. Lau ʻa e palakalafí, lāulea ki he fehuʻí, pea fetalanoaʻaki ki ha konga Tohi Tapu ʻe taha pe ua ʻa ia ʻoku hā aí. ʻI he taimi ki he taimi, ʻe lava ke fai fakahangatonu eni ʻi he matapaá ʻi he miniti ʻe nima ki he hongofulu. Kapau ʻoku fiefia ʻa e tokotahá ʻi he fetalanoaʻakí, fai ha fokotuʻutuʻu ke lāulea ki he palakalafi hokó pe palakalafi ʻe ua ʻi ha toe taimi kehe.​—Ki ha toe ngaahi fokotuʻu lahi ange ki hono ngāueʻaki ʻa e fakaofiofi fakahangatonu ke kamata ha ngaahi akó ʻe lava ʻo maʻu ia ʻi he ʻEtau Ngāue Fakafaifekau ʻo e Puleʻanga ʻo Sanuali 2002, p. 6.

4. ʻE lava fēfē nai ke tau kamata ha ako Tohi Tapu ʻi he matapaá ʻi hono fai ha ngaahi toe ʻaʻahí?

⁴ Ko ha fakaofiofi meimei tatau ʻe lava ʻo ngāueʻaki ia ke kamata ha ngaahi ako Tohi Tapu ʻi hono fai ha ngaahi toe ʻaʻahí. Ko e fakatātaá, te ke fakaʻaliʻali nai ʻa e polosiua Fiemaʻu pea fakaeʻa ʻa e huafa ʻo e ʻOtuá, ʻo ngāueʻaki ʻa e lēsoni 2, palakalafi 1-2. ʻI he ʻaʻahi hono hokó, ʻe lava ke ke lāulea ki he meʻa ʻoku fakaeʻa ʻe he Tohi Tapú ʻo fekauʻaki mo e ngaahi ʻulungāanga ʻo Sihová, ʻo ngāueʻaki ʻa e palakalafi 3-4. Ki he fetalanoaʻaki hono hokó, ʻe lava ke ke lāulea ki he palakalafi 5-6 pea mo e fakatātā ʻi he peesi 5 ke fakamamafaʻi ʻa e anga hono tokoniʻi kitautolu ʻe hano ako ʻo e Tohi Tapú ke tau ʻiloʻi ai ʻa Sihová. Ko e kotoa ʻo e ʻū meʻa ko ʻení ʻe lava ʻo hoko ia lolotonga ʻa e tuʻu ʻi he matapaá.

5, 6. (a) Ko e hā ʻe saiʻia ange nai ai ʻa e kakai ʻe niʻihi ke ako ʻa e Tohi Tapú fakafou he telefoní? (e) Ko e hā ʻa e fakaofiofi ʻe lava ke tau ngāueʻaki ʻi heʻetau tuʻuaki atu ke ako fakafou he telefoní?

⁵ Fakafou he Telefoní: Ko e kakai ʻe niʻihi te nau loto-lelei ange nai ke kamata ha ako Tohi Tapu fakafou he telefoní ʻi hono fai ia ʻi he mata ki he matá. Fakakaukau angé ki he hokosia ko ʻení: Lolotonga ʻa e malanga fale ki he falé, naʻe fetaulaki ai ha tuofefine mo ha finemui ʻa ia ko ha faʻē pea ko ha fefine ngāue moʻumoʻua ia. ʻI he taimi naʻe ʻikai malava ai ʻa e tuofefiné ke toe fetuʻutaki mo ia ʻi hono ʻapí, naʻá ne fili ke telefoni ki ai. Naʻe fakamatalaʻi ange ʻe he finemuí ʻoku ʻikai moʻoni ke ne maʻu ha taimi ke lāulea ai ki he Tohi Tapú. Naʻe tala ange ʻe he tuofefiné: “ʻI he miniti ʻe 10 pe 15, te ke lava ʻo ako ai ha meʻa foʻou, naʻa mo e fakafou he telefoní.” “Lelei, kapau leva ʻe fai fakafou he telefoní, ta ʻoku sai ia!” ko e tali ia ʻa e finemuí. Naʻe vave ai ʻa hono fakahoko ʻo ha ako tuʻumaʻu ʻi he telefoní.

