Konga 3​—Fai ʻa e Ngaahi Ako Tohi Tapu Fakalakalaká

Ngāueʻaki Ola Lelei ʻa e Tohi Tapú

1. Ko e hā ʻoku totonu ai ke tau fakamamafaʻi ʻa e Tohi Tapú ʻi hono fai ʻa e ngaahi ako Tohi Tapú?

¹ Ko ʻetau taumuʻa ʻi hono fai ʻa e ngaahi ako Tohi Tapú ke ‘ngaohi ākonga’ ʻaki hono tokoniʻi ʻa e kakaí ke nau mahinoʻi pea tali ʻa e ngaahi akonaki ʻa e Folofola ʻa e ʻOtuá pea ngāueʻaki ia ʻi heʻenau moʻuí. (Mt. 28:​19, 20; 1 Tes. 2:​13) Ko ia ai, ʻoku totonu ke fakatefito ʻa e akó ʻi he Tohi Tapú. ʻUluakí, ʻe ʻaonga nai ke fakahaaʻi ki he kau akó ʻa e founga ke maʻu ai ʻa e ngaahi konga tohi pau ʻi heʻenau tatau Tohi Tapú tonu. Ko ia, ʻe lava fēfē ke tau ngāueʻaki ʻa e Tohi Tapú ke tokoniʻi ʻa e faʻahinga peheé ke nau fakalakalaka fakalaumālie?

2. ʻOku fēfē ʻetau fili pe ko fē ʻa e ngaahi konga Tohi Tapu ke lau mo fetalanoaʻaki ki aí?

² Filifili ʻa e Ngaahi Konga Tohi ke Laú: ʻI hoʻo teuteú, kumi ʻa e anga ʻo e kaunga ʻa e konga Tohi Tapu taki taha ʻoku hā ʻi he lēsoní ki he poini ʻoku fai ki ai ʻa e lāuleá, pea fili pe ko fē ʻa e ngaahi konga tohi te ke sio mo lāulea ki ai lolotonga ʻa e akó. ʻI he tuʻunga fakalūkufuá, ʻoku lelei ke lau ʻa e ngaahi konga tohi ʻoku fakahaaʻi ai ʻa e makatuʻunga Fakatohitapu ki heʻetau tuí. Ko e ngaahi konga tohi ʻoku ʻomai ai ʻa e fakahinohino fakaepuipuituʻá ʻe ʻikai nai fiemaʻu ke lau ia. Fakakaukauʻi ʻa e ngaahi fiemaʻu mo e ngaahi tuʻunga ʻo e tokotaha ako taki taha.

3. Ko e hā ʻa e ʻaonga ʻo hono ngāueʻaki ʻa e ngaahi fehuʻí, pea ʻe lava fēfē ke tau fai ení?

³ Ngāueʻaki ʻa e Ngaahi Fehuʻi: ʻI he ʻikai ke fakamatalaʻi ʻa e ngaahi konga Tohi Tapú ki he tokotaha akó, ʻai ke ne fakamatalaʻi atu ia kia koe. ʻE lava ke fakaʻaiʻai ia ke ne fai eni ʻaki hono ngāueʻaki pōtoʻi ʻa e ngaahi fehuʻí. Kapau ʻoku hā mahino ʻa e kaunga ʻa ha konga Tohi Tapu, te ke ʻeke nai pe ʻoku anga-fēfē hono poupouʻi ʻe he konga tohí ʻa e meʻa ʻoku fakahaaʻi ʻi he palakalafí. ʻI he ngaahi tuʻunga kehé, ʻe fiemaʻu nai ha fehuʻi hangatonu ange pe ko ha ngaahi fehuʻi hokohoko ke tatakiʻaki ʻa e tokotaha akó ki he fakamulituku totonú. Kapau ʻoku fiemaʻu ha ngaahi fakamatala lahi ange, ʻe lava ke fai eni hili ʻa hono fai ʻe he tokotaha akó ʻa e talí.

4. Ko e hā e lahi ʻo e fakamatala ʻoku fiemaʻu ki he ngaahi konga Tohi Tapu ʻoku tau laú?

⁴ Tauhi Ia ke Faingofua: ʻOku faʻa fiemaʻu ʻe ha tokotaha fana ngahau pōtoʻi ʻa e foʻi ngahau pē ʻe taha ke aʻu ki ha tāketi. ʻI he founga meimei tatau, ʻoku ʻikai fiemaʻu ki ha faiako pōtoʻi ha ngaahi foʻi lea lahi ke fakamamafaʻi ʻaki ha foʻi poini. ʻE lava ke ne fakahaaʻi faingofua, maʻalaʻala mo tonu matematē ʻa e fakamatalá. ʻE fiemaʻu nai ʻi he taimi ʻe niʻihi ke ke fai ha fekumi ʻi he ʻū tohi faka-Kalisitiané ke mahinoʻi ha konga Tohi Tapu pea fakamatalaʻi totonu ia. (2 Tim. 2:​15) Kae fakaʻehiʻehi mei he feinga ke fakamatalaʻi ʻa e tafaʻaki kotoa ʻo ha konga Tohi Tapu ʻi he akó. Fakakau ki ai ʻa e meʻa pē ʻoku fiemaʻu ke maʻu ai ʻa e poini ʻoku fai ki ai ʻa e lāuleá.

5, 6. ʻE lava fēfē ke tau tokoniʻi ʻa e kau akó ke nau ngāueʻaki ʻa e Folofola ʻa e ʻOtuá ʻi heʻenau moʻuí, ka ko e hā ʻoku totonu ke tau fakaʻehiʻehi mei aí?

⁵ Ngāueʻaki ʻAonga: ʻI heʻene feʻungamālié, tokoniʻi ʻa e tokotaha akó ke ne sio ki he anga ʻo e kaunga fakafoʻituitui kiate ia ʻa e ngaahi konga Tohi Tapú. Ko e fakatātaá, ʻi he fetalanoaʻaki ki he Hepelu 10:​24, 25 mo ha tokotaha ako ʻoku teʻeki ai te ne maʻu ʻa e ngaahi fakataha faka-Kalisitiané, te ke lāulea nai ki ha taha ʻo e ngaahi fakatahá pea fakaafeʻi ia ke ne maʻu ia. Kae fakaʻehiʻehi mei hono tenge iá. Tuku ʻa e Folofola ʻa e ʻOtuá ke ne ueʻi ia ke fai ʻa e ngāue ʻoku fiemaʻu ke fakahōifuaʻi ai ʻa Sihová.​—Hep. 4:​12.

⁶ ʻI heʻetau fakahoko ʻetau ngāue ke ngaohi ākongá, te tau “pouaki ʻa e talangofuá ʻi he tui” fakafou ʻi heʻetau ngāueʻaki ola lelei ʻa e Tohi Tapú.​—Loma 16:​26, NW.

Meʻa ke Leaʻaki Fekauʻaki mo e Ngaahi Makasiní

Ko e Taua Leʻo Nōv. 15

“Ko e tokolahi taha ʻo e kakaí ʻoku nau holi ki ha moʻui lelei mo ha moʻui fuoloa. Ka ʻo kapau ʻe malava ia, te ke loto ke ke moʻui taʻengata? [Tuku ke ne tali. Pea lau ʻa e Sione 17:3.] ʻOku lāulea ʻa e makasini ko ení ki he talaʻofa ʻa e Tohi Tapú ko e moʻui taʻengatá. ʻOkú ne toe sivisiviʻi ʻa e tuʻunga ʻe ʻi ai ʻa e moʻuí ʻi he taimi ʻe hoko moʻoni ai ʻa e talaʻofa ko iá.”

Awake! Nōv. 22

“ʻI he taʻu ʻe 20 kuohilí, kuo fai ai ʻa e fakalakalaka lahi ʻi hono mahinoʻi mo hono faitoʻo ʻo e ʻeitisí. Neongo ia, ʻoku kei maʻuhala pē ʻa e kakai tokolahi. [Fakahaaʻi ʻa e puha “Ngaahi Talatupuʻa Fekauʻaki mo e ʻEitisí,” pea tuku ke ne fai ha fakamatala.] ʻOku lāulea ʻa e makasini ko ení ki he founga ʻe lava ke maluʻi ai ʻe he ngaahi mātuʻá ʻenau fānaú.” Lau ʻa e Teutalonome 6:​6, 7.

Ko e Taua Leʻo Tīs. 1

“Ko e anga ʻe taha ʻokú ne fakafaikehekeheʻi ʻa e tangatá mei he fanga manú ko e malava ko ia ke tala ʻa e tonú mei he halá. Ko e meʻa fakamamahí, ʻoku fai ʻe he kakai tokolahi ʻa e ngaahi meʻa kovi. ʻOkú ke fakakaukau ko e hā ʻoku pehē aí? [Tuku ke ne tali. Pea lau ʻa e Selemaia 17:9 pe ko e Fakahā 12:9.] ʻOku lāulea ʻa e makasini ko ení ki he meʻa ʻe lava ke ne tokoniʻi kitautolu ke ʻiloʻi pea ke fai ʻa e meʻa ʻoku totonú.”

Awake! Tīs. 8

“Ko e fakalakalaka ʻi he tekinolosiá kuo ʻikai te ne liliu ʻa e fiemaʻu tefito ʻa e tangatá ki ha kaumeʻá. Ka kuó ke fakatokangaʻi ʻoku lava ke ʻai ʻe he ngaahi liliu ʻi he sōsaietí ko ha pole ia he ngaahi ʻahó ni ke fakatupu ha ngaahi kaumeʻa ofi? [Tuku ke ne tali. Pea lau ʻa e Palovepi 18:24.] ʻOku lāulea ʻa e makasini ko ení ki he founga ʻe lava ke tau fokotuʻu ai pea tauhi ha ngaahi kaumeʻa moʻoní.”