Tohi mei he Kulupu Pulé
Siʻi Kaungā Fakamoʻoni ʻa Sihova:
Naʻe ngāueʻaki ʻe he ʻapositolo ko Paulá ʻa e faingamālie kotoa pē ke fakahaaʻi ai ʻa ʻene ʻofa mo e houngaʻia ki hono kaungātuí. Ki he kau Kalisitiane ʻi Lomá, naʻá ne tohi: “ʻOku ou fakafetaʻi ki hoku ʻOtua ʻia Sisu Kalaisi, koeʻuhi ko kimoutolu fulipe, koeʻuhi ko e ongoongoa ʻo hoʻomou lotu ʻi mamani katoa.” (Loma 1:8) ʻIo, ʻi he kotoa ʻo e ʻEmipaea Lomá, naʻe ʻiloa ai ʻa e kau Kalisitiane ʻi he ʻuluaki senitulí ʻi heʻenau tui mālohí, pea pehē ki heʻenau ngāue fakamalanga faivelengá. (1 Tes. 1:8) ʻOku ʻikai ha veiveiua naʻe maʻu ʻe Paula ʻa e ʻofa lahi ki hono fanga tokouá!
Hangē ko Paulá, ʻoku mau fakamālō kia Sihova ʻi he taimi kotoa pē ʻoku mau fakakaukau atu ai kia kimoutolú. ʻOku mau ʻofa lahi atu kia kimoutolu kotoa! Pea ʻe lava ke mou fakapapauʻi ʻa e ʻofa ko ia ʻa Sihova ʻia kimoutolu tāutaha. ʻOku fehangahangai ʻa e niʻihi ʻo kimoutolu mo e fakafepaki lahi, ka ʻoku mou kei hokohoko atu pē ʻa e malangá. He fiefia ē ko e loto ʻo Sihová ʻi he laumālie loto-toʻa mo e taʻemanavahē ʻoku mou fakahāhaá!—Pal. 27:11.
ʻI hoʻomou lau fakalelei pea fakalaulauloto ki he “Ngaahi Ngāue ʻa e Kau Fakamoʻoni ʻa Sihova ʻi Onopōní” ʻoku hā ʻi he pulusinga fakalotomāfana mo fakatupu tui mālohi ko ʻeni ʻo e Yearbook, te mou sio ai ki he fakamoʻoni lahi ʻānoa ʻoku ʻalu atu ʻa e ʻEiki ko Sīsū Kalaisí ʻi he “ikuna pea ke ne ikuna” pea ko ha faʻahinga mahafu pē ʻoku faʻu ke fakafepakiʻi ʻaki ʻa e kau muimui ʻo Kalaisí ʻe ʻikai ke lavameʻa.—Fkh. 6:2; Ai. 54:17.
Naʻe tohi ʻe Paula ki he kau Kalisitiane ʻi Filipaí: “Oku ou fakafetai ki hoku Otua . . . Koeuhi ko hoo mou kau fakataha i he ogoogolelei.” (Fili. 1:3-5, PM) Ko kimautolu ko e kau mēmipa ʻo e Kulupu Pulé ʻoku mau ongoʻi tatau fekauʻaki mo kimoutolu. He lolotonga ʻo e taʻu fakangāue ʻo e 2007, naʻe fakamoleki ai ʻe he kau malanga ʻe toko 6,691,790 ha houa fakakātoa ʻe 1,431,761,554 ʻi hono malangaʻi ʻa e ongoongo leleí ʻi he fonua ʻe 236 takatakai ʻi he māmaní. Ko ha feinga lahi ē kuo mou fai ke hokohoko atu hono fakamafola ʻa e ongoongo leleí! Fakakaukau ki he moʻui ʻe laui kilu kuo maongo kia kinautolu ʻa ʻetau ngaahi feinga fakatahá, ʻo ʻoatu kotoa ai ʻa e fakahīkihikí kia Sihova!
ʻI he taimi ʻe taha, naʻe fakahaaʻi ai ʻe Paula ʻa ʻene kaungāongoʻi lahi ki hono fanga tokouá. Naʻá ne tohi ki he faʻahinga ʻi Tesalonaiká: “O manatu mau ai be ki hoo mou . . . faa kataki i he amanaki lelei, i ho tau Eiki ko Jisu Kalaisi.” (1 Tes. 1:2, 3, PM) ʻIo, ʻoku lahi ʻa e ngaahi palopalema ʻi he moʻuí. ʻOku malanga hake ʻa e ngaahi palopalemá, ka ʻoku mātuʻaki fiemaʻu ke tau kātaki. Ko e hā ʻa e ngaahi pole ʻokú ke fehangahangai fakafoʻituitui mo iá? ʻOkú ke loto-siʻi koeʻuhi ko ha puke lahi ʻoku fakangatangata ai ʻa e meʻa ʻokú ke malava ʻo fai ʻi he ngāue ʻa Sihová? Kuo mate ʻa ho hoá ʻi he laui taʻu ʻo maʻu ia ʻe he fili taʻefiemālie lahi tahá, ʻa Seoli? (Pal. 30:15, 16) ʻOkú ke kumi, ʻo meimei kulanoa ki ha hoa mali ʻokú mo ʻofa tatau kia Sihova lolotonga iá ʻokú ke pipiki ki he faleʻi Fakatohitapu ke mali pē ʻi he ʻEikí? (1 Kol. 7:39) ʻOkú ke fāinga ke ʻohake hoʻo fānaú ʻi he lotolotonga ʻo e ngaahi tuʻunga faingataʻa lahi fakaʻekonōmiká? Ko e hā pē ho tuʻungá, kapau ʻokú ke hanganaki fakamuʻomuʻa ʻa e ngaahi meʻa ʻo e Puleʻangá, ʻe lava ke ke fakapapauʻi ko Sihová heʻikai te ne “fakangaloʻi hoʻomou ngaue, mo e ʻofa ki hono huafa.” Kātaki, fanga tokoua mo e fanga tuofāfine, ʻoua te mou “fiu ʻi he failelei”!—Hep. 6:10; Kal. 6:9.
Ko e hā te ne fakamafeia kimoutolu ke mou kātakí? Hangē ko ia ko e kau Tesalonaiká, ko e “amanaki lelei, i ho tau Eiki ko Jisu Kalaisi.” ʻI ha ʻuhinga lelei, naʻe fakatatau ai ki mui ʻe Paula ʻa e ‘amanaki ki he fakamouí’ ki ha tatā fefeka ʻe lava ke ne maluʻi ha Kalisitiane mei he fakakaukau taʻepaú mo e veiveiua hokohokó.—1 Tes. 5:8, PM.
Ko hono moʻoní, ʻi he kātaki fiefiá, ʻokú ke ʻoatu ai ha tali ki he ngaahi manuki ʻa Sētane fekauʻaki mo e ʻīsiu lahi ʻo e tuʻunga-hau fakaʻunivēsí. ʻOku taukaveʻi ʻe Sētane ʻoku fakaenatula pē ʻa e siokita ʻa e kau sevāniti ʻa e ʻOtuá pea ʻi he lolotonga ʻoku nau loto-lelei nai ke tauhi ki he ʻOtuá ʻi ha kiʻi taimi nounou, te nau māmālie hifo ʻi heʻenau lotú kapau ʻoku tupulaki ʻa e ngaahi ʻahiʻahí pe ʻo kapau ʻe hokohoko atu ʻo fuʻu fuoloa ʻa e fokotuʻutuʻu ʻo e ngaahi meʻá mei he meʻa ʻoku nau ʻamanekiná. ʻOkú ke maʻu ʻa e monū ke fakaeʻa ʻa e Tēvoló ko e tokotaha loi fehiʻanekina ia! ʻI he ʻaho taki taha ʻokú ke toe ofi ange ai ke maʻu ʻa e ngaahi tāpuaki ʻokú ke ʻamanaki ki aí.
Hangē pē ko hono maʻu ʻe Paula ʻa e faingamālie ke fakaongoongoleleiʻi ai ʻa hono fanga tokouá koeʻuhi ko ʻenau tui mālohí, ko ʻenau tokoni nima-homo ki he ngāue fakamalangá mo ʻenau kātakí, ʻoku mau maʻu ai ʻa e faingamālie ko ʻení ke fakaongoongoleleiʻi kimoutolu mo fakapapauʻi atu ai ʻemau ʻofá kia kimoutolu. Hokohoko atu ʻa e ngāue leleí!
ʻOfa ke hoko ʻa e taʻu ka hoko maí ʻo fonu ʻi he ngaahi tāpuaki fakalaumālie lahi. ʻI he talamonū atu
Mei homou fanga tokoua,
Kulupu Pule ʻo e Kau Fakamoʻoni ʻa Sihová