⁶ ʻE loto-lelei nai ha niʻihi ʻo kinautolu kuó ke ʻaʻahi ki aí ke ako fakafou he telefoní? ʻE lava ke ke ʻahiʻahi fakahoko ʻa e fakaofiofi tofu pē ko ia naʻe toki fakamatalaʻí, pe te ke pehē pē nai ʻe koe: “Kapau ʻokú ke saiʻia ai, ʻe lava ke ta lāulea ki he Tohi Tapú fakafou he telefoní. ʻE lelei nai ange ia kiate koe?” ʻI hono feʻunuʻaki ʻetau polokalama ako Tohi Tapú ki he ngaahi tuʻunga ʻo e niʻihi kehé, te tau tokoniʻi nai ai kinautolu ke nau “maʻu ʻa e ʻiloʻi ʻo e ʻOtua.”​—Pal. 2:5; 1 Kol. 9:​23.

Meʻa ke Leaʻaki Fekauʻaki mo e Ngaahi Makasiní

Ko e Taua Leʻo ʻAo. 15

“ʻI he hili ha mole fakamamahi, ʻoku fifili ai ʻa e tokolahi ki he meʻa ʻoku hoko ʻi he maté. ʻOkú ke fakakaukau ʻoku malava ke mahinoʻi ʻa e maté? [Tuku ke ne tali.] Ko e makasini ko ʻení ʻoku fakamatala ai ki he meʻa ʻoku leaʻaki ʻe he Tohi Tapú ʻo fekauʻaki mo e tuʻunga ʻo e kau maté. ʻOku toe lāulea ai ki he talaʻofa ʻa e ʻOtuá ke fokotuʻu hake ʻa e faʻahinga naʻa tau ʻofa ai kuo maté.” Lau ʻa e Sione 5:​28, 29.

Awake! ʻAo. 22

“Naʻá ke ʻiloʻi ko e folau ʻeveʻevá kuo ui ia ko e maʻuʻanga ngāue fika ʻuluaki ia ʻi he māmaní? [Tuku ke ne tali.] Ko e tupulaki ʻo e folau ʻeveʻevá kuó ne ʻomi fakatouʻosi ʻa e ngaahi ʻaonga mo e ʻū palopalema. ʻOku sivisiviʻi ʻe he makasini ko ʻení ʻa e ngaahi meʻa ʻoku ʻaonga mo taʻeʻaonga ʻi he pisinisi folau ʻeveʻevá ʻi onopooni. ʻOku toe ʻomai foki ai ʻa e ngaahi tokoni ʻaonga ki he kau folau ki tuʻapuleʻangá.”

Ko e Taua Leʻo Sep. 1

“ʻI he māmani ʻo e ʻaho ní, ko e mateakí ko ha ʻulungāanga lelei ia ʻoku faʻa lahi ange ʻa hono vikiʻí ʻi hono fakahokó. ʻIkai ʻe fakaofo ia kapau ko e tokolahi ange ʻo e kakaí naʻa nau tatau mo e kaumeʻa ʻoku fakamatalaʻi hení? [Lau ʻa e Palovepi 17:17. Tuku leva ke ne tali.] Ko e makasini ko ʻení ʻoku lāulea ai ki he ngaahi ʻaonga ʻoku maʻu mei he hoko ʻo mateaki ki hotau fāmilí mo e ngaahi kaumeʻá.”

Awake! Sep. 8

“Mahalo kuó ke ofo ʻi he fāitaha ʻoku hoko ʻi natulá. [Lave ki he taha ʻo e ngaahi fakatātā ʻoku ʻasi ʻi he kupú.] ʻIkai ʻoku fakamamahi ʻa e ʻikai ke tau sio ki ha fāitaha lahi ange ʻi he vahaʻa ʻo e faʻahinga ʻo e tangatá? [Tuku ke ne tali.] Ko e makasini ko ʻení ʻoku fakamatala ai ki he founga ʻe vavé ni ai hono ʻomi ʻe he ʻOtuá ʻa e melino mo e fāʻūtaha ki hotau foʻi māmaní.” Lau ʻa e Aisea 11:9.