ʻOku Fiemaʻu Hoʻo Tokoní

¹ “ʻOku mau fakamālō atu ki he ngaahi meʻa kotoa kuo mou fai maʻamautolú. ʻOku hoko hoʻomou ngāué ʻo ʻaonga ʻaupito kia kimautolu.” Ko e fakamatala ko iá ʻoku fakahaaʻi lelei ai ʻa ʻetau ongoʻi houngaʻia ki he kau mātuʻá mo e kau sevāniti fakafaifekaú. ʻI he hokohoko atu ke tupulaki ʻa e kautaha ʻa e ʻOtuá, ʻoku ʻi ai maʻu pē ha fiemaʻu ki ha kau tangata matuʻotuʻa ke nau ngāue ʻi he meimei ngaahi fakatahaʻanga ʻe 100,000 takatakai ʻi he māmaní. Kapau ko ha tokoua ʻosi papitaiso koe, ʻoku fiemaʻu hoʻo tokoní.

² “Kakapa Atu”: ʻE lava fēfē ke ke kakapa atu ki ha toe fatongia fakalaumālie ʻe taha? (1 Tim. 3:​1, NW) Ko e meʻa tefitó pē, ko hoʻo fokotuʻu ha faʻifaʻitakiʻanga lelei ʻi he tafaʻaki kotoa ʻo hoʻo moʻuí. (1 Tim. 4:12; Tai. 2:​6-8; 1 Pita 5:3) Kau kakato ʻi he ngāue fakamalangá, pea tokoniʻi ʻa e niʻihi kehé ke nau toe fai pehē foki. (2 Tim. 4:5) ʻAi ke ke mahuʻingaʻia loto-moʻoni ʻi he lelei ʻa e kaungātuí. (Loma 12:13) Hoko ko ha tokotaha ako lelei ʻo e Folofola ʻa e ʻOtuá, pea fakatupulekina ʻa e “pōtoʻi ʻi he faiakó.” (Tai. 1:​9, NW; 1 Tim. 4:13) Tokanga fakamātoato ki he ngaahi ngāue kuo vaheʻi atu ʻe he kau mātuʻá. (1 Tim. 3:10) Kapau ko ha ʻuluʻi fāmili koe, ‘pule lelei ki ho fale ʻoʻoú.’—1 Tim. 3:​4, 5, 12.

³ Ke fakahoko ha ngafa pehē ʻoku kau ki ai ʻa e ngāue mālohi pea ʻoku fiemaʻu ha laumālie ʻo e feilaulauʻi-kita. (1 Tim. 5:17) Ko ia ai, ʻi he kakapa atú, tokanga taha ki he tauhi anga-fakatōkilalo ʻa e niʻihi kehé. (Mt. 20:​25-28; Sione 13:​3-5, 12-17) Fakalaulauloto ki he anga ʻo Tīmoté, pea feinga ke faʻifaʻitaki ki ai. (Fili. 2:​20-22) ʻI he hangē ko iá, ʻai hoʻo ʻulungāanga leleí ke ne fakaongoongoleleiʻi koe. (Ng. 16:​1, 2) ʻI hoʻo fakatupulekina ʻa e ngaahi ʻulungāanga fakalaumālie ʻoku fiemaʻu ke tokangaʻiʻaki ʻa e ngaahi fatongia ʻoku tānaki maí pea ngāueʻaki ha faleʻi pē ʻoku ʻomai ke tokoni ki hoʻo fakalakalaká, “[ʻe] ha ki he kakai kotoa hoʻo laka ki muʻa.”—1 Tim. 4:15.

⁴ Ngaahi Mātuʻa, Akoʻi ʻa e Fānaú ke Tokoni: ʻE lava ke kamata ako ʻa e fānaú ke tokoni mei heʻenau kei taʻu siʻí pē. Akoʻi kinautolu ke fanongo tokanga ʻi he ngaahi fakatahá, ke malanga, pea ke hoko ʻo alafaʻifaʻitakiʻanga honau ʻulungāangá ʻi he Fale Fakatahaʻangá pea ʻi he ʻapiakó. ʻAi ke nau kau he ngāue maʻá e niʻihi kehé, ʻo fai ʻa e ngaahi meʻa hangē ko e tokoni ki he fakamaʻa ʻo e Fale Fakatahaʻangá, tokoni ki he kakai matuʻotuʻá mo e hā fua. ʻAi ke nau hokosia ʻa e fiefia ʻoku maʻu mei he foakí. (Ng. 20:35) Ko e ngaahi akoʻi peheé ʻe lava ke tokoniʻi ai kinautolu ke nau hoko ko e kau tāimuʻa, ko e kau sevāniti fakafaifekau mo e kau mātuʻa ʻo e ʻapongipongí.

Konga 4​—Fai ʻa e Ngaahi Ako Tohi Tapu Fakalakalaká

Akoʻi ʻa e Kau Akó ke Teuteu

¹ Ko ha tokotaha ako ʻokú ne lau tokamuʻa ʻa e lēsoní, fakaʻilongaʻi ʻa e ngaahi talí, pea fakakaukau ki he founga ke fakamatalaʻi ai ia ʻi heʻene lea pē ʻaʻaná ʻoku totonu ke vave ʻene fakalakalaka fakalaumālié. Ko ia ai, ko e hili pē hano fokotuʻu ha ako Tohi Tapu tuʻumaʻu, ʻai ke mo teuteuʻi fakataha ha lēsoni ke fakahaaʻi ki he tokotaha akó ʻa e founga ke fai ai iá. Ki he kau ako tokolahi, ʻe tokoni lahi ke mo teuteu fakataha ha vahe pe lēsoni kakato.

² Fakaʻilongaʻí mo e Hiki Noutí: Fakamatalaʻi ʻa e founga ke kumi ai ʻa e ngaahi tali fakahangatonu ki he ʻū fehuʻi ʻoku pulusi atú. Fakahaaʻi ki he tokotaha akó ʻa hoʻo tatau ʻo e tohi ʻoku akó ʻa ia kuó ke ʻosi fakaʻilongaʻi ai ʻa e ngaahi lea pe ngaahi kupuʻi lea tefitó pē. ʻI hoʻomo lāulea ki he fakamatalá, te ne loto nai ke muimui ki hoʻo sīpingá, ʻo fakaʻilongaʻi ʻi heʻene tataú ʻa e meʻa pē ʻoku fiemaʻu ke tokoniʻiʻaki ia ke ne manatuʻi ʻa e talí. (Luke 6:40) Kole leva kiate ia ke ne fai ʻa e talí ʻi heʻene ngaahi lea pē ʻaʻaná. ʻE malava ai heni kia koe ke ke sio pe ʻoku lelei fēfē ʻene mahinoʻi ʻa e fakamatalá.

³ Ko hano sivisiviʻi lelei ʻo e ngaahi konga Tohi Tapu ʻoku ʻikai fakaleá ko ha konga mahuʻinga ia ʻo e teuteu ʻa e tokotaha akó ki he akó. (Ng. 17:11) Tokoniʻi ia ke ne mahinoʻi ko e konga Tohi Tapu kotoa pē ʻoku hā kae ʻikai fakaleá ʻokú ne poupouʻi ha foʻi poini ʻi he palakalafí. Fakahaaʻi kiate ia ʻa e founga ke hikiʻi ai ha ngaahi nouti nounou ʻi he tafaʻaki ʻatā ʻo ʻene tohi akó. Fakamamafaʻi kiate ia ʻa e foʻi moʻoni ko e Tohi Tapú ko e makatuʻunga ia ki he meʻa ʻokú ne akó. Fakalototoʻaʻi ia ke ne ngāueʻaki lahi ʻa e ngaahi konga Tohi Tapu ʻoku hā kae ʻikai fakaleá, ʻi heʻene ngaahi tali lolotonga ʻa e akó.

⁴ Sio Fakalūkufua mo e Fakamanatu: Ki muʻa ke kamata ʻe he tokotaha akó ʻa ʻene teuteu fakaikiiki ʻo e fakamatala ʻoku akó, ʻe tokoni lahi kiate ia ke ne fai ha sio fakalūkufua ki he kaveingá. Fakahaaʻi ange ʻe lava ke ne fai ha sio fakalūkufua ki he fakamatalá ʻaki hano sivisiviʻi nounou ʻa e kaveinga ʻo e vahé, ngaahi kaveinga tokoní mo e ngaahi fakatātaá. Fakamatalaʻi ko e ki muʻa ke fakaʻosi hono taimi teuteú, ʻe fakapotopoto kapau te ne fakamoleki ha kiʻi taimi ke fakamanatu ai ʻa e ngaahi poini tefito ʻoku ʻomai ʻi he lēsoní, mahalo ko hano ngāueʻaki ʻo e puha fakamanatú kapau ʻoku ʻi ai. Ko e toe fai peheé te ne tokoniʻi ia ke ne manatuʻi ʻa e fakamatalá.

⁵ Ko hono akoʻi ʻa e tokotaha akó ke teuteu lelei ki heʻene akó te ne tokoniʻi ia ke ne fai ha ngaahi tali mohu ʻuhinga ʻi he ngaahi fakataha ʻa e fakatahaʻangá. ʻE toe tokoniʻi ai ia ke ne fakatupulekina ha tōʻonga ako ʻe ʻaonga fuoloa kiate ia hili ʻa e kakato ʻa e ako Tohi Tapu mo iá.