Konga 8​—Fai ʻa e Ngaahi Ako Tohi Tapu Fakalakalaká

Ko Hono Tataki ʻa e Kau Akó ki he Kautahá

1. Ko e hā ʻoku ʻaonga ai ke akoʻi ha poini fekauʻaki mo e kautaha ʻa Sihová ʻi he uike taki taha ʻi ha ako Tohi Tapú?

¹ Ko ʻetau taumuʻa ʻi hono fai ʻa e ngaahi ako Tohi Tapú ʻoku ʻikai ko hono akoʻi pē ʻa e ngaahi fakamatala fakatokāteliné kae toe tokoniʻi foki ʻa e kau akó ke nau hoko ko ha konga ʻo e fakatahaʻanga Kalisitiané. (Sak. 8:23) Ko e polosiua ko e Kau Fakamoʻoni ʻa Sihová—Ko Hai Kinautolu? Ko e Hā ʻOku Nau Tui ki Aí? ʻe lava ke ne tokoniʻi kitautolu ke tau fai eni. Tuku ha tatau ʻi he kau ako Tohi Tapu foʻoú, pea fakalototoʻaʻi kinautolu ke nau lau ia. Tānaki atu ki ai, vaheʻi ha ngaahi miniti siʻi ʻi he uike taki taha ʻi he akó ke akoʻi ai ha poini fekauʻaki mo e kautaha ʻa Sihová.

2. ʻE lava fēfē ke ke fakalototoʻaʻi ʻa e kau ako Tohi Tapú ke nau maʻu ʻa e ngaahi fakataha ʻa e fakatahaʻangá?

² Ngaahi Fakataha ʻa e Fakatahaʻangá: Ko e founga tefito ke hoko ai ʻa e kau ako Tohi Tapú ʻo mahinoʻi ʻa e kautaha ʻa e ʻOtuá ko e feohi mo kitautolu ʻi he ngaahi fakataha ʻa e fakatahaʻangá. (1 Kol. 14:​24, 25) Ko ia ai, te ke kamata nai hono ʻai ke nau maheni mo e ngaahi fakatahá ʻaki hono fakamatalaʻi ʻa e ngaahi fakataha fakauike ʻe nimá, ko e fakataha ʻe taha ʻi he taimi taki taha. Lave ki he kaveinga ʻo e malanga hoko maʻá e kakaí. Fakahaaʻi ange ʻa e tohi ʻe fai ʻa e lāulea ki ai ʻi he Ako Taua Leʻo pea ʻi he Ako Tohi ʻa e Fakatahaʻangá. Fakamatalaʻi ʻa e Ako Fakafaifekau Fakateokalatí mo e Fakataha Ngāué. ʻI hoʻo fai ha konga ʻi he akó, mahalo te ke ʻahiʻahi nai ia mo kinautolu. Vahevahe ʻa e ngaahi poini tuʻu-ki-muʻa naʻe fakahoko ʻi he ngaahi fakatahá. Ngāueʻaki ʻa e ʻū tā ʻi heʻetau ngaahi tohí ke tokoniʻi kinautolu ke nau fakakaukauloto ki he meʻa ʻoku hokó. ʻI he fuofua akó pē, fakaafeʻi kinautolu ke nau maʻu ia.

3. Ko e hā ʻa e ngaahi tafaʻaki ʻo e kautahá te tau lāulea nai ki aí?

³ ʻI he fakaofiofi mai ʻa e Fakamanatú, ngaahi ʻasemipilií mo e ʻaʻahi ʻa e ʻovasia sēketí, vaheʻi ha ngaahi miniti siʻi ke fakamatalaʻi ai pea ke langa hake ʻa e loto-māfana ki he ngaahi fokotuʻutuʻu ko ení. Fai hano tali fakalakalaka ʻa e ngaahi fehuʻi hangē ko ení: Ko e hā ʻoku ui ai kitautolu ko e Kau Fakamoʻoni ʻa Sihová? Ko e hā ʻoku tau fakahaaʻi ai hotau ngaahi feituʻu faiʻanga fakatahá ko e ngaahi Fale Fakatahaʻangá? Ko e hā ʻa e ngaahi fatongia ʻo e kau mātuʻá mo e kau sevāniti fakafaifekaú? ʻOku anga-fēfē hono fokotuʻutuʻu ʻa e ngāue fakamalangá mo e ngaahi feituʻu ngāué? ʻOku anga-fēfē hono faʻu ʻa ʻetau ngaahi tohí? ʻOku anga-fēfē hono fakapaʻanga ʻa e kautahá? Ko e hā ʻa e ngaahi fatongia ʻo e ʻōfisi vaʻá mo e Kulupu Pulé ʻi hono tokangaʻi ʻa e ngāué?

4, 5. ʻE lava fēfē ʻe heʻetau ngaahi foʻi vitioó ʻo langaʻi ʻa e houngaʻia ki he kautahá?

⁴ Ngaahi Foʻi Vitiō Fakatupu ʻIlo: Ko e founga ʻe taha ʻe lava ai ʻa e kau ako Tohi Tapú ke nau sio ki he kautaha fakaofo ʻa Sihová ʻoku fakafou ia ʻi heʻetau ngaahi foʻi vitioó. ʻOku fakahaaʻi ʻe he foʻi vitiō To the Ends of the Earth ʻa ʻetau ngāue fakamalanga ʻi māmani lahí; ʻoku fakahaaʻi ʻe he Our Whole Association of Brothers ʻa ʻetau fetokouaʻaki ʻi māmani lahí; pea ʻoku fakahaaʻi ʻe he United by Divine Teaching ʻa e fāʻūtaha ʻoku maʻu ʻe he Kau Fakamoʻoni ʻa Sihová. Ko ha fefine ʻa ia naʻá ne maʻu ʻa ʻetau ngaahi makasiní mo e ngaahi tohi kehé ʻi he taʻu ʻe nima naʻe ueʻi ia ʻe he foʻi vitiō Jehovah’s Witnesses—The Organization Behind the Name ke ne fakatōloʻimata. Naʻá ne hoko ʻo falala ki he Kau Fakamoʻoni naʻa nau ʻaʻahi angé, ka ʻi he hili ʻa e mamata ʻi he foʻi vitioó, naʻá ne ongoʻi ai ʻe lava ke ne falala foki ki he kautahá. Naʻe kamataʻi ha ako fakalelei mo ia, pea ʻi he uike hoko maí, naʻá ne maʻu ʻa e ngaahi fakataha ʻi he Fale Fakatahaʻangá.

⁵ ʻAki hono fakamoleki ha ngaahi miniti siʻi mo ʻetau kau akó ʻi he uike taki taha pea ʻi hono ngāueʻaki ʻa e ngaahi meʻangāue kuo tokonaki maí, ʻe lava ai ke tau tataki fakalakalaka ʻa e kau ako Tohi Tapú ki he kautaha pē ʻe taha ʻoku ngāueʻaki ʻe Sihova he ʻaho ní.

Meʻa ke Leaʻaki Fekauʻaki mo e Ngaahi Makasiní

Ko e Taua Leʻo Mē 15

“ʻOkú ke fakakaukau ʻe faifai ange pea tau sio ʻi ha māmani ʻoku ʻikai ke toe ʻi ai ha masiva? [Tuku ke ne tali.] Fakatokangaʻi angé ʻa e meʻa ʻoku talaʻofa ʻe he ʻOtuá. [Lau ʻa e Aisea 65:21.] ʻOku fakamatalaʻi ʻe he ʻīsiu ko ʻeni ʻo e Taua Leʻo ʻa e founga ʻe hoko ai ʻa e talaʻofa ko ʻení ko ha meʻa moʻoní.” Fokotuʻutuʻu ke toe foki ki ai ke lāulea ki he fehuʻi: Ko fē ʻa e taimi ʻe hoko ai ʻa e talaʻofa ki he liliu ko ʻení?

Awake! Mē 22

“Ko e tokolahi taha ʻo e kakaí kuo nau fanongo ʻi he pehē ʻoku mahuʻinga ʻa e fakamālohisinó ki he moʻui leleí, neongo ia ʻoku fakahaaʻi ʻe he tokolahi ʻoku ʻikai ke feʻunga ʻenau fakamālohisinó. ʻIkai ʻoku pehē? [Tuku ke ne tali.] ʻOku sivisiviʻi ʻe he makasini ko ʻení ʻa e ngaahi ʻaonga ʻo e fakamālohisino tuʻumaʻú pea ʻoku fokotuʻu mai ai ʻa e ngaahi founga ʻe niʻihi ʻe lava ke tau fakakau ki heʻetau moʻui femoʻuekiná.”

Ko e Taua Leʻo Sune 1

“Neongo ko e meimei tokotaha kotoa pē ʻoku talanoa fekauʻaki mo e melinó, ko e fāʻūtaha ʻi he māmaní kuo mole ia mei he faʻahinga ʻo e tangatá. ʻOkú ke fakakaukau ko hono lavaʻi iá ko ha misi pē ia? [Tuku ke ne tali.] ʻOku tohoakiʻi ʻe he makasini ko ʻení ʻa e tokangá ki ha founga-pule ʻa ia ʻokú ne malava ke fakafāʻūtahaʻi ʻa e māmaní.” Lau ʻa e Sāme 72:​7, 8, pea fokotuʻutuʻu ke toe foki ki ai ke fetalanoaʻaki ki he founga ʻe fakahoko ai ʻení.

Awake! Sune 8

“Kuó ke fakatokangaʻi ʻoku hohaʻa ʻa e kakai tokolahi fekauʻaki mo e tupulaki fakautuutu ʻa e kanisā ʻo e kilí? [Tuku ke ne tali.] ʻOku sivisiviʻi ʻe he ʻīsiu ko ʻeni ʻo e Awake! ʻa e ʻuhinga ʻoku tau ʻi he tuʻunga fakatuʻutāmaki lahi ange ai he ʻaho ní pea mo e meʻa ʻe lava ke tau fai ke maluʻi ai kitautolú.” Fakaʻosiʻaki ʻa hono vahevahe ʻa e talaʻofa fakafiemālie ʻoku maʻu ʻi he Siope 33:25.