ʻOfá—Ko e Kī ki he Ngāue Fakafaifekau Ola Lelei
1 “Haʻu kiate au, . . . pea te u fakamālōlō kimoutolu.” (Mt. 11:28) Ko e ngaahi lea mālie peheé naʻe tapua atu ai ʻa e ʻofa lahi ʻa Sīsū ki he kakaí. ʻI he tuʻunga ko e kau faifekau Kalisitiané, ʻoku tau loto ke faʻifaʻitaki kia Sīsū ʻi hono fakahāhā ʻa ʻetau ʻofa ki he kakai kuo fakaongosiaʻi ʻe he māmani taʻeʻofá. ʻE lava fēfē ke tau fai pehē ʻi heʻetau vahevahe atu ʻa e ongoongo leleí?
2 ʻI he Lea: Naʻe ueʻi ʻa Sīsū ʻe he ʻofa ki he kakaí ke ne ngāueleleiʻaki ʻa e faingamālie kotoa pē ke vahevahe atu ai ʻa e ongoongo leleí. (Sione 4:7-14) ʻE tokoniʻi kitautolu ʻe he ʻofá ke tau ikuʻi ʻa e toumoua ke faifakamoʻoni ʻikai ʻi he founga anga-mahení. Naʻe fai ʻe ha kiʻi taʻahine taʻu ono ha fakamoʻoni lelei ki ha fefine naʻá na tangutu fakataha ʻi ha loki talatala. Ko e hā naʻá ne ueʻi ia ke fai peheé? Naʻá ne fakamatala, “Naʻe hā ngali naʻe fiemaʻu ʻe he fefiné ke ne ʻilo fekauʻaki mo Sihova.”
3 ʻE lava ke tau fakahā ʻetau mahuʻingaʻia ʻi he kakaí ʻaki ha malimali fiefia moʻoni mo ha leʻo anga-fakakaumeʻa. Ko e fanongo tokanga ki he ngaahi lea ʻa e niʻihi kehé, lāuʻilo ki heʻenau ngaahi hohaʻá, pea fakahāhā ʻa e mahuʻingaʻia fakafoʻituitui moʻoní ʻoku fakahaaʻi meimei tatau ai ʻa e ʻofá. (Pal. 15:23) ʻI he faʻifaʻitaki kia Sīsuú, ʻoku totonu ke tau fakamamafaʻi ʻa e pōpoaki fakalototoʻa ʻo e Puleʻangá pea mo e manavaʻofa ʻa Sihova ki he kakaí.—Mt. 24:14; Luke 4:18.
4 ʻI he Ngāue: Naʻe ongongofua ʻa Sīsū ki he ngaahi fiemaʻu ʻa e niʻihi kehé ʻi he ngaahi founga ʻaonga mo pau. (Mt. 15:32) ʻOku tau toe maʻu nai ha ngaahi faingamālie ke fai ha ngāue anga-ʻofa he lolotonga ʻa e ngāue fakafaifekaú. Naʻe fakatokangaʻi atu ʻe ha tuofefine ʻa e fāinga ʻa ha fefine ke ne mahinoʻi ha telefoni mahuʻinga kiate ia. Naʻe loto-lelei ʻa hotau tuofefiné ke tokoni ʻaki ʻene fakatonuleaʻi ʻa e ngaahi lea ʻa e tokotaha naʻe tā maí. Naʻe fakaʻatā ʻe he ngāue anga-ʻofa ko ʻení ke fai ha fetalanoaʻaki Fakatohitapu, ʻa ia naʻe tokoniʻi ai ʻa e fefiné ke ne tali ha ako Tohi Tapu. ʻI ha tuʻunga kehe, naʻe fakatokangaʻi ai ʻe ha tokoua naʻá ne fai ha toe ʻaʻahi ʻa e tokotaha-ʻapí naʻe kamata ke ʻita ʻi hano feingaʻi ke fakahūhū atu ha fuʻu sofa ʻi he matapaá. ʻI he hili ʻa hono fai ha tokoni fakakaungāʻapi, naʻe ʻikai fuoloa kuo tangutu ʻa e tokouá ʻi he sofa naʻá ne tokoni ki hono hikí, ʻo kamata ha ako Tohi Tapu mo e tangata houngaʻiá.
5 ʻI heʻetau kau ki he ngāue fakafaifekaú, ʻoku tau fakahāhā ai ʻetau ʻofa ki he ʻOtuá mo ʻetau ʻofa ki he kaungāʻapí. (Mt. 22:36-40) Ko e fakahāhā pehē ʻi he leá mo e ngāué ʻoku tokoniʻi ai ʻa e faʻahinga loto-totonú ke nau ʻiloʻi ʻoku tau maʻu ʻa e moʻoní.