Konga 6​—Fai ʻa e Ngaahi Ako Tohi Tapu Fakalakalaká

ʻI Hono ʻEke ʻe ha Tokotaha Ako ha Fehuʻi

¹ ʻI hono fokotuʻu lelei pē ha ako Tohi Tapú, ʻoku faʻa lelei ange ke lāulea ki ha ngaahi akonaki Fakatohitapu ʻi ha founga maau kae ʻikai ke hiki holo mei he kaveinga ki he kaveinga. ʻOku tokoniʻi ai heni ʻa e tokotaha akó ke ne langa ha makatuʻunga ʻo e ʻilo totonú pea ke fakalakalaka fakalaumālie. (Kol. 1:​9, 10) Neongo ia, ʻoku faʻa toutou ʻeke ʻe he kau akó ha ngaahi fehuʻi ʻi he ngaahi kaveinga kehekehe lolotonga ʻa e akó. ʻOku totonu ke ngāue fēfē ki he ngaahi fehuʻí ni?

² Hoko ʻo ʻIloʻilo: Ko e ngaahi fehuʻi ʻoku felāveʻi mo e fakamatala ʻi he tohi ako ʻoku lolotonga fai ai ʻa e lāuleá ʻoku faʻa lava ke tali ia ʻi he taimi pē ko iá. Kapau ʻoku ʻi ai ha foʻi fehuʻi ʻe toki lāulea ki ai ʻamui ange ʻi he tohi akó, ʻe feʻunga pē nai ke fakahaaʻi ange ʻa e moʻoniʻi meʻa ko iá. Ka neongo iá, kapau ʻoku ʻikai felāveʻi ha fehuʻi ia mo e fakamatala ʻi he tohi akó pe ʻe fiemaʻu ke fai ha fekumi ki ha tali totonu, ʻe lelei ange nai ke lāulea ki he meʻá hili ʻa e akó pe ko ha toe taimi kehe. ʻOku ʻiloʻi ʻe he niʻihi ko hono hikiʻi ko ia ʻo e fehuʻí ʻoku fakapapauʻi ai ki he tokotaha akó ko ʻene fehuʻí ʻoku fai e fakakaukau fakamātoato ki ai pea ʻoku tokoni ia ke taʻofi ʻa hono fakaleluʻi ʻo e akó.

³ ʻOku lahi ʻa e ngaahi akonaki Fakatohitapu ʻoku lāulea nounou pē ki ai ʻi heʻetau ngaahi tohi ako tefitó. Fēfē kapau ʻoku faingataʻa ki ha tokotaha ako ʻa hono tali ha akonaki pau pe ʻokú ne pīkitai ki ha tui hala? ʻE ʻaonga nai ke lāulea ki ha fakamatala lahi ange ʻa ia ʻoku fakamatalaʻi fakaʻāuliliki ai ʻa e ngaahi meʻa ʻoku leaʻaki ʻe he Tohi Tapú ʻi he kaveinga ko iá. Kapau ʻoku teʻeki ai pē ke tuipau ʻa e tokotaha akó, tuku ʻa e kaveingá ki ha toe taimi kehe pea hokohoko atu ʻi heʻene ako tuʻumaʻú. (Sione 16:12) ʻI heʻene maʻu ha ʻilo lahi ange ki he Tohi Tapú pea fakalakalaka fakalaumālié, te ne hoko nai ai ʻo mahinoʻi ʻa e akonaki Fakatohitapu ko iá.

⁴ Hoko ʻo Anga-Fakanānā: Kapau ʻoku ʻikai te ke fakapapauʻi ʻa e tali ki ha fehuʻi, talitekeʻi ʻa e fakatauele ke taliʻaki ha fakakaukau fakafoʻituituí. (2 Tim. 2:15; 1 Pita 4:11) Fakamatalaʻi te ke fai ha fekumi ki he kaveingá pea te ke foki ange mo ha tali. Te ke ngāueʻaki nai ai ʻa e faingamālié ke akoʻi ʻa e tokotaha akó ki he founga ke fai ai ha fekumí. Fakahaaʻi hokohoko ange ʻa e founga ke ngāueʻaki ai ʻa e ngaahi meʻangāue fakaefekumi kehekehe ʻoku tokonaki mai ʻe he kautaha ʻa Sihová. ʻI he founga ko ení ʻe faai atu pē ʻo ne malava ke tali ʻene ngaahi fehuʻí tonu.—Ng. 17:11.

Tokoniʻi Kinautolu Ke Nau Maʻu ha Fakamoʻoni Lahi Ange

¹ ʻI heʻetau vahevahe atu ʻa e ongoongo leleí, ʻoku tau faʻa fetaulaki ai mo e kakai ʻoku nau nofo ʻi tuʻa mei hotau feituʻu ngāué pe ʻoku nau lea ʻi ha lea kehe, ʻo kau ai ʻa e lea fakaʻilongá. Ko e niʻihi ʻa ia kuo tau fai ha ngaahi fetalanoaʻaki Fakatohitapu lelei mo kinautolú te nau hiki atu nai mei hotau feituʻu ngāué. ʻE lava fēfē ke tau fokotuʻutuʻu ke maʻu ʻe he faʻahinga peheé ha fakamoʻoni lahi angé? ʻAki hono ngāueʻaki ʻa e foomu Please Follow Up (S-43).

² ʻOku faʻa fanongo tokanga ange ʻa e kakaí ki he ongoongo leleí ʻi he taimi ʻoku tuʻuaki atu ai ʻi heʻenau lea tuʻufonuá. (Ng. 22:​1, 2) Ko ia ai, ʻi he ngaahi tuʻunga lahi, ʻi heʻetau fetaulaki mo ha taha ʻoku lea ʻi ha lea kehe, ʻoku totonu ke tau fakafonu ʻa e fōmú naʻa mo e taimi kapau ʻoku ʻikai fakahaaʻi ʻe he tokotahá ia ha mahuʻingaʻia ʻi he pōpoaki ʻo e Puleʻangá. Ka neongo iá, ʻi he feituʻu ko ia ʻoku ʻi ai ha faʻahinga lea muli tokolahi ʻoku nau maʻu tuʻumaʻu ha fakamoʻoni ʻi he lea ʻanautolú, ʻe ʻikai nai fiemaʻu ke fakafonu ʻa e fōmú tuku kehe kapau ʻoku fakahaaʻi ha mahuʻingaʻia.

³ Ko Hono Fakafonu ʻa e Fōmú: Feinga ʻi he fakapotopoto ke maʻu ʻa e hingoa ʻo e tokotahá, ko hono tuʻasilá mo ʻene fika telefoní. Fakahaaʻi ʻa e lahi ʻo e mahuʻingaʻia naʻe fakahāʻí, ko e taimi ʻe lava ke fai ai ha aʻu ki he tokotahá, ko e tohi naʻe tukú pe kolé pea mo e lea ʻoku mahinoʻi lelei taha ʻe he tokotahá. Hili hono fakakakato ʻa e fōmú, ʻave leva ia ki he sekelitali ʻa e fakatahaʻangá, ʻa ia te ne ʻoatu ia ki he fakatahaʻanga pe kulupu feʻungamālié.

⁴ Ko Hono ʻOatu ʻo e Fōmú: Kapau ʻoku ʻikai ʻiloʻi ʻe he sekelitalí pe ko fē ʻa e fakatahaʻanga pe kulupu ʻoku totonu ke ne maʻu ʻa e fōmú pe ʻikai ke ne maʻu ʻa e tuʻasila ʻo e meilí, ʻe lava ke ne telefoni ki he Service Desk ʻi he ʻōfisi vaʻá ke maʻu ʻa e fakamatala ʻoku fiemaʻú.

⁵ ʻI he taimi pē ʻoku maʻu ai ʻe ha fakatahaʻanga pe kulupu ʻa e foomu Please Follow Up ʻosi fakafonú, ʻoku totonu ke fai ha ngaahi fokotuʻutuʻu ke fai ha toe foki vave ki he tokotaha ko iá. ʻI heʻetau fakahoko tōtōivi ʻetau tafaʻakí, ʻe lava ke tau falala ʻe fakaava ʻe Sihova ʻa e loto ʻo e faʻahinga ʻoku nau “hehema totonu ki he moʻui taʻengatá.”—Ng. 13:​48, NW.