Fanongonongo

◼ Tohi ke tuʻuaki ʻi Nōvema: Ako mei he Faiako Lahí. Ki ha toe tuʻuaki ʻe taha, te ke fakaʻaliʻali nai ʻa e tohi ʻIlo pe ko e tuleki Te Ke Saiʻia ke ʻIlo Lahi Ange ki he Tohi Tapú? Tīsema: Ko e Moʻungaʻi Tangata Lahi Taha Kuo Moʻui Maí. Ki ha toe tuʻuaki ʻe taha, te ke fakaʻaliʻali nai ʻa e Ko ʻEku Tohi ʻo e Ngaahi Talanoa Fakatohitapú. Sanuali: Ko e Fakapulipuli ʻo e Fāmili Fiefiá. Fepueli: ʻUnuʻunu Ofi kia Sihova.

◼ ʻOku totonu ki he ʻovasia tauhí pe ko ha tokotaha kuó ne vaheʻi ke ne ʻaotitaʻi ʻa e paʻanga ʻa e fakatahaʻangá ʻi Tīsema 1 pe ʻi he faingamālie vave taha ʻi he hili pē iá. Kapau ʻoku maʻu ha ʻakauni sieke mavahe, hangē ko ia ki he monomonó pe ko e langá, ʻoku totonu ke toe fai foki ha ngaahi fokotuʻutuʻu ke ʻaotitaʻi mo e ʻakauni ko iá. ʻI he ʻosi hono fakakakato ʻa e (ngaahi) ʻaotita ko ʻení, ʻoku totonu ke fanongonongo ia ki he fakatahaʻangá ʻi he fakamatala paʻanga hono hokó.

◼ Ko e sekelitali ʻo e fakatahaʻanga taki taha ʻokú ne maʻu ha totonu ki ha koloa ʻa e Fale Fakatahaʻangá ʻoku totonu ke ne ʻai ʻo fakapapauʻi ko e “Annual Congregation Property Documents & Safety Inspection Worksheet” (T-34 7/01) kuo ʻosi fakakakato ia.

◼ Ko e ngaahi tokoni sieke kuo fai ki he “Ngāue ʻo e Puleʻangá—Mātiu 24:14” ʻi he ngaahi ʻasemipilī fakasēketí, ʻasemipilī ʻaho makehé mo e ngaahi fakataha-lahí, pe kuo ʻave fakahangatonu ki he ʻŌfisi Vaʻa ʻo Nuʻu Silá, ʻoku totonu ke ʻai ʻo totongi ia ki he “Watch Tower.” ʻOku toe ngāueʻaki foki ʻeni ki ha faʻahinga sieke pē ʻoku ʻi he ngaahi puha lī tokoni maʻá e “Ngāue ʻo e Puleʻangá” ʻi he Fale Fakatahaʻangá. Kapau ʻoku fiemaʻu ha laʻi tali totongi kātaki ʻo fakapapauʻi ke fakakau ho hingoá mo ho tuʻasilá ʻi he tuʻa sieké.

◼ Ko e foʻi polokalama vitiō Transfusion-Alternative Health Care​—Meeting Patient Needs and Rights ʻe lāulea ki ai ʻi ha Fakataha Ngāue ʻi Sanuali. Kapau ʻe fiemaʻu, ʻoku totonu ke fai ha kole ki ha ngaahi tatau ʻo fakafou ʻi he fakatahaʻangá ʻi he faingamālie vave tahá.

ʻE Lava Fēfē Ke Mau Tokoni Atu?

¹ Ko e fehuʻi “ʻE lava fēfē ke mau tokoni atu?” ʻoku faʻa langaʻi ia ʻe he Kau Fakamoʻoni ʻa Sihová ʻi he taimi ʻoku nau fanongo ai ʻi ha fakatamaki kuo hoko ʻi ha feituʻu ʻi he māmaní. Hangē ko ia ko hono fakahaaʻi ʻe he fakamatala ʻi he Ngāue 11:​27-​30, ko e kau Kalisitiane ʻi he ʻuluaki senitulí ne nau tokonaki ha ngaahi ngāue tokoni ki he fanga tokoua ne nau nofo ʻi Siuteá koeʻuhí ko ha honge naʻe hoko ʻi ai.

² ʻI onopōní, ko ʻemau ngaahi tohi aleapau fakakautahá kuo fakangofua ai ʻa e paʻanga ke ngāueʻaki ki he ngāue tokoni ʻofá pea ke tokonaki ai ha foaki tokoni fakaetangata ki he faʻahinga ko ia ʻoku nau faingataʻaʻia ʻi he ngaahi fakatamaki fakanatula pe fakatupu ʻe he tangatá pea mo e ngaahi fiemaʻu ʻi he ngaahi taimi kehé.

³ Ko e fakatātaá, ʻi he taʻu kuo ʻosí naʻe tokolahi ʻa e fanga tokoua naʻa nau tokoni fakapaʻanga ki he faʻahinga ko ia naʻe uesia ʻe he fakatamaki ʻo e peau kulá ʻi ʻĒsia Tongá. Ko e tali kaungāongoʻi ko ʻeni ʻaki hono fai ha tokoni fakapaʻanga ki he paʻanga tokoni ʻa e kautahá naʻe fakahoungaʻi lahi ia. Kae kehe, ʻi he taimi ʻoku fakamavaheʻi fakahangatonu ai ʻa e ngaahi tokoní ki ha fakatamaki paú, ʻoku fiemaʻu fakalao ia ʻi he ngaahi fonua ʻe niʻihi ke ngāueʻaki pē ʻa e paʻanga ko iá ki he taumuʻa naʻe fakahaaʻi ʻe he tokotaha tokoní pea ʻi loto ʻi ha vahaʻa taimi pau, ʻo tatau ai pē pe kuo ʻosi tokangaʻi fakalotofonua ʻa e ngaahi fiemaʻu ia ʻo hotau fanga tokouá pe ʻikai.

⁴ Ko ia ai, ʻoku fokotuʻu mai ke ʻai ʻa e ngaahi tokoni foaki fakaetangatá mo e foaki tokoní ki he ngāue ʻi māmani lahí. Ko e paʻanga ko ʻení ʻoku ngāueʻaki ia ki he ngaahi feinga tokoní pea pehē foki ki hono ʻai ko ia ke fakalakalaka ʻa e ngaahi fiemaʻu fakalaumālie ʻa e fetokouaʻaki faka-Kalisitiané. Kapau ʻi ha faʻahinga ʻuhinga, ʻoku fakaʻamu ʻe ha tokotaha ke fai ha foaki tokoni ʻo mavahe ia mei he ngaahi tokoni ki he ngāue ʻi māmani lahí, ʻe kei tali pē mo ngāueʻaki ia ki ha faʻahinga feituʻu pē ʻa ia ʻoku fiemaʻu ki ai ha foaki tokoní. Kae kehe, ʻe lelei ange kapau ko e ngaahi tokoni peheé ʻoku fai ia ʻo ʻikai ha ngaahi fakangatangata ki he feituʻu pea mo e founga ʻe ngāueʻaki nai ki ai ʻa e paʻangá.

⁵ Ko e ʻuhinga ʻoku tataki ai ʻa e ngaahi tokoní ʻo muʻomuʻa ki he ngāue ʻi māmani lahí he ʻoku fakaʻatā ai ʻa e paʻanga lahi ange ke ngāueʻaki ʻi he fekauʻaki mo e kotoa ʻo e ngaahi tafaʻaki ʻo e ngāue ʻo e Puleʻangá kae ʻikai ko hono tukumavaheʻi ki he ngaahi fiemaʻu tokoni pē ʻi he kahaʻú. ʻOku fehoanakimālie ʻeni mo e ʻuhinga totonu ʻo e Efeso 4:​16, ʻa ʻetau ngāue fakataha ko ia ke foaki ʻa e meʻa ʻoku fiemaʻu ki he “langa hake ʻo e sino ʻi he ʻofa.”