ʻEke ʻe he Kau Lautohí

Ko ha Tokotaha Moʻoni ʻa e Tēvoló?

ʻIo, ʻoku akoʻi ʻe he Tohi Tapú ko Sētane ko e Tēvoló ko ha tokotaha moʻoni. Kae kehe, ʻoku manukiʻi ʻe he kau fakaanga Tohi Tapú ʻa e pehē ko ia ko e tokotaha moʻoni ʻa e Tēvoló. ʻOku nau pehē ko Sētané ʻokú ne fakafofongaʻi pē ʻa e tupuʻanga tefito ʻo e kovi ʻoku ʻi he tangatá.

ʻOku totonu nai ke tau ʻohovale ʻi he puputuʻu fekauʻaki mo e tuʻunga moʻoni ʻo Sētané? ʻIkai ʻaupito. Ke fakatātaaʻi: ʻE holoholoʻi nai ʻe ha faihia ʻa hono fakaʻilonga nimá mei he feituʻu naʻá ne ʻi aí koeʻuhí ke ʻoua naʻa ʻiloʻi ia pea ke kei hokohoko atu ai ʻene ngāue taʻefakalaó ʻo ʻikai ke maʻu. ʻI he tuʻunga meimei tatau, ko Sētané ko ha faihia pōtoʻi ʻokú ne fiemālie ʻi heʻene ngāngāue fakapulipuli, ʻo pouaki ʻa e tuʻunga kovi fakaeʻulungaangá. Naʻe fakahaaʻi mahino ʻe Sīsū ko Sētane ʻa e tokotaha ke tukuakiʻi ki ai ʻa e tuʻunga kovi ʻo e tangatá. Naʻe ui ʻe Sīsū ʻa Sētane ko e “ʻeiki ʻo e maama ko eni.”—Sione 12:31.

Naʻe haʻu mei fē ʻa e Tēvoló? ʻI hono muʻaki fakatupu ia ko ha meʻamoʻui laumālie haohaoa ʻi hēvaní, ko e ʻāngelo angatuʻu ko ení naʻá ne ʻai ia tonu ko e Tēvolo ʻi he taimi naʻá ne nōfoʻi ai ʻi he holi ke lotu ange ʻa e tangatá kiate ia kae ʻikai ko e ʻOtuá. ʻOku hiki ʻi he Tohi Tapú ha fetalanoaʻaki heni ʻi he māmaní ʻi he vahaʻa ʻo Sētane mo Sīsū ʻa ia naʻe fakahaaʻi ai ʻe he Tēvoló ʻa ʻene taumuʻa siokitá. Naʻe feinga ʻa Sētane ke ʻai ʻa Sīsū ke ne “fakatomapeʻe ʻo lotu kiate” ia.—Mātiu 4:8, 9.

ʻI he tuʻunga tatau, ʻi he fetalanoaʻaki mo e ʻOtuá, ʻo hangē ko ia ʻoku hiki ʻi he tohi Siopé, naʻe fakahaaʻi ai ʻe Sētane ʻene fakaueʻilotó. Te ne fai ha faʻahinga meʻa pē ke tākiekina ai ʻa e tangatá ke ne liʻaki ʻa e ʻOtuá.—Siope 1:13-19; 2:7, 8.

Fakakaukau angé: Kapau naʻe fetalanoaʻaki ʻa Sētane mo Sihova ko e ʻOtuá pea mo Sīsū Kalaisi, ʻe lava fēfē ke ne hoko ko e tupuʻanga tefito pē ʻo e kovi ʻoku ʻi he niʻihi kehé? ʻOku ʻikai ʻaupito ha kovi ʻi he ʻOtuá pe ko hono ʻAló! ʻOku hā mahino leva, ko Sētané ko ha tokotaha moʻoni—ko ha meʻamoʻui laumālie kovi ʻoku ʻikai haʻane fakaʻapaʻapa kia Sihova pe kia Sīsū.

Ko e tuʻunga fakameleʻi ʻo e tangatá ʻoku ʻomi ai ʻa e fakamoʻoni ki he ʻi ai ha Tēvolo moʻoni. Ko e ngaahi puleʻanga ʻo e māmani ko ení ʻoku nau tuku ʻa e meʻakai ʻoku hulú ke kovi lolotonga ia ʻoku fiekaia honau kakaí. ʻOku tānaki ʻe he ngaahi puleʻangá ʻa e meʻatau fakaʻauha fakatokolahí ke fai ʻaki ʻenau fetāmateʻakí. ʻOku nau ʻuliʻi ʻa e ʻātakai ʻo e māmaní. Neongo ia, ko e kakai tokolahi ʻoku nau kui ʻo ʻikai ʻilo ʻa e tupuʻanga ʻo e tōʻonga tāufehiʻa mo fakaʻauha-kita peheé. Ko e hā hono ʻuhingá?

ʻOku fakahaaʻi ʻe he Tohi Tapú ko Sētané ‘kuó ne fakakuihi ʻa e ʻatamai ʻo e kau taʻetuí.’ (2 Kolinito 4:4) Ke tākiekina pōtoʻi ʻa e tangatá, ʻoku ngāueʻaki ʻe Sētane ha kautaha taʻehāmai. Ko e “ʻeiki [ia] ʻo e kau tevolo.” (Mātiu 12:24) Hangē pē ko ha taki ʻo ha kau faihia ʻoku lava ke ne fakalele ia ʻo ʻikai ke fakaʻasi ki he kotoa ʻo e faʻahinga ʻoku kau ki aí, ʻoku pehē hono ngāueʻaki ʻe Sētane ʻa ʻene kautaha fakapulipuli ʻo e kau ʻāngelo fulikivanú ke nau puleʻi ʻa e fuʻu tokolahi ʻo e kakai ʻoku ʻikai ʻaupito haʻanau lāuʻilo ki he ngāue pe tākiekina ʻokú ne faí.

He houngaʻia ē ko kitautolu ʻi hono fakahaaʻi mai ʻe he Tohi Tapú ʻa e Tēvoló mo ʻene kautahá! ʻE lava ke tau fai ha meʻa ke talitekeʻi ʻa e tākiekina ʻa e Tēvoló. ʻOku ekinaki mai ʻa e Tohi Tapú: “Mou fakavaivaiʻi kimoutolu ki he ʻOtua. Ka mou tali tekeʻi ʻa e Tevolo, pea te ne hola meiate kimoutolu.”—Semisi 4:7.