Konga 7​—Fai ʻa e Ngaahi Ako Tohi Tapu Fakalakalaká

Fai ʻa e Lotu ʻi he Akó

1. (a) Ko e hā ʻoku totonu ai ke kamata mo fakaʻosi ha ako Tohi Tapu ʻaki ʻa e lotú? (e) ʻE lava fēfē ke tau kamata ha lotu ʻi ha ako Tohi Tapu?

¹ Ke lava ʻe he kau ako Tohi Tapú ʻo fai ha fakalakalaka fakalaumālie, ʻoku fiemaʻu pau ʻa e tāpuaki ʻa Sihová. (1 Kol. 3:6) Ko ia ai, ʻoku totonu ke kamata mo fakaʻosi ha ako kuo ʻosi fokotuʻu ʻaki ʻa e lotu. ʻOku faʻa malava ke tau fai eni ʻi he fuofua ako pē mo e kakai ko ia ʻoku nau hehema fakalotú. ʻI he kau ako kehé, ʻe fiemaʻu nai ke tau ʻiloʻilo ki he taimi feʻungamālie ke kamata ai ʻa e lotú. Te ke ngāueʻaki nai ʻa e Sāme 25:​4, 5 mo e 1 Sione 5:14 ke tokoniʻiʻaki ʻa e tokotaha akó ke ne mahinoʻi ʻa e ʻuhinga ʻoku totonu ke fai ai ʻa e lotú pea toe ngāueʻaki foki ʻa e Sione 15:16 ke fakamatalaʻi ʻa hono mahuʻinga ʻo e lotu kia Sihova fakafou ʻia Sīsū Kalaisí.

2. Kapau ʻoku ʻalu fakataha ha tuofefine mo ha tokoua ʻosi papitaiso ʻi ha ako Tohi Tapu pe ko ha tokotaha malanga teʻeki papitaiso tangata, ko hai te ne fai ʻa e lotú?

² Ko hai ʻoku totonu ke ne fai ʻa e lotu ʻi ha ako Tohi Tapú? Kapau ʻoku ʻalu fakataha ha tokoua ʻosi papitaiso mo ha tuofefine ʻi ha ako, te ne fai ʻa e lotú, neongo ʻe fai nai ʻe he tuofefiné ʻa e akó lolotonga iá ʻokú ne tui ha pūlou. (1 Kol. 11:​5, 10) ʻI he tafaʻaki ʻe tahá, kapau ʻoku ʻalu fakataha ha tokotaha malanga teʻeki papitaiso ʻo e Puleʻangá ko ha tangata mo ha tuofefine, ʻe fai ʻe he tuofefiné ʻa e lotú. ʻI ha tuʻunga pehē, ʻoku totonu ke ne tui ha pūlou ʻi heʻene fai ʻa e lotú pea pehē ki hono fai ʻa e akó.

3. Ko e hā ʻa e ngaahi meʻa feʻungamālie ke fakakau ʻi he ngaahi lotu ʻoku fai ʻi ha ako Tohi Tapu?

³ Ko e Meʻa ʻe Fakakau Nai ʻi he Lotú: Ko e ngaahi lotu ʻi ha ako Tohi Tapu ʻoku ʻikai fiemaʻu ke fuʻu lōloa, ka ʻoku totonu ke fakahangatonu ia. Tuku kehe ʻa e kumi ki he tāpuaki ʻa e ʻOtuá ki he akó mo e fai ʻo e fakamālō ki he ngaahi moʻoni naʻe akó, ʻoku feʻungamālie ke fai ha fakahīkihiki kia Sihova ʻi hono tuʻunga ko e Matavai ia ʻo e fakahinohinó. (Ai. 54:13) ʻE lava foki ke tau toe fakakau ʻa e ngaahi kupuʻi lea ʻa ia ʻoku tapua atu ai ʻetau mahuʻingaʻia moʻoni ʻi he tokotaha akó mo ʻetau houngaʻia ki he kautaha ʻoku ngāueʻaki ʻe Sihová. (1 Tes. 1:​2, 3; 2: 7, 8) Ko ʻetau kole ki he tāpuaki ʻa Sihova ki he ngaahi feinga ʻa e tokotaha akó ke ne ngāueʻaki ʻa e meʻa ʻokú ne akó ʻe lava ke tokoniʻi ai ia ke ne sio ki he mahuʻinga ʻo e hoko ko ha ‘tokotaha fai ki he folofolá.’—Sem. 1:22.

4. Ko hono kamata mo fakaʻosi ha ako Tohi Tapu ʻaki ha lotú ʻoku ʻomai ai ʻa e ngaahi ʻaonga ko e hā?

⁴ ʻOku lahi ʻaupito ʻa e ngaahi ʻaonga ʻo e lotú. ʻOku ʻomi ai ʻa e tāpuaki ʻa e ʻOtuá. (Luke 11:13) ʻOku fakamamafaʻi ai ʻa e mahuʻinga ʻo hono ako ʻa e Folofola ʻa e ʻOtuá. ʻI he fanongo ʻa e tokotaha akó ki heʻetau ngaahi lotú, ʻokú ne ako ai ʻa e founga ki hono fai ʻo e lotú. (Luke 6:40) ʻIkai ngata aí, ko e ngaahi lotu ʻoku haʻu mei ha loto ʻoku fonu ʻi he ʻofa ki he ʻOtuá mo e houngaʻia ki hono ngaahi ʻulungāanga taʻefakatatauá ʻe lava ke tokoniʻi ai ʻa e tokotaha akó ke ne fakatupulekina ha vahaʻangatae fakafoʻituitui mo Sihova.

Meʻa ke Leaʻaki Fekauʻaki mo e Ngaahi Makasiní

Ko e Taua Leʻo ʻEp. 15

“ʻIkai nai ʻoku ala maʻu ʻi he ʻahó ni ha ʻuuni fakamatala taʻehanongataʻanga? [Tuku ke ne tali.] Ka neongo ia, ʻoku ʻikai ha toe fakamatala ʻe mahuʻinga ange ʻi he meʻa ʻoku fakamatalaʻi ʻi he potu tohi ko ení. [Lau ʻa e Sione 17:3.] ʻOku fakamatalaʻi ʻe he makasini ko ení ʻa e ʻuhinga ʻo e foʻi lea ko e ‘moʻui taʻengata’ pea mo e founga ʻe lava ai ke tau maʻu ʻa e ʻilo ʻoku taki atu ki aí.”

Awake! ʻEp. 22

“Neongo ʻa e pehē ʻoku ʻiloa ange nai ʻa Sīsū Kalaisi ia ʻi ha toe tangata pē kuo moʻui maí, ʻoku tokolahi ʻa e kakai ʻoku nau fifili pe ko hai moʻoni ia. Naʻá ke ʻiloʻi naʻa mo e kau ʻapositolo ʻa Sīsuú tonu naʻa nau fakakaukau loloto ki he meʻá ni? [Tuku ke ne tali. Pea lau leva ʻa e Maake 4:41.] ʻOku sivisiviʻi ʻe he makasini ko ení ʻa e meʻa ʻoku leaʻaki ʻe he Tohi Tapú ʻo fekauʻaki mo e fakapapauʻiʻanga totonu ʻo Sīsuú.”

Ko e Taua Leʻo Mē 1

“ʻI he taimi ʻoku mate ai ha taha ʻoku tau ʻofa ai, ʻoku fakanatula pē ʻa e fiemaʻu ke toe sio ki he tokotaha ko iá. ʻIkai ʻokú ke loto-tatau mo ia? [Tuku ke ne tali.] Kuo maʻu ʻe he tokolahi ʻa e fiemālie mei he talaʻofa ʻa e Tohi Tapú ki ha toetuʻú. [Lau ʻa e Sione 5:​28, 29.] ʻOku lāulea ʻa e makasini ko ení ki he taimi ʻe hoko ai ʻa e toetuʻú pea mo ia tonu ʻe maʻu ʻaonga mei aí.”

Awake! Mē 8

“Ko e tokolahi taha ʻo e ngaahi mātuʻá ʻoku nau filifili ʻi he meʻa ʻoku nau fakaʻatā ke mamata ai ʻenau fānaú. Kuo hoko nai ʻo faingataʻa ke maʻu ha ngaahi faiva ʻoku feʻunga ki ho fāmilí? [Tuku ke ne tali. Lau leva ʻa e Efeso 4:17.] Ko e makasini ko ení ʻoku lāulea ai ki he founga ʻe lava ai ʻe he ngaahi mātuʻá ke nau tokoniʻi ʻenau fānaú ke nau fili ʻa e fakafiefia ʻoku leleí.”