ʻE Anga-Fēfē Nai Haʻatau Tokoniʻi ʻa e Kau Maʻu Fakamanatú?

1. Ko e hā ʻa e fakamoʻoni mālohi ʻe fai ʻi Maʻasi 22, 2008?

¹ ʻI Maʻasi 22, 2008, ʻe maʻu ai ʻe he kakai ʻe laui miliona takatakai ʻi he māmaní ha fakamoʻoni mālohi. Ko e faʻahinga te nau maʻu ʻa e Fakamanatú te nau fanongo ai fekauʻaki mo e ʻofa lahi ʻa Sihová ʻi hono tokonaki mai ʻa e huhuʻí maʻá e faʻahinga ʻo e tangatá. (Sione 3:16) Te nau ako ai fekauʻaki mo e Puleʻangá mo e founga ʻe ngāueʻaki ai ia ʻe Sihova ke fakahokoʻaki hono finangaló ki he kotoa ʻo e foʻi māmaní. (Mt. 6:9, 10) Te nau sio tonu ai ki he ʻofa mo e fāʻūtaha ʻa e kakai ʻa e ʻOtuá pea aʻusia ʻa ʻetau anga-talitali kakai loto-māfaná.—Sāme 133:1.

2. ʻE anga-fēfē nai haʻatau tokoniʻi ʻa e kau ako Tohi Tapu ʻoku nau haʻu ki he Fakamanatú?

² Kau Ako Tohi Tapu: Ko e niʻihi ʻi he kau fanongó ko e faʻahinga naʻa nau toki kamata ako pē ʻa e Tohi Tapú mo kitautolu. Fakafeʻiloaki kinautolu ki he fanga tokouá mo e fanga tuofāfiné. Fakamatalaʻi ange kia kinautolu ʻa e ngaahi fakataha fakauiké, pea taki mamataʻi nounou kinautolu ʻi he Fale Fakatahaʻangá. ʻI he lolotonga ʻo e malangá, ʻe fakalototoʻaʻi ai ʻe he tokotaha malangá ʻa e faʻahinga peheé ke nau hokohoko atu ʻenau fakalakalaka fakalaumālié. ʻE lava ke ke ngāueʻaki ʻa ʻene fakamatalá ko ha makatuʻunga ia ke fakalototoʻaʻi ai ʻa hoʻo kau akó.

3. Ko e hā ʻe lava ke fai ke fakalototoʻaʻi ai ʻa e kau malanga ʻikai longomoʻui ʻoku nau ʻi he kau fanongó?

³ Faʻahinga ʻIkai Longomoʻui: Ko e niʻihi te nau ʻi aí ko e kau malanga ʻikai longomoʻui. Tamuʻomuʻa ʻi hono talitali loto-māfana kinautolú. Fakaʻehiʻehi mei hono ʻeke ha ngaahi fehuʻi fakafoʻituitui pe leaʻaki ha meʻa ʻe fakamaaʻi nai ai kinautolu. Taimi nounou pē mei he hili ʻa e Fakamanatú, ʻoku totonu ke ʻaʻahi ʻa e kau mātuʻá ki ha faʻahinga ʻikai longomoʻui pē naʻa nau haʻu, ʻo fakaongoongoleleiʻi kinautolu koeʻuhi ko ʻenau ngaahi feinga ke haʻú, pea fakaafeʻi loto-māfana kinautolu ki he fakataha hono hoko ʻa e fakatahaʻangá.

4. ʻE anga-fēfē nai haʻatau taki taha tokoniʻi ʻa e kau ʻaʻahí?

⁴ Kau ʻAʻahi: Ko e niʻihi ʻoku ʻi aí ko e ngaahi maheni nai pe ngaahi mēmipa ʻo e fāmilí naʻa tau fakaafeʻi. Naʻe fakaafeʻi nai ha niʻihi he lolotonga ʻa e feingangāue makehé. Kapau te ke sio ki ha faʻahinga tāutaha ʻoku ʻikai te ke ʻilo, tamuʻomuʻa ʻi he fakafeʻiloaki atu koé pea talitali lelei kinautolu. Mahalo pē naʻe teʻeki ai ke nau maʻu ki muʻa ha taha ʻo ʻetau ngaahi fakatahá. ʻI hoʻomo fetalanoaʻakí, te ke malava ai ʻo ʻilo pe ʻe fēfē haʻo fetuʻutaki mo kinautolu. ʻI ha ʻaʻahi tonu pe ko ha telefoni nounou hili ha ngaahi ʻaho siʻi mei he Fakamanatú, ʻe lava ke ke feinga ai ke fakatupulekina ha mahuʻingaʻia lahi ange pea tuʻuaki ha ako Tohi Tapu.

5. Ko e hā nai te tau leaʻaki ke kamata ha ako Tohi Tapú?

⁵ ʻE lava ke ngāueʻaki ʻa e fakamatala mei he malanga Fakamanatú ko ha makatuʻunga ia ki hono fakaʻaliʻali ʻo e tohi Akoʻi ʻe he Tohi Tapú ʻi ha toe ʻaʻahi. Ko e fakatātaá, ʻe lau ʻe he tokotaha malanga Fakamanatú ʻa e Aisea 65:21-23. ʻI he toe ʻaʻahí, te ke lave nai ki he malangá peá ke pehē, “Fēfē ke u fakahā atu kiate koe ha ngaahi tāpuaki kehe ʻoku ʻai ʻe he huhuʻí ke ala lava ʻo hoko.” Lāulea leva ki he peesi 4-5 ʻo e tohi Akoʻi ʻe he Tohi Tapú. Pe te ke pehē, “ʻOku fifili ʻa e tokolahi pe te tau aʻusia ʻafē ʻa hono fakahoko ʻo e kikite ʻa ʻAiseá.” Lāulea leva ki he palakalafi 1-3 ʻi he vahe 9. Ko ha toe meʻa ʻe taha ko e lave pē ki he fakamatala ʻa e tokotaha malanga Fakamanatú, fakaʻaliʻali ʻa e tohi Akoʻi ʻe he Tohi Tapú, pea fakahāhaaʻi ʻa e akó.

6. Ko e hā ʻa e ngaahi faingamālie ʻoku tau maʻu ʻi heʻetau talangofua ki he fekau ʻa Sīsū ke fakamanatu ʻa ʻene pekiá?

⁶ ʻOfa ke tau tokanga taki taha ki he ngaahi faingamālie ke tokoniʻi ai ʻa e kau ako Tohi Tapú, kau malanga ʻikai longomoʻuí mo e kau ʻaʻahi te nau ʻi he kau fanongó. (Luke 22:19) ʻE tāpuakiʻi moʻoni ʻe Sihova ha faʻahinga ngāue pē ʻoku fakalahi ʻi heʻetau ngāue ʻo e Puleʻangá.

Meʻa ke Leaʻaki Fekauʻaki mo e Ngaahi Makasiní

Ko e Taua Leʻo San.-Mas.

“ʻOku fakafuofua ki he kakai ʻe ua piliona ʻoku nau ʻilo pe lotu ʻaki ʻa e Lotu ʻa e ʻEikí. ʻOku pehē ʻa e konga ʻo e lotu ko iá: “Ke Hoko Mai Ho Puleʻangá.” Ko e ʻaonga ʻe taha ʻo e Puleʻanga ko iá te ne fakangata kotoa ʻa e ngaahi taú. Fakatokangaʻi ange ʻa e meʻa ʻoku talaʻofaʻaki mai ʻe he ʻOtuá. [Lau ʻa e Sāme 46:9.] ʻOku lāulea ʻa e kupu ʻoku kamata ʻi he peesi 5 ki he foʻi moʻoni ʻe fitu fekauʻaki mo e Puleʻanga ʻo e ʻOtuá.”

ʻĀ Hake! San.-Mas.

“Mahalo pē kuó ke ʻosi ʻiloʻi ko e kau tangata kehekehe ʻe toko 40 nai naʻa nau hiki ʻa e ngaahi tohi ʻoku faʻuʻaki ʻa e Tohi Tapú. Ka, ko hai ʻe lava ke tau pehē ko e faʻu-tohí? [Lau ʻa e 1 Tesalonaika 2:13.] ʻOku ʻomai ʻi he kupu he peesi 10 ʻa e ngaahi ʻuhinga lelei ʻoku pehē ai ko e ʻOtuá ʻa e faʻu-tohí.”

Ko e Taua Leʻo ʻEp.-Sune

“ʻIkai te ke saiʻia ke sio ki hono fakahoko moʻoni ʻa e kikite ko ʻení? [Lau ʻa e Taniela 2:44. Tuku leva ke ne tali.] Fakatokangaʻi ʻe kau mai ʻa e ʻOtuá ki he ngaahi meʻa ʻa e tangatá pea fokotuʻu hono Puleʻangá. Ko e kupu ʻoku kamata ʻi he peesi 8, ʻoku fakamatala lahi ange ai ki he kahaʻú ʻo hangē ko ia ʻoku fakamatalaʻi ʻi he Tohi Tapú, mo e ʻuhinga ʻoku totonu ai ke tau fakatuʻotuʻa atu ki aí.”

ʻĀ Hake! ʻEp.-Sune

“ʻI he kotoa ʻo e hisitōliá kuo fuesia ai ʻe he kakai fefiné ʻa e fakafaikehekeheʻi mo e fakamālohi. ʻOkú ke fakakaukau ko e hā ʻa e ʻuhinga ʻoku pehē aí? [Tuku ke ne tali] Fakatokangaʻi ʻa e founga ʻoku fakahinohinoʻi mai ʻe he Tohi Tapú ʻa e ngaahi husepānití ke nau fakafeangaiʻaki ki honau ngaahi uaifí. [Lau ʻa e 1 Pita 3:7.] ʻOku fakahaaʻi ʻi he makasini ko ʻení mei he Tohi Tapú ʻa e anga ʻo e vakai ʻa e ʻOtuá mo Kalaisi ki he kakai fefiné.